Chrissie貴為一代女神，唔只本地宅男流口水，就算娜姐攻日亦一樣有市場，有仔埋身力追唔出奇，係睇娜姐定力夠唔夠啫！《蘋果日報》圖片
娜姐同 Avis拍拖逾三年，去年 10月二人試過情海翻波，娜姐仲自爆話二人關係處於「冷靜期」，最後總算雨過天晴，今年新春愛火重燃共赴泰國度色慾假期。
等女友回頭
死唔斷氣
但痛失女神嘅 Johnathan仍未心死，上週五（ 25日）於微博留言話「再見面，知道忘不了。我要成為最後的勝利者」，引嚟 Avis喺微博插爆「不自量力的小傢伙……以為自己是全世界最好最帥最美的騷擾我們走的路……一定有報應的」擺明火上腦！
兩男爭一女，女主角周秀娜話：「唔好玩啦，係都整件海綿蛋糕晾吓胃啦！」本刊週一（ 28日）致電 Johnathan問係咪想翻兜娜姐，佢就始終有保留：「我同 Chrissie係工作關係啫。我家冇拍拖，除非唔使追啦，追女仔好嘥時間，我話爭取最後勝利係講打麻雀啫！」而保住女友嘅 Avis就信心爆棚：「我知佢哋日日都見，佢哋冇嘢。（點解話有人「不自量力」？）我近嚟有啲唔開心先咁寫啫，因為公司出咗少少事，又有朋友生癌啫。」兩位情聖唔想俾人知爭女，不過理由好似牽強啲喎！
勝利笑容
週一（ 28日） Avis就 Johnathan「挑釁」言論笑住回應話：「我知佢（ Johnathan）講緊打麻雀嘅嘢之嘛，對我同 Chrissie嘅感情完全冇影響！」連人哋打麻雀都咁關注，果然知己知彼喎。
微博搶女
化妝師 Johnathan Yung同娜姐暗撻，兩人於 12月時更不避嫌互相調情，雖然後來娜姐重投 Avis懷抱，但至上週五（上月 25日） Johnathan再於微博宣戰，搞到啞忍開嘅 Avis都要開炮，不過 Avis同娜姐微博都有唔少錯字，傳情同鬧人都要學好中文先喎！
養唔熟
26歲 Johnathan本來只係時裝店 sales，因為覺得做化妝師專業又有型，於是報讀化妝 course後加入化妝品牌 Bobbi Brown，每日喺 counter為客人試妝。之後經朋友介紹拜 Yumiko男友 Andy Leung（梁學儲）為師，同時開始為 Twins、梁詠琪、鄭融和謝安琪等化妝。
但去年 10月尾 Andy突然於微博上指名 Johnathan「多次遲到及失場，並利用其職權對本公司做出極度嚴重的傷害」，正式宣布結束師徒關係，有指係 Johnathan想另起爐灶而博炒。
留言列表
