週日晚（5日）無綫《萬千星輝頒獎典禮2010》揭盅，賽前大熱嘅《義海豪情》劉醒黎耀祥同九姑娘鄧萃雯，順利撼贏陳豪同佘詩曼再奪視帝視后。
陳豪輸畀劉醒算正路，反而連「我最喜愛的電視男角色」都輸埋畀chok神林峯，最終攞個「專業表現」豬肉獎先唔抵。賽果爆冷，就連見慣大場面嘅佘詩曼，喺後台睇直播都嚇到O嘴。
林峯成功橫刀奪獎，只因chok神於頒獎前出招冧掂六嬸方逸華，講攞獎，林峯就真係「專業」喇！


無綫台慶頒獎禮全城等睇賽果，當晚最高收視達41點、平均收38，出爐視帝視后黎耀祥同鄧萃雯攞完獎全情high爆有問必答！

後台傳噓聲
不過有獎攞唔一定風騷，賽前另一大獎「我最喜愛的電視男角色」，大熱陳豪最終輸畀無綫契仔兼新任chok神林峯，臨門失獎，當公布結果時，後台記者連環噓爆，而剛接受完訪問的佘詩曼，睇到公布得獎者時直頭O埋嘴，事後阿佘亦為同劇《公主嫁到》拍檔陳豪不值：「我梗係撐阿Mo（陳豪），話晒同劇……咁林峯都好！」講完立即走人。
最後陳豪得番個今年新加嘅「最佳專業表現大獎」，豬肉獎在手嘅陳豪惟有死撐：「呢個獎都好呀，攞唔同獎都開心，我呢個獎唔差o架！即係我pro.囉！對我準時、背劇本嘅嘉許！」失獎心酸，但連奪「tvb.com人氣」同「我最喜愛的電視男角色」兩獎嘅林峯就超開心。林峯成功橫刀奪獎，原來於頒獎禮前一日，林峯曾專程從馬來西亞送上簽名演唱會DVD和致電六嬸方逸華搞好關係。

Chok住攞彩
人情牌有效果，難怪林峯除喺台上俾Do姐寸佢個樣夠chok都笑笑口外，台下仲攞彩話：「我真係估唔到，可以攞兩個獎，多謝公司同珍姐（曾勵珍），其實我自己想阿Mo攞！佢做得好好！」之後又公開話：「我梗要多謝方小姐啦（方逸華），我知上次演唱會，方小姐睇唔到，所以前幾日咪送咗隻簽名碟畀佢囉，多謝公司畀咁多機會我，我都好努力做o架！」個個都睇得出你好努力啦，峯哥！

珍姐玩晒
今屆台慶頒獎禮賽果，林峯揮低陳豪，令唔少人失望指賽果欠公信，但確實陳法拉、鄧萃雯同黎耀祥都係戲劇製作總監曾勵珍愛將，雖然阿佘同林峯係資源部總監的樂易玲至愛，但二人主演嘅《公主嫁到》同《談情說案》都係珍姐旗下監製，所以台慶獎使乜爭！

頒獎嘉賓唔畀面
頒獎禮結果都冇乜意外，反而頒獎嘉賓就帶來驚喜，其中吳君如、杜琪峯更攞無綫高層講笑，不過最搶一定係狄龍，一出場先噏咗段唐代詩人許渾《凌歊台》嘅詩，之後再一連串英文多謝無綫，認真騎呢。

寸無綫
「好多辛酸喺無綫……離開無綫之後都幾好……即係冇造馬啦……咦！又唔係喎！」暗寸喺無綫做得辛苦，《公主嫁到》攞「最佳劇集」係造馬。

潤高層
吳君如：「林峯唔好氣餒，黃生講嗰啲唔好擺喺心。」擺明寸邵氏電影高層黃家禧，早前飲醉酒話林峯冇電影market。

是但噏
「湘潭雲盡暮山出，巴蜀雪消春水來。我係狄龍，TVB thank you so very much to give me such opportunity to this thank you very much to this event.」九唔搭八，之後再話麥包「唔好得意忘形，因為樂極生悲」，最後又勉勵藝員「要秉行《歡樂今宵》嘅精神，為觀眾帶來歡樂。」

姐仔台慶咪鬥
頒獎禮唔只睇邊個攞獎，着咩衫都好緊要，冇獎攞不過識得谷，分分鐘第日報紙張相，仲大張過攞十個獎嗰個，好似今年最爆係梁靖琪（Toby），套晚裝由佢自己做老闆嘅I Dreamation Wedding Planner公司設計，盡顯佢34D Cup上圍，不過著名時裝設計師Walter Ma就唔多like，反而激讚另一deep V姐仔胡定欣。Toby說：「今次我想型啲，套衫同對鞋我用咗一個月時間造o架 ，一個禮拜前仲節食添，齋食蛋白青菜。」

贏咪輸衫
梁靖琪/Dreamation
「我知佢想型，但係佢唔係型嗰隻囉！同埋佢太好身材，着呢套衫顯得佢個胸好墮。同埋對鞋（右圖）好唔襯佢，佢可以揀啲Elegant啲嘅boot！」

咇大咪
Toby成晚超搶鏡，坐喺候選席唔覺意夾一夾，更加令人窒息，難怪連吳卓羲都要SMS話佢着得太誇張！

微波夠型
胡定欣/Emillio Pucci/David Yurman首飾
「我覺得佢好型喎！大deep V唔一定要大胸先好睇！況且佢都有少少o架！同埋佢嗰髮型好襯佢，好型！」

身形輸蝕
鄧萃雯/Van Cleef & Arpels 900萬首飾/Wyman薦何志恩設計
「我諗係高度所限同figure問題，所以件衫佢未發揮到最好啦，如果佢個髮型係短髮就型好多，不過佢要就番套劇造型就冇計啦！」

簡單飄逸
陳法拉/Giorgio Armani/周大福480萬首飾
「顏色簡單，清新飄逸。佢唔係成日着得靚，今次揀衫揀啱咗好match佢！」

造型簡潔
「我見過件真衫，Linda着得好高貴，佢好醒目，唔會好大抽珠寶，個髮型又簡潔，成個造型好match！」

大紅搶眼
「呢件係我設計，其實原先有件黑色好過呢件o架，勁啱，但係佢經理人話佢唔鍾意黑色喎！佢自己又鍾意紅，其實有時唔使太多珠寶o架，最緊要精！」

噴火華頒獎畀自己
黃日華早前喺微博炮轟無綫打壓佢套《刑警》，仲話無綫totally very bad，雖然無綫安撫佢等佢入「最佳男主角」五強，不過華哥依然企硬唔去。仲喺《荃加褔祿壽演唱會》後台同本刊記者繼續噴火，佢話：「其實胡定欣、王浩信都做得好努力，不過我知佢哋唔會有獎！」雖然兩位都被華哥講中冇獎拎，不過華哥翌日即喺微博自我頒獎，除表揚兩位外，仲讚自己套劇「輸了全世界，贏盡天下心」喎！


真情流露
阿佘攞完獎入後台做訪問，咁啱公布「我最喜愛的電視男角色」，佢邊睇電視邊大叫阿Mo，點知個獎畀咗林峯，阿佘唔理有記者在場即O嘴，仲大叫：「吓？」即時反應冇得呃！


林峯特別從馬來西亞回港參加頒獎禮，結果連奪兩獎，賽後同成班fans開香檳慶祝，唔理公信，high咗先算！


呢個獎（專業表現）都好呀！(真實對白)


頒獎禮一到廣告，眾花旦即狂補妝，獎可以輸，但上鏡個樣一定要靚。


明撐陳豪
當大會宣布「我最喜愛的電視男角色」，阿佘急步走上大電視前一心見證阿Mo攞獎，點知俾林峯冷馬跑出。


補飛餵林峯
阿佘雖然見自己心水嘅陳豪失獎，但到完騷即主動上前餵林峯飲香檳，阿佘果然係世界女！







Bad



著名時裝設計師Walter Ma



Good


Bad


Good


Good


Good



我知佢哋唔會有獎！(真實對白)

arrow
arrow
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄