18/12嫁香水少爺
上周六（18日）小谷大婚之喜，兄弟姊妹團晨早7點集合，由接新娘開始，直落到凌晨2點婚宴先散席，玩足19個鐘。難怪婚後兩日小谷仍然倦意未消。
記者見谷祖琳行入廚房整甜品，睇嚟老闆娘做生意唔係得個講，仲會落手落腳，力不到不為財。
谷祖琳與劉穎恒上周六（18日）在尖沙嘴洲際酒店舉行豪華婚禮，下午5時許，兩人更公開讓傳媒拍照。穿上婚紗的小谷明艷照人，新郎哥Andrew則被指貌似曹格。
20/12落舖幫手
剛結婚的谷祖琳於本周一（20日）晚上10時許，到大坑小甜谷打點，她在店外手指指吩咐員工，非常忙碌。
其後李彩華與友人前來幫襯，因為店內已爆滿，眾人惟有坐在店外，谷祖琳亦親自上前招呼。
記者等小谷招呼完客人，即上前做訪問，素顏嘅小谷個樣都幾攰，佢話：「結婚當晚真係攰到個人散晒，我到依家都未復元，不過都要落舖打點吓。」
香水回禮
新郎哥劉穎恒係香水代理揸fit人，所以送俾傳媒嘅回禮禮物除咗有利是之外，仲有一枝名貴嘅香水。
5位數字接新娘
上周六（18日）晨早，新郎劉穎恒帶領兄弟團去女家接新娘。舞台劇紅人梁祖堯呢日竟然係姊妹，由佢諗計糟質班兄弟，要佢哋着女性內衣做掌上壓。之後要新郎俾5位數開門利是，先可以入屋接新娘。
着新潮褂出門
谷祖琳穿上新潮褂出嫁，早上化妝時已感動落淚，出門時仲眼濕濕。而劉穎恒接到新娘時，更與小谷咀足幾分鐘。
谷父帶進場
小谷的婚宴非常感人，入場時她輕挽父親手臂進場，接受在場賓客的祝福。
肥谷飲大咗
谷德昭見到姪女嫁到個好歸宿，開心到好似嫁女咁。小谷感激阿叔幫佢做司儀，仲大爆肥谷飲咗兩枝威士忌同一枝XO，飲醉酒不停同人講英文同山東話。
性感晚裝騷料
小谷結婚當晚的婚紗及晚裝，全由時裝設計師何國鉦一手包辦。當中呢條紫色晚裝最性感，小谷話係老公強烈要求佢騷Quali。
嘉賓大會演
小谷在圈中人緣非常好，當晚有唔少明星朋友到場祝賀。其唱歌老師杜麗莎及好友林一峰更上台表演，在台下睇表演的小谷又忍唔住感動落淚。
留言列表
