陳豪“我從不爭獎”
Moses Chan湖水藍大褸$21,000 Burberry Prorsum啡色織圓點圖案冷衫（未定價） Versace
利益申報，小記不算是陳豪超級粉絲，然而，訪問當日，卻不時有同事扮巧合以途經影樓為名，追星為實，連公司最宅的女同事，一樣忍唔住探頭遠眺，「筍盤」威力，唔講得笑。
客觀睇，眼前陳生條件有三高，身高、學歷高加埋收入高，尤其最後一項；今年未埋尾，收入已逾千萬，原來，早已運籌帷幄。
自信心，點會唔爆棚？
面對爭崩頭的視帝之位，清高地拋下一句「我從不爭獎」，然後繼續大談其咖啡夢。
梗係，計我話，搵真銀幾時都比爭虛銜實際，咪你以為「吸金王」是浪得虛名？
Profile
Moses Chan
出生日期： 1971年 4月 16日（白羊座）
出生地：香港
身高： 6呎
體重： 180磅
語言：廣東話、普通話及英語。
學歷：澳洲讀大學主修會計
簡歷：澳洲讀書時兼職模特兒，後返港拍第一套電影《晚九朝五》。 00年，簽許愿為經理人並加入 TVB。 02年，獲得《萬千星輝賀台慶》「飛躍進步男藝員」獎。 07年，再奪「我最喜愛的電視男角色」及「最佳男主角」兩獎。
主要作品：電視劇，《妙手仁心 II》（ 00），《洛神》（ 02），《金枝慾孽》（ 04），《火舞黃沙》（ 06），《溏心風暴》（ 07），《珠光寶氣》（ 08），《公主嫁到》（ 10），《點解阿 Sir係阿 Sir》、《天與地》（ 11）。電影，《晚九朝五》（ 94），《玉女添丁》（ 01）。
官方網頁： http://www.moseschanho.com/
77年幼稚園畢業戴四方帽，已經是迷你筍盤。
02年Moses話以前拍電影做慣奸角，《特警新人類》是其中之一。
11年向阿婆推銷寬頻的廣告深入民心，吸金王魅力過人。《壹週刊》圖片
11年跟女友拍住拖搵錢，工作得份外醒神又甜蜜。《蘋果日報》圖片
開鋪只係踏腳石
Moses Chan鮮橙色羊毛大褸$38,180 Bottega Veneta藍色織花樽領冷衫$8,100黑色車褶皮褲$50,400both Versace黑色拉鏈短筒皮靴$7,200 Burberry Prorsum
打開電視，上網、入油、賣月餅、信用卡，甚至護膚都關陳豪事。客戶話，他形象正派，每次出席活動又笑面迎人，有求必應，昂藏六呎，廣告商也樂叫甜心。
有八卦雜誌為其計數，今年，已穩袋千萬，包括活動出席費 12萬、孖住女友陳茵媺，動輒 20萬、廣告百萬……收入是前年加去年的總和。
我壞心腸，發憤搵錢唔通為證當日拜金女揀錯郎？
「只係希望生活日趨穩定。
「以前都會 plan工作大計，依家隨遇而安。
「夢想唔使靠拍戲維生。」有家底，零舍口響。
今年頭，遠赴馬來西亞為自家咖啡店剪綵，副業起步，據聞，這個低調老闆已經有收成，事業版圖向外擴張，又點止賣咖啡咁簡單？
「開鋪只是其中一 part，我當係 side business、絆腳石（？）我仲有好多夢想，跟咖啡有關。」絆腳石？原來他指踏腳石。
這又讓我記起上次陳茵媺的金句，「熱情= funny？」，真係夾！
唔可以齋做戲
Moses Chan紫紅色間棉外套$5,400 MCM淡粉紅色恤衫$4,100杏色 mohair長袖冷衫$5,500 both Gucci黑色車褶皮褲$50,400 Versace
頒獎禮就到，他事先表明將會缺席。今年得一套劇上榜，難怪信心一般，反而，睇好老友鄭嘉穎。
「以前，一心想由奸角演至忠角，最後當上主角，一步步向前走，現在，不再追求特定角色，而是想將每一個角色的內心世界及神髓演出來。
「每個演員的表演方法都不同，有人着重 technical，有人追求自然，我就想自己把聲、表情更加夠戲。
「我從來唔係想得獎、或引人注意，只想作品讓人嗒落有味。」
照咁講，他已算成功，新劇不止帶來最高收視 38點，還連續幾星期掀起師奶討論。
「演員最好能夠牽動觀眾喜怒哀樂，齋做場戲冇意思。」
考慮往大銀幕發展？
「遇到好劇本再講啦！我唔想只拍一、兩部就收貨，而是十、二十部，一直拍下去……」
我係減肥專家
Moses Chan芥辣黃色茄士咩孖襟外套$19,580芥辣黃色樽領羊毛冷衫$5,480both Bottega Veneta黑色車褶皮褲$50,400 Versace黑色拉鏈短筒皮靴$7,200 Burberry Prorsum
一向 fit爆見稱的 Moses，恕我待人以嚴，今日所見，脹爆多過 fit爆。
難得他仍然很自豪，「你問啱人，我係一個 keep fit專家（！），已經試過所有減肥方法。」身旁已算瘦的攝影師，聽到雙眼發光，愈坐愈埋，豎起耳仔。
「我的體重上落好快，衣櫃裡，有齊中、大及加大碼衣服。
「為拍戲，可以一口氣減 50磅，三星期內，腰圍由 34吋減到 28吋。」
入正題，到底哪一種方法最有效？
「食之前，了解食物屬性，蛋白質、碳水化合物、飽和脂肪和不飽和脂肪等含量，各種食物所得的營養都不同。
「很多人只看卡路里，我則看脂肪含量，盡可能選擇 0%脂肪食物，頂多接受 1-2%。
「食量多少，直接跟肚腩大小有關，每餐最多六至七分飽，絕對唔可以十成飽，現代人吃過量， 120%-150%……甚至 200%。
「食飯時間也很重要， 9點後避免進食，肚餓的話，只飲水。」
嚴格程度，好比軍訓，想瘦，不能懶，男女皆同。
Moses's tips
Q：買衫心得？
A：第一睇 cutting，再搵朋友俾意見；第二睇布料，靚布值得貴少少。
Q：最欣賞的女性打扮？
A：露出些少膊頭，已經好有女人味，唔使暴露。
後記
Moses Chan綠白色菱格 V領冷衫$5,000杏色斜布長褲$5,300both Valentino泥黃色併酒紅色樽領冷衫$5,480 Bottega Veneta
樂小姐講過，咖啡是陳豪的命根。
今次訪問，他攰得要命，勉強撐起紅筋滿佈的雙眼，強裝精神，這狀態，咖啡也難救。
時間有限，搵錢無限，因住捱壞身體，師奶心痛。
Shop List
Bottega Veneta中環置地廣場 G6-7號鋪 2973 0882
Burberry中環國際金融中心 2050-2052號鋪 2234 7170
Gucci中環置地廣場 G23-30號鋪 2524 4492
MCM尖沙咀海港城港威商場 2228號鋪 3101 0306
Valentino中環置地廣場 B57-58號鋪 2530 2621
Versace中環國際金融中心 2053號鋪 2234 7626
留言列表
