30/4陪妻鬆一鬆
李琳琳自患上大腸癌後，已甚少外出。上周六（ 4月 30日）由於天氣轉晴，姜大偉駕車陪太太李琳琳到中環鬆一鬆，雖然李琳琳精神不俗，但不時需繑着老公手臂借力。
63歲的姜大偉和 62歲的李琳琳結婚 37年，是圈中的模範夫婦。自從 08年姜大偉做第二次通波仔手術，兩夫婦明白健康的重要性，開始年年驗身。可惜去年年尾，李琳琳驗身時發現自己患上大腸癌。由於姜大偉的父親因患肝癌去世，所以他特別憂心。
牽掛 15歲細仔
「 John哥（姜大偉）同琳琳姐怕朋友擔心，一直好保密，做手術都冇話俾我哋知。農曆新年大家見面，佢提我哋要小心身體，之後先講自己有病，令我哋都好愕然。我哋班朋友又介紹中醫，又幫佢搵抗癌秘方，不過佢話 John哥已經搵咗好出名嘅腫瘤科名醫張明智俾佢，叫我哋唔使擔心。近期佢嘅癌細胞已擴散至淋巴，做緊化療去控制。由於佢好相信個醫生，所以冇再試其他方法。琳琳姐好樂觀，唯一牽掛係個細仔，個仔始終得 15歲。佢個大女（曹永廉老婆姜依蘭） 6月就生第二胎，琳琳姐好想見個孫出世，仲計劃幫個女搞坐月嘅嘢。」知情人士說。
雖然李琳琳早年買落一份醫療保險，但由於今次醫藥費甚巨，要自己墊支不少，加上細仔卓文才 15歲，家庭開支不少。為了幫補醫藥費，向來不想與家人分開的姜大偉，竟連續接了兩部大陸劇， 3月尾在內地拍完 20集民初劇《藏心術》， 6月又會再到橫店，與鍾漢良拍 35集的《天涯明月刀》。事關他在 TVB拍劇每集只有 4萬，但到內地則有 10萬一集，兩套劇加埋折合有 660萬港元收入，幫補不少。
姜大偉趁近月在港，即全天候陪伴李琳琳治療及休養。上月 21日，李琳琳在九龍法國醫院進行化療。當日 11時多，姜大偉便從何文田家，到九龍城的大婆牛肉麵買外賣，然後拎到醫院開餐，逗留至傍晚才離去。翌日（ 22日） 11時左右，他又再到醫院陪老婆，直到下午 6時才離去，至晚上再折返接她出院。
名醫續命
李琳琳的主診醫生是臨床腫瘤科專科張明智，他從事腫瘤科已逾 20載。 04年他離開伊利沙伯醫院，在中環及旺角開設診所。他是城中低調名醫，以降低末期癌病病人的痛苦和增加存活率見稱。
他亦是音樂家，鋼琴及聲樂八級文憑，多次指揮香港大學及香港醫學會合唱團。去年他推出著作《變．驚．擁抱》，鼓勵大家用音樂治癌。另外，他的姊姊張明珠是王菀之媽媽的好友，與圈中人熟稔。去年，他有份到倫敦客串王菀之的音樂特輯。
患病易累天天臥牀
據悉，李琳琳現正接受為期半年的化療，一般癌症病人打完化療針，可以即日出院。但由於李琳琳體質較弱，醫生建議她每次都留院一晚接受觀察。她每 3星期到醫院打化療針及攞藥，每次拎 2星期藥，服完 2星期藥後，休息一星期，然後再重複以上療程。
姜大偉性格外向，喜歡跑步和打高爾夫球，但現在也甚少獨自出外，整天陪伴老婆。李琳琳向友人透露，患病後容易疲倦，她笑說：「我喺牀上睇電視，喺牀度上網玩數獨遊戲，唔係食飯同出街，我就唔起身。」
從前她不吃生果，反而可樂就一箱箱地買，她和 15歲的細仔卓文都是早晚各飲一罐。現在她才知這種飲食習慣，傷害了身體。但做化療期間，不宜吃中藥，尤其是她患大腸癌，姜大偉更要她吃得清淡。
多謝老公貼身照顧
「琳琳姐話做化療之後，成日覺得口淡淡、口苦苦，但又冇乜胃口。佢最感恩係冇甩頭髮，但最慘係會身痕，令佢好煩躁，所以佢好多謝 John哥體諒同貼身照顧。」知情人再說。
事實上，為了李琳琳開心，上月 30日，姜大偉特別陪她到中環麥奀記歎雲吞麵。但食完後二人又速速歸家，看來是怕她疲累之故，非常體貼。姜大偉與李琳琳結婚多年，二人十分恩愛，姜大偉婚後唯一的緋聞，是 94年回流拍無綫劇《再見亦是老婆》時，被傳與飾演其情婦的周嘉玲撻着。當時身在加國的李琳琳隨即回港實老公，當時二人育有兩女，但她知姜大偉一向恨仔，所以在意外懷孕後，不惜以 47歲高齡，冒險為他誕下幼子卓文，令姜大偉十分感動。
李琳琳曾說：「我們就算相隔兩地，都會用電話、電郵、短訊同視象對話來溝通，見面又會整對方鍾意食嘅嘢，或者煲湯俾對方飲，嗰啲湯會特別香甜。」姜大偉亦自爆：「我哋結婚 30多年，每天都同太太通電話 1、 2次，到依家已經講咗過萬次電話喇。」非常甜蜜。
演藝世家
姜大偉出身於演藝世家，兄長為秦沛，而父親嚴化（姜克琪）及母親紅薇（羅珍）均為著名演員，後來母親改嫁製片人爾光，並誕下爾冬陞。姜大偉四歲已做童星，中學畢業後加入邵氏，被名導演張徹力捧，在電影《游俠兒》首度擔當男主角。 1970年他更憑《報仇》成為香港首位榮獲《亞洲影展》「最佳男主角」的演員，紅極一時。
而李琳琳在 60年代，被其京劇師父粉菊花推薦加入邵氏，亦曾是國泰訓練班的花旦。 70年代加入無綫已是女主角，演出多套經典劇集如《小李飛刀》、《楊門女將》等。同期李琳琳和姜大偉相戀，即共賦同居。 73年分手， 7個月後復合，隨即奉子成婚。巧合地，長女依蘭與曹永廉於 07年也是奉子成婚。
腸癌女性殺手
腸癌是香港女性第二號殺手，第 1位是乳癌，全港去年便有 4,600宗新症。據外科專科醫生朱建華表示，腸癌主要成因有兩個，包括基因變化同遺傳因素，而年齡越大，會提高了基因變化速度。其次，環境因素如患者多食紅肉、醃製肉、飲酒及食煙，亦大大增加患腸癌風險。
腸癌分四期，第一、二期主要靠做手術和食藥醫治，康復機會有 8至 9成。到第三期，淋巴核已受癌細胞侵襲，需配合化療醫治，而療程多數為期半年，只得一半康復機會。去到末期，癌細胞已擴散，有機會影響肺和肝，只可用化療延長壽命。
其實腸癌可以預防，減少食紅肉、不煙不酒， 50歲的人士宜每 5年做一次腸道檢查，私家醫生收費約 5千至 1萬不等。
姜大偉：年紀大梗有毛病
本周三（ 4日），本刊致電姜大偉關心及問候其愛妻患癌一事，但他不停強調冇事，記者當然明白其苦心。
記者：記 姜大偉：姜
記：聽講琳琳姐唔舒服，有人見佢出入九龍法國醫院喎？
姜：（語帶猶豫）唔……人年紀大梗有毛病 o架啦！
記：依家情況點呀？令關心佢嘅人擔心喎。
姜：之前佢身體有毛病，覺得唔妥，去做驗查啫。
記：佢現況點呀？
姜：佢好好，冇乜事，多謝關心。
記：聽講佢患大腸癌，仲擴散到淋巴？
姜：佢……佢做身體檢查啫。
記：會唔會擔心佢病情呀？
姜：冇事。有心！我有電話入，拜拜。
曹永廉：你問番 John哥
之後記者去電視城求證女婿曹永廉，但他同樣封嘴。
記者：記 曹永廉：曹
記：最近琳琳姐出入法國醫院？
曹：去驗身之嘛。
記：有傳佢患腸癌，仲擴散咗去淋巴？
曹：（口窒）冇冇……冇事，佢去驗身咋。
記： John哥好擔心佢，陪佢出入醫院。
曹：（忽然高音） um……唔係呀，佢平時都係去驗身之嘛！
記：佢係咪有啲唔舒服先去檢查？
曹：（語帶猶豫） um……實際情況我就唔清楚，你問番 John哥啦！我都…… um……以我所知都冇咩特別。
記：咁你呢期有無陪多啲琳琳姐呀？
曹：我哋個個禮拜都有見。
記：咁老婆有無煲湯水俾佢呀？
曹：佢有工人嘅！
自從李琳琳患病後，姜大偉、女兒及女婿曹永廉均經常鼓勵她保持樂觀，不時陪伴左右，而細仔姜卓文本打算今年 9月回加拿大升學，但現正考慮打消念頭，陪媽咪抗癌。有家人的支持，祝願琳琳姐早日戰勝癌魔！
親友封嘴
對於李琳琳的病情，她的大伯秦沛、女婿曹永廉及一眾好友都十分口密，齊齊封嘴拒多講。
留言列表
