VW Touran GT 1.4 TSI 大碼 Golf 坐七個　最叻玩凳－娛樂八掛大分享☆

VW繼 Golf、 Polo筍價登場後，今勻轉攻七人車，最新 Touran不但賣相似足王牌 Golf，連「孖叉」偈、 DSG等靚料亦統統落齊，更優勢係七座位＋皮櫳＋大天窗，連百變座椅都可以拆出嚟，塞部洗衣機落去都唔怕揩花張皮 Seat啦。記者：徐影龍攝影：林栢鈞　Model： Hidy@GME Models

其他副刊影片孖叉配 DSG　七人車照飆

新 Touran明明係七人車，偏偏身形無傳統車款咁大牛龜，加上賣相有 90%似 Golf，離遠望埋去你都以為 Golf出 7人版。由頭燈、鬼面罩、氣壩，都充滿六代 Golf風格。仔細啲睇，下巴嘅雙圓霧燈應該最接近 Golf GT，喺倒後鏡望到佢，驟眼睇真係以為有架 Golf推緊你。七人車咁易推人咩？ Touran正正裝配咗 VW同 Audi大受歡迎嘅 1.4 TSI偈。除最低牌費夠吸引外， Super＋ Turbo「孖叉」增壓，令細容積車一樣充滿爆炸力，最重要係千五轉已即到扭力峯值，要爆贏人，根本毋須谷到面紅耳熱，加上最煞食嘅七速 DSG波箱，兼顧家人之餘，閒時亦可當佢 Golf咁爽飆一下。首批筍價廿八萬有找，歐洲料韓國價，難得 VW無就住就住，真皮座椅、天幕式電天窗、多功能軚盤連+/-撥片、茶几仔等一應俱全，連中控台大屏幕都配上 Touch Screen，揀歌、轉台好似 iPhone咁篤吓篤吓，幾過癮呀！

放大圖片

放大圖片
■外形激似六代 Golf GT，只係變成大碼版，坐足七個人。

■外形激似六代 Golf GT，只係變成大碼版，坐足七個人。

分離式座椅真正獨立放大圖片
■中排三張凳可獨立抽走，令尾廂空間激增 16倍至 1,913L。

■中排三張凳可獨立抽走，令尾廂空間激增 16倍至 1,913L。

性能同豪華度合格有餘，最貼心係座椅鋪排，七個位完全獨立，椅背隨意摺起收納都得，坐人載貨比例完全自主，唔怕兩頭唔到岸。我最欣賞係中排座椅可以玩得夠癲，簡單摺低變成大平台尾廂又得，向前摺起增加載物空間亦得，最抵死係採用分離式設計，剔起兩個安全鎖，即可成張凳抽走。唔止一張凳，而係三張凳任你抽！對於長期坐六個人，抽起中排兩旁坐椅，可令尾排乘客上落更方便，再型啲，甚至乎抽起中間張凳扮「走廊」都仲得。咁樣靈活百變法，又真係唔多七人車做得到。靚女 Model實地測試玩座椅調配動作，雖稍為費勁，但經詳細研究下，其實大多情形只係唔啱位，如座椅未推至最前便會鎖死，就算史泰龍嚟到都抽唔走。唯一要考慮係每張凳都有一定重量， 90磅以下嘅女仔可能有點老鼠拉龜，但我唔怪 VW，反而讚佢用料夠實淨㖭。

放大圖片
■中排可摺起「打棟企」，有埋腳架支撐，夠安全。