近日在北京與鞏俐趕拍電影《我知女人心》的劉德華，今年九月便屆四十九歲，雖然外形keep得到，但老花問題卻無可避免。三星期前，劉華秘密由北京返港，由眼科大國手林順潮操刀，接受激光手術治療老花，手術後的劉華火速復元，並即趕返北京，繼續電影拍攝工作，睇劇本亦唔再矇查查。
等唔切
一直長留北京兩個多月趕拍電影的劉德華，早前忽然離組返港，秘密進行激光手術治療老花。
「激光手術醫老花，都係近月先研究成功，呢種手術並未普及，我哋都覺得華仔好勇，唔遲啲等啲技術成熟啲先做。不過，佢好有信心，覺得做任何手術都有風險，而且有老花睇嘢好唔方便，所以佢唔想拖。」華仔身邊人說。
今次替劉華做眼部激光手術的林順潮醫生，曾當選為港區全國人大代表，有傳他曾替郭晶晶治療眼疾，城中富豪李嘉誠，捐錢在汕頭興建國際眼科中心，亦邀他擔任院長。十二年前，林順潮亦曾以激光手術幫華仔根治散光及近視，二人更因此成為好友。
電腦控制
「華仔好信林醫生，其實激光矯正老花手術嘅研究一成功，林醫生已經同華仔聯絡，同佢講解過治療程序同風險，由於整個手術係由電腦控制，手術進行期間一旦出現問題，電腦就會中止手術，對眼睛不會有大影響。華仔早期就決定咗，只要手術有成功病例，佢就會盡快接受手術！」
早於九八年初，劉德華接受激光矯正散光及近視，當時亦屬首批接受新技術治療的病人，有過上次的經驗，劉華毫不緊張，手術前一天，他仍在北京趕戲，動手術當日才乘早機返港。
「其實喺幾年前，華仔已經有老花出現，睇劇本都唔係咁方便，所以佢想速戰速決，手術後佢都有按醫生指示食止痛藥，但休息一晚已經無事，兩日後就返北京繼續拍戲！」劉華身邊人說。
15秒治老花
全港約有四成人口患有「老花」，現時亦有多種方法可矯正「老花」，當中包括近年最新研發的「飛秒激光」，只須15秒便可矯正「老花」，做法是將激光打入眼角膜，矯正眼角膜的弧度。數小時後便可恢復視力，過程不會留有傷口，但手術完成後一個月，夜視能力會較差，而且方法較新，長遠功效未能保證，每隻眼費用為$15,000至$18,000。第二種方法為換人工晶體，分多焦距及變焦距兩種，可同時改善遠視、近視和散光，多焦距可醫治較高度數的老花，但缺點是可能會出現眩光或疊影，而變焦距則只能矯正較淺的老花，每隻眼手術費為$22,000至$28,000。
睇到嘞！（設計對白）
中大眼科教授林順潮，兩度幫劉華以激光治好散光及老花。
上週日（七月廿二日），劉德華出席完新城音樂會後，在後台接受訪問時，雙眼亦顯得有點疲倦。
因為經常跳水，令眼睛不斷受衝擊而視網膜脫落的郭晶晶，有指亦找林順潮醫治眼疾。
兩個多月來留在北京拍電影《我知女人心》的劉德華，早前秘密返港做眼部手術。
未做激光手術醫老花，劉華不時戴上眼鏡。
劉華幾年前已出現老花現象，近距離睇嘢唔清楚。
李嘉誠捐出一千多萬幫助國內失明人士，在汕頭興建眼科醫院，亦找林順潮任院長。（《蘋果日報》圖片）
前廣播處長張敏儀亦是九八年首批人士以激光矯正近視。（《蘋果日報》圖片）
留言列表
