傅穎（Theresa）去年大鑼大鼓加盟星皓，更自擲一百萬和金牌提早兩年解約。以為擺脫死敵Stephy，女神從此可以專心工作，少惹是非。誰知早前Theresa忽然公開與緋聞男友羅仲謙決裂，其後再以同姓密友爆料加sms連環出擊，務求令羅永不超生。
傅穎對羅仲謙手起刀落辣㷫星皓外，據知，在星皓短短一年，更犯下唱衰公司和自把自為兩條「死罪」。本刊收到消息，指星皓近日密謀與Theresa提早解約，女神今勻真係玩大咗。


兩周前（14日），Theresa與羅仲謙以情侶檔雙雙出席活動時，女方突爆羅仲謙「講嘢冇句真」兼「冇誠信」。其後她一位TB密友肥A加把口喺周刊狂插羅花心，連隨又有雜誌影到Theresa與情敵開火的sms。時間夾到啱啱好，攻勢一浪接一浪。

廣告商hold廣告
據知，星皓在Theresa最初爆響口當日，已即時搵二人照肺，提醒他們不要再就此事發言。連日來男方沉默是金，相反Theresa對羅依然窮追猛打。連番舉動，令星皓萌起與她提早解約念頭，Theresa隨時變孤兒女。「羅仲謙呢期上緊位，除咗有幾套戲搵佢拍，手頭上仲有四、五個廣告已經傾到一半，點知因為呢件事搞到有啲hold起咗，最慘依家仲要俾人起咗個朵叫『集郵謙』。其實公司知佢哋拍拖，好早已經講明做嘢還做嘢，拍拖要低調。依家Theresa失晒控咁，雖然話同佢仲有三年約，但呢個係計時炸彈，唔知幾時會爆。公司諗過度過，話寧願賠錢都要踢佢走。」知情人透露。

賣肉谷碟
除了狙擊羅仲謙，Theresa大言不慚狂唱公司亦是致死原因。月中她全新專輯《Metamorphosis》正式出街，不過Theresa卻周圍唱隻碟出到街，是自己碌盡人情卡而非公司功勞。「佢同人講話公司冇唱片部，冇人識做唱片，隻碟出到街全部都係自己一手一腳line-up，宣傳嗰陣自己仲要自動波行性感先有唔少noise，公司冇幫過佢。佢仲話入星皓前冇諗清楚，家陣好後悔！」此事近日傳番去星皓等人耳邊，令公司對她極度不滿。

累公司使冤枉錢
另一方面，Theresa七月所拍的寫真《about her》，為造聲勢力敵一眾o靚模，Theresa透過友人介紹，竟然私自跳過公司與日本攝影師米原康正聯絡，更自把自為應承對方所開85萬酬勞條件，繼而向傳媒放風，指自己的寫真集是由曾為日本水着女星野亞希、蒼井空等拍攝的米原康正操刀，逼公司就範。
據知，星皓原先已決定聘請本地攝影師陳錦強（CK）為Theresa寫真拍攝，CK去年曾為Angelababy寫真集擔任攝影總監，但Theresa卻嫌不夠噱頭兼已被Baby食頭啖湯，所以來招先斬後奏。星皓為顧全大局，焗住要俾多幾十萬。
本刊就提早與Theresa解約一事，致電星皓，藝人部總監王小姐表示：「呢排實在有太多新聞，我哋唔會再回應啦！」

網友狂插造新聞
Theresa新碟面世，咁啱得咁蹺其寓所卻發生爆玻璃事件，其後Theresa又自爆和巨胸謙決裂，唔少網民覺此舉有博見報宣傳之嫌。

是非多多人緣麻麻
09年10月 與金牌對簿公堂
有指Theresa在金牌大風時，一直被Stephy打壓及被其他歌手杯葛，去年尾Theresa正式向公司發律師信，要求提前解約，過檔星皓。原本金牌大風無條件放人，但Theresa其後的「食穀種論」辣㷫公司，金牌大風最後告Theresa違約，雙方對簿公堂。」據知，現時官司仍在進行中。

10年8月 Cookies音樂會冇份
Cookies開音樂會，本身是搞手之一的Angela，親自出面聯絡Stephy、Miki和Kary以及其他成員現身，唯獨冇叫Theresa。對此Angela表示：「Cookies解散咗七年，我哋六個都有喺facebook同msn聯絡，唯獨同Theresa有聯絡，我冇佢電話，facebook都冇。」可見Theresa人緣認真麻麻。


弊傢伙，呢鋪玩大咗！（設計對白）


上周一（20日），Theresa到旺角出席新碟發布會，席間依然唔識死指「羅仲謙令我好失望」，之後掩面狂喊，唔夠幾分鐘，再變臉說：「希望大家可以留意吓我隻碟。」神乎其技。


死罪一　扮受害者狙擊男友
被Theresa連翻單打、批鬥後，巨胸謙慘變花心「集郵謙」。不過羅仲謙連日來對事件保持緘默，聽教聽話，因此依然得公司力撐。


死罪二　狂呻後悔入星皓
出道以來被指經常放料的Theresa，有傳近日四圍唱公司唔掂兼冇資源，搞新碟要自己狂碌人情卡，又要賣肉宣傳谷人氣，因此激嬲星皓。


死罪三　先斬後奏
7月出寫真時，Theresa高調表示已聘請日籍攝影師米原康正為她攝影，令星皓白白俾多幾十萬。有傳Theresa在拍攝寫真期間，因對米原諸多要求而得罪對方，Theresa兩邊唔討好。



Theresa在星皓短短一年，三番四次惹禍觸怒老闆王海峰，難怪Theresa冇得留低。









arrow
arrow
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄