話題從一年娛樂大事開始說起。
我說：「噚晚咁啱轉去娛樂新聞台，睇到黎芷珊回顧一年娛樂大事……」
吳卓羲很淡定：「應該冇我份呀……」
我說：「點少得你呀？你同張馨予、林峯同潘霜霜、陳冠希同Cammi擺埋一齊講，大家都係因為一張相……」
感冒未清的吳卓羲索一索鼻，苦笑一下，一臉尷尬。

 
32歲的吳卓羲，98年加入電視台做舞蹈員，2000年簽約成為藝員，出道11年，傳聞食女無數，有「姐仔屠夫」之稱。自從搭上內地咪神張馨予，周不時拍拖行蹤外洩、年尾來一單終極微博床照宣示主權。
我感慨，一代電視城小生上得山多終遇虎，他卻說：「如果我都怪佢、唔體諒點解佢要咁做，同出面其他人仲有咩分別？」
話裏的含意清楚不過，粉絲們真的沒必要再替男神抱不平，2011年多得霜霜和馨予，不然，我們哪裏會看到當家小生們有血有肉動起感情也會心軟的另一面？

馨馨我我
同時在趕拍《名媛望族》還要為《缺宅男女》出動宣傳，答應安排吳卓羲專訪以前，經理人早拜託，張馨予可以提，不過篇幅不要太多。經理人的苦心我明白，不過說實話，這次公布戀情雖然處於被動，吳卓羲處理得大方得體，倒是他歷年最為形象加分的一段緋聞。「入行咁多年，上咗好多堂，今次都係……做人唔好淨係睇表面、唔好一見到面嗰浸就發脾氣嬲咗先。同吳卓羲一齊唔容易，我冇時間、冇自由、處理感情要低調，工作佔去嘅時間同精力已經好多，其他時間盡可能想用少啲個腦，所以，吳卓羲呢個人亦一啲都唔浪漫。佢（張馨予）做嘅事，有佢嘅原因，我明白佢咁做，都係因為冇安全感。我嘅位置要做嘅嘢，係體諒佢點解要咁做……如果連我都怪佢，同出面其他人有咩分別？」不見天日困在錄影廠裏拍劇再拍劇，還有鐵杆女粉絲數以百萬計，戀情輕易絕對公開不得，沒名沒分又沒甚麼時間相聚，當家小生的女朋友不容易做，張馨予其實很值得同情，更何況還是中港異地戀。「係唔容易經營㗎！所以要低調處理。除非唔喜愛啫……我喜愛所以在乎，所以要努力經營同維持。我喜愛我嘅工作，所以想盡量延長我嘅工作壽命，我喜愛一個女仔，所以難都會盡力經營。過度關注係我哋呢行嘅配套，我可以做嘅，惟有盡量低調。」

有線視帝
去年憑內地劇《大丫環》獲得有線視帝，卻被安排在重頭劇《ATF反恐》裏做下把襯托陳展鵬上位，不少人為吳卓羲抱不平，說他有外形有演技卻不獲重視。吳卓羲說，作為2000年無綫小生離巢潮（羅嘉良、古天樂等）下受益上位的一脫人，他和林峯、馬國明、黃宗澤同一幫小生明白，這不過是遊戲規則，實在沒甚麼好動怒。

 
「好多人覺得我一帆風順，其實藝訓班畢業以後，我都做咗三年老臨，由路人甲、清兵乙做起，試過企錯位遮住燈，俾導演開咪大鬧：「你邊位呀？」。2000年羅嘉良、古天樂好多小生離巢，唔夠人用，先至輪到我哋咋嘛！等於林峯攞個「金曲金獎」，你哋都明白，我哋好被動，好多決策背後嘅原因好複雜。公司叫你做乜，唔通你話唔接受咩？家畀個獎你，又唔係衰嘢喎。好多謝有一部分觀眾為我抱不平，其實我自己真係得啖笑，同陳展鵬一齊傾單新聞，咪當為套劇宣傳囉。對我嚟講，佢有佢嘅角色、我有我嘅發揮，戲分平均。劇集一日未出街，有乜理由出面會知得多過我哋兩個同監製王心慰？觀眾好極端，鍾意就鍾意、唔鍾意就唔鍾意。其實幾日唔瞓覺喺廠日拍夜拍，背劇本、唱歌練舞，都有付出、都有血有淚，我哋每一個人都一樣。咩電視台陰謀論、咩花邊新聞，我一概當係做呢行賺錢賺名氣嘅配套，你點講點諗都得，唔係靚仔大晒、唔係有關係就一定紅，更何況我冇關係添，我哋在乎可以控制嘅，只有做好自己本分。」

缺宅小生
電視劇《缺宅男女》裏，男男女女一宅難求，九口人迫埋同一屋簷下，是千千萬萬小市民的寫照。32歲的當家小生說，自己也好不到哪裏去，戰車換完又換現時名下有三架，自置物業尚且一幢沒有。雖然事業有成，至今依然讓媽媽整天慌失失：「佢成日都話我，有朝一日冇嘢做冇嘢撈，買咗樓就起碼都叫有瓦遮頭。」「香港地，揸到架一百幾十萬嘅車已經好型好舒服啦！我真係唔係嗰啲追求超級跑車、好似郭富城咁，買車嚟儲嘅人。買車對我嚟講，係平衡、係協調，做我哋呢行，係喺屋企、喺自己架車入面，我至真係搵到舒適、覺得有安全感。


有次朋友借架4百萬嘅平治SLS畀我揸，摸上手的確high到爆，不過揸佢落去九龍城行一轉，泊車都轟轟聲，車門彈起嗰下，成條街排隊等位食飯嘅人望住我，幾尷尬呀，面都紅晒……4、5百萬超級跑車，我唔好，亦都買唔起，冇咁大個頭就唔好戴咁大頂帽，dream car又點？我最終目標，都係阿媽唔再為我擔心，唔會再驚我捱貴租、皺晒眉。我係屋企最細個仔，由細到大冇令阿媽少擔心過，阿媽怕高調，我連攞獎帶埋屋企人一齊去分享快樂都做唔到，唯一可以做嘅，就係養起頭家令佢住得舒適。今年啦，希望呢個心願可以今年內達成，等阿媽真真正正放心一次，我就覺得係自己最大成就。」

那些年，我掉過的眼淚
吳卓羲說起24歲第一次做主角，拍《英雄．刀．少年》的往事：「嗰日係聖誕節，我前一日開工開到29（凌晨5時），下一個通告係0630。同事收晒工去晒玩，化妝髮型師都轉咗第二更，拍對手戲嘅劉松仁仁哥地位唔同，唔會早更接住夜更，剩番我喺郊外吊住威吔同佢嘅替身拍打戲。嗰度叫太陽谷，周圍係山墳同棺材，我五日冇瞓覺，拍完嗰場戲，就坐喺個平時浪住棺材嘅石枱上面打畀阿媽。我喊，阿媽又跟住喊。我話：『我唔撈啦！』阿媽話：『我知你辛苦，大個仔要識負責，點都拍埋呢套先走啦……』結果？我咪拍到家囉……」換作你，會拍到現在嗎？換作你，會接受公司頒給你的「金曲金獎」嗎？我自問沒有這個能耐，一下子，我對電視城裏的小生花旦們閃過幾秒的，肅然起敬。 ####

 

 
唔係靚仔大晒、唔係有關係就一定紅，更何況我冇關係添。

 
多次被拍到機場接機、北上偷會，吳卓羲直到去年12月，張馨予失驚無神用自己微博戶口上載床照，才終於肯承認二人「拍過拖」。

 
入行12年，緋聞女友多不勝數，溝女戰車一架換一架，目前最貴座駕是百2萬平治跑車：「姐仔屠夫，笑話嚟啫，邊有咁易食。」《蘋果日報》圖片


有報道指09年因為形象差被無綫遣返內地拍劇洗底，還因為《大丫環》一劇獲頒有線劇集台視帝榮譽：「唔係洗底，一向係無綫劇行先，內地劇我推咗十幾部。」


去年有報道指吳卓羲無綫當家小生地位不保，連新劇《ATF反恐》亦要做去年才上位的陳展鵬下把。《壹週刊》圖片


02年無綫小生離巢潮，吳卓羲說與黃宗澤、馬國明是因此受益上位的同一脫人，齊齊獲派經典劇《衝上雲霄》的實習機師角色。《蘋果日報》圖片


2000年獲古天樂推薦入訓練班前，吳卓羲做過dancer，幫郭富城伴過舞。《壹週刊》圖片




第一次擔正劇集，拍攝《英雄．刀．少年》時，吳卓羲曾經辛苦到想劈炮：「細個條路係人哋畀我行，邊識諗有得拍係好事、一套劇可能帶畀我幾多機會……」

吳卓羲 - 別怪她 (KTV)

arrow
arrow
    文章標籤
    小生 上位 好多 家小 atf 明白 出面 去年 抱不平 所以
    全站熱搜

    stacylife 發表在 痞客邦 留言(0) 人氣()

    E-mail轉寄