三年抱兩一腳踢　栢芝拍拖睇脊醫壹週刊 1068期－娛樂八掛大分享☆

○六年下嫁謝霆鋒後，張栢芝三年抱兩，先後誕下兩子Lucas（謝振軒）及Quintus，親力親為照顧兒子與老公，做全職媽咪。老公霆鋒出外搏殺賺錢養家，栢芝湊仔比拍戲更忙碌，愛下廚的她又不依賴工人，買餸煮飯一腳踢；加上Lucas喜歡扭抱，栢芝亦曾因長期抱B，令手腕關節痛。
今年五月榮升第二任媽咪後，栢芝更一直腰骨痛，近日更孖埋霆鋒睇脊醫。上星期，兩公婆拍拖到天后覆診，栢芝全程由體貼霆鋒扶住。

心急減肥
剛過了三十歲生日，已為兩任媽咪的栢芝五月誕下細仔Quintus，揚言繼續生，追女追龍鳳胎。肚皮三年冇休息，生兩胎都是剖腹，大傷元氣，加上佗B暴脹，本身屬細粒形的栢芝，在懷孕時腰骨受壓，生完Quintus後，持續腰痛。
「栢芝好在意自己嘅儀容，又鍾意做運動，生完Lucas之後好快keep番fit。因為應承咗年尾或出年初拍爾冬陞部新戲，佢諗住坐完月就狂做運動減肥，點知休息咗一輪，條腰骨依然好痛，連運動都做唔到。霆鋒驚佢腰骨有事，所以帶咗佢去平時自己睇開嘅脊醫度睇。」栢芝的身邊好友說。

上齊架生
上週四（八月十九日），準備翌日陪老公到山東濟南拍古裝劇《劍俠情緣》的栢芝，中午十二時許，由霆鋒扶住到位於天后的植氏中醫，上樓睇醫生前，兩公婆先到附近買腸粉醫肚。個多小時後，二人手拖手步出，乘保母車返回暫時租住的四季酒店，落車時，栢芝按着腰骨，霆鋒輕輕以手傍住老婆一齊上樓。
據知，栢芝的腰骨痛，是因生產時受了風寒，除了食中藥，還要進行針灸，目前情況已有所改善。翌日（二十日）早上九時許，栢芝離開四季酒店到機場，陪老公到濟南開工。明知拍劇地點荒蕪，冇啖好食，栢芝帶了十篋行李同行，其中包括白米、冬菇、鵝肝、髮菜、蠔豉等不同食材，連煮食用品電飯煲同電爐都帶齊晒，準備隨時煲靚湯給老公補身。

私家靚湯
到埗後，栢芝即急不及待玩煮飯仔，到拍攝場地附近的菜市場買魚買海鮮，親手炮製大餐，更邀請同在當地趕戲的蔡卓妍（阿Sa）和關智斌齊齊開餐，阿Sa事後在微博上說：「阿嫂煮大餐，只用一個半小時就煮了中國、法國、韓國、印度、意大利菜，真是一個好老婆！」霆鋒助手「表哥」亦留言：「呢個香港大廚，有錢請唔到，只有謝霆鋒才可！」
栢芝樂做跟得夫人，照顧Lucas與Quintus的重任，便落在嫲嫲拉姑身上。栢芝在濟南煮九大簋慰夫，拉姑上週五為細孫Quintus於灣仔富豪飯堂福臨門擺百日宴。
晚上七時許，Lucas與肥嘟嘟「壽星細佬」分別由傭人抱到場，心情靚爆的拉姑笑晒；未幾，賓客姜大偉、李琳琳夫婦、曹永廉一家三口與陳淑芬等陸續到場，還有姑姐婷婷。食完飯，Quintus由拉姑及鬍鬚Kong做左右護法，護送返酒店。

星級名醫
霆鋒同栢芝幫襯中醫植國滿，醫館位於天后，主治脊椎神經推拿，並配合針灸及中藥治療，每次診金八百元起，當中更有不少大明星捧場客，包括郭富城、關之琳、梁朝偉、周潤發、鄭伊健及陳奕迅等，早前更有指楊千嬅找他治理頭痛兼調理身體，做好準備為老公丁子高生仔。

女人最痛
女人生BB過程被評定為第十級痛楚，但生完BB，做媽咪的還要經歷許多不同的痛。

手痛
張學友曾表示老婆羅美薇鍾意親自照顧女兒，甚少依靠工人，因為經常抱女，導致手臂同手腕腫痛，擔心老婆患上類風濕關節炎。

胸痛
08年替方中信誕下女兒的莫可欣認為生仔過程絕非最痛，反而在餵哺母乳時谷奶最痛苦，「我頭兩天谷得好辛苦，胸很脹很痛，直情痛到喊！」

抑鬱症
02年女星陳寶蓮懷疑因為患有產後抑鬱，在兒子剛剛滿月，於上海寓所仰藥割脈後跳樓自殺身亡。

1:40pm
因腰痛不能做運動，產後三個月的栢芝焗住無得「收肚」，肚凸凸睇完醫生同老公坐保母車返四季酒店。