曾經風光過的李蕙敏（Amanda），過去十年事業一沉不起，更有指她欠下百萬卡數，連累朋友被「大耳窿」電話騷擾追債。東山無法再起，就算李蕙敏試過轉行賣衫賣玉石，一樣唔掂，唯一慶幸女人四十終於找到Love，據知她跟前度四眼男分手後，即搭上從事金融的美國老外，二人拍拖年半，除同居西半山外，老外honey更揼水俾李蕙敏出碟，可以有本錢再戰樂壇。

飲大發酒瘟
近年被指欠下一屁股債的李蕙敏，雖然冇錢還，不過依然唔使做到處吃喝玩樂，愛蒲愛飲愛蘭桂坊的她，早前孖住拍拖年半的老外男友出動，凌晨時分已經飲到醉醺醺，要男友扶實上的士走人。的士到達西半山巴炳頓道瓊峰台，老外男友俾完錢先行落車，再跑到另一邊幫女友開車門，不過飲到面紅紅的李蕙敏醉到唔願郁，坐在車廂內「發酒瘟」不停講說話，擾攘數分鐘後，要男友又氹又拉才肯落車。明知女友飲大咗，老外男友亦盡顯風度，即使只有十多步便到大廈，仍全程高度戒備扶實李蕙敏。「Amanda呢十幾年真係運滯，登台騷又唔多，如果搵到食，佢就唔使去朋友間鋪頭做sales賣衫啦！拍拖反而好少少，佢試過同個TB一齊，個TB好錫佢，知道佢鍾意扮靚，好捨得買衫送俾Amanda，之後個四眼男就麻麻哋，其實佢都過咗四十歲，拍拖係時候要諗將來，佢識咗鬼佬之後，有比較咪即刻飛起四眼男囉。」知情者說。

搵水泡翻身
女人欠債，唔想靠自己撲水還債咁辛苦，倒不如搵個有米靠山相救，易借唔使還，呢條數，唔難計。 章小蕙章小蕙與前夫鍾鎮濤97年投資地產失利，負債二億五千萬，阿B被迫申請破產，至於一向洗腳唔抹腳的章小蕙，之後搭上有婦之夫商人陳曜旻，更搞到對方離婚兼破產，吸乾白頭佬後，章小蕙赴美再搵水泡，與老外律師拍拖兩年，欠債日子衣食住行繼續有人照。


李彩華 03年李彩華因父親生意失敗及炒燶股票，被債主臨門追百萬欠債，有傳代父還債的她，幸得當時男友蕭定一出面，助她跟當時的經理人黃栢高以百二萬贖身，並幫Rain父還欠債。

撐腰出唱片
對女友百般遷就的老外，知道李蕙敏與原本關係惡劣的養母和好如初，關係比以前更密切，老外亦愛屋及烏，對未來外母十分尊敬，跟李蕙敏認識短短數月，便主動相約母女二人食飯，見女友對唱歌未死心，又願意揼本支持她錄歌出唱片，再戰樂壇。「佢哋成日飛去歐洲玩，舊年九月，鬼佬特登同佢去意大利度假，當係Amanda嘅生日禮物，不過因為要趕返大陸登台，所以只係玩咗一星期就要走。鬼佬對佢真係好細心，知道Amanda要再唱歌，佢得閒就會陪女友做運動練氣，其實佢最初見到Amanda，都唔知佢做過歌手，只係覺得佢皮膚白白幾靚女，先開始追求。拍咗拖唔係好耐已經住埋，而家Amanda都變得積極咗，起碼都會早啲起身去行山，唔似以前咁hea。」知情者說。A

坎坷天后
現年41歲的落難天后李蕙敏，17歲被倫永亮發掘入行，曾跟區海倫組成女子組合Echo，拆夥後李蕙敏轉做DJ，拍住Wyman在商台開咪主持《娛樂性騷擾》，節目頗受歡迎，令事業開始有起色。95年憑Wyman操刀填詞的《活得比你好》以及《你沒有好結果》爆紅，從此一躍成天后。98年被寶麗金（環球前身）以千萬羅致成佳話，可惜事業未能再創奇跡，唱片銷量亦無以為繼，天后事業直插，01年與唱片公司解約，直至07年才以藝名「A.Lee」再戰樂壇，可惜風光難復再。事業多波折，身世亦坎坷。由養父母湊大，入行後才知道真相，李蕙敏因與養母關係不融洽，走紅後決定離開父母過獨立生活，之後養成揮霍性格，但入不敷支，被指欠下周身債。 ####



 

 
（《蘋果日報》圖片）

 
由中環返西半山屋企，老外男友費盡唇舌，終於氹到飲到醉晒的女友落車，跟住又扶又拉送女方上樓。




幾乎夜晚先見人的李蕙敏，跟老外拍拖後，亦開始肯朝早起身去行山。


跟老外感情愈來愈穩陣，李蕙敏亦帶住他出席朋友聚會，並公開坐老外大髀影合照。


當年跟住梅艷芳的蘇永康、草蜢的蔡一傑以及何韻詩，近年反彈再戰樂壇，難怪李蕙敏亦心郁郁籌備出唱片。（《蘋果日報》圖片）








二人拍拖無耐，去年俾記者影到，老外相約李蕙敏及其養母在中環食飯家庭樂。


多年來感情不穩，加上欠下一身債，李蕙敏愛夜蒲之外，更周時被影到唔顧儀態飛釘肚凸凸行街。


一度是天后的李蕙敏，試過一年買名牌過百萬之舉，大使慣的她，因而收唔到手，欠下百萬卡數。（《蘋果日報》圖片）


07年再有機會出唱片，李蕙敏特登在生日月份開記招宣布，不過反應麻麻，她更絕跡樂壇。（《蘋果日報》圖片）


（《蘋果日報》圖片）

arrow
arrow
    文章標籤
    老外 拍拖 amanda 欠下 唱片 女友 半山 天后 wyman 二人
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacylife 發表在 痞客邦 留言(0) 人氣()

    E-mail轉寄