患有社交焦慮症，怕人多的 陳奕迅見粉絲咁熱情，即刻行近揮手講拜拜，但就唔敢行入人堆握手，而身旁的蘇永康則一臉擔心。
自爆躁鬱症 陳奕迅 患人群恐懼 暴肥 Eason：我入咗個奇怪世界
今年陳奕迅紅館騷唱足 1個月，連加 4次開足 25場威到盡，更淨袋 3,750萬歌酬， 39歲有家庭有事業，本來非常美滿；可惜捱咗十幾年，唔只身體多傷患，心理亦有問題。
本月 17號晚， 陳奕迅在第 11場個唱表現恍惚，對住過萬粉絲自爆患有躁鬱症及人群恐懼症，演出期間更突然靈魂出竅， Eason在台上剖白︰「我頭先入咗個奇怪世界，完全唔記得你哋喺度，其實你哋係咪喺度呢？」兩種情緒病打孖嚟，據聞令一向大癲大肺的 Eason飽受困擾，日常生活亦受影響，要長期覆診控制病情。
情緒病可大可小，陳奕迅囡細老婆嫩，一定要乖乖哋食藥喇！
經常周圍飛開工的陳奕迅，近年做到冇停手，除了密密接廣告，又要巡迴演唱，早前更以 800萬人仔擔任內地歌唱節目《中國最強音》，與章子怡等人做評判，要定期飛北京錄影，相當頻撲。
愁爆
完騷後， Eason同粉絲揮手道別，阿徐就抱攰爆康堤上車等，阿徐仲等到托晒腮發呆，冇乜耐性！
認有情緒病
老豆撐場
Eason父親陳裘大亦有到紅館捧場，離開時更有後生女陪住走。
忙到冇氣唞兼要擔起成頭家， Eason近年身體開始出現問題。體重高達 188磅，冇時間 keep的 Eason周身病痛，唱完第 4場後因偷食 20粒蒟蒻搞到胃脹，要漏夜入院「洩氣」；另外左腳十字韌帶曾斷裂，又要在膝蓋抽番 20毫升水消腫；到第 9場更出現聲沙氣咳，令在場粉絲非常擔心，阿徐出席活動時亦說︰「我入後台支持佢，佢病得較嚴重，所以夜晚我同個女瞓。」
咳兩聲屬小事，最令人憂慮的原來是 Eason的情緒問題。 17號當晚， Eason在尾段唱〈時代曲〉前，忽然有感而發，向觀眾不停 say sorry，仲自爆患上躁鬱症及社交焦慮，「有啲情緒病應該係……我愈來愈怕見到好多人，我講真，我有人群恐懼症，真係唔係講笑……我有少少嗰啲叫『 bipolar』（躁鬱症）……我頭先入咗個奇怪世界，完全唔記得你哋喺度，其實你哋係咪喺度呢？」
講病情講足 5分鐘，最初粉絲以為搞 gag，後來見 Eason愈講愈認真，於是不斷叫「加油」，雖然眼濕濕的 Eason，沒有透露是否治療中或已經康復，但最後亦承諾會繼續努力生活。
陳家瑛出招
上週六是 Eason 39歲生日，晚晚現身撐老公的徐濠縈，這晚與臣媽一齊入後台，希望精神上支持 Eason。據知這次開騷， Eason相比以往文靜得多，除了希望養聲之外， Eason似乎不太想與人接觸和說話。
知情人士說︰「其實 Eason今次都好辛苦，唱歌最慘就係咳，佢都好𤷪！先係個胃、之後到左腳舊患，第 9場開始感冒。每晚入到後台準備時， Eason好多時都自己一個坐低對住塊鏡，唔多說話。為搞㷫 Eason， 27號（上週六）嗰晚，陳家瑛 call晒班兄弟姊妹嚟紅館幫 Eason慶祝生日，佢嗰晚真係好感動，好耐冇見佢喊。」當晚完騷之後，阿徐和奶奶先行上保母車等 Eason，但兩人在車上一臉愁容，似乎很擔心 Eason的心理質素。
阿倫曾透露病情
中醫補身
捱到殘晒， Eason定期都會睇中醫調理身體。
其實早在 09年，譚詠麟已向傳媒透露 Eason曾經有抑鬱，當時校長說︰「有次 Eason助手話佢喺車入面好 upset，因為太多工作，後尾我話每個人都有唔同階段，𠵱家係搏殺期唔好呻。我係搭訕王，佢係吹神，大家傾吓偈抑鬱就散晒！」而大 S徐熙媛亦曾自爆患上躁鬱症，而且病情嚴重，發病時曾想殺死阿媽，又在房間藏了兩把菜刀，極之恐怖！此言論一出，竟被台傳媒炮轟教壞細路。
其實藝人工作量大，容易有壓力而誘發情緒病，不過只要 Eason定時食藥，又肯繼續「吹神」上身搵朋友傾偈，相信好快會好番！
5分鐘台上剖白
不斷道歉
Sorry，真心 sorry。好奇怪呢啲嘢，有啲情緒病應該係，做呢行都應該有嘅，真係好衰囉，真係唔好意思。
Eason講起自己有病時神色凝重，又不斷低頭沉思，病情似乎唔輕。
最衰一日
你哋係咪有啲識咗我十幾年㗎喇？都未見到我最衰嗰啲，唱又唱得衰，即係盡咗力喇，真係未試過，覺得今日係我人生最衰嘅一日，係咪啊？你哋真係唔好彩，真係對你哋唔住，不如重頭嚟過？真係點樣做呢，真係豈有此理吖。
人群恐懼
我真係好想如果唔介意嘅分享吓喇，我愈來愈怕見到好多人，我講真，我有人群恐懼症，真係唔係講笑，我唔知大家有無？我講真，今日好認真，特別認真，過分地認真，好奇怪，我有少少嗰啲叫咩「 bipolar」，通常嗰啲聽我歌嘅人都比較有啲學識嘅，即係兩極嗰啲呢，即係唔係「攣」就直嗰啲，我頭先唔知入咗個奇怪世界裏面，唔好意思要大家同我一齊分享，我入咗一個我完全唔記得咗你哋喺度，其實你哋係咪係度呢？
自我封閉
我頭先唔知點解忽然之間自己封閉咗自己，你見唔見我自己，我冇望過你哋，我係一個想令大家開心嘅人，識我啲朋友都知，唔知點解，硬係十下裏面有一下呢就會啊，都唔知今日你哋好彩定唔好彩，見到我好真嗰個（人），通常慣咗喺舞台上面呢始終都有塊膜嘅，即係點都會避忌吓，大庭廣眾，我今日覺得大家好似好 friend咁，希望大家聽日唔好怪我，（加油呀！），多謝你，我會努力，一直都加油。
脹爆
體重高達 188磅，肚腩脹爆，但 Eason拒絕減肥，開騷期間照隊燒鵝瀨。
有粉絲睇咗 17號嗰場，之後即刻上網表示好擔心 Eason。
興奮攬老婆
Eason喺後台 high爆，攬實阿徐合照，不過佢對手摸住老婆個肚，會唔會暗示又做老豆？
老友輪流陪
霆鋒、何超儀及房祖名等人，專誠趕去紅館同 Eason過 39歲生日。
Eason公開的 Instagram戶口中， follow了容祖兒、陳冠希等四十多人。
閒人冇得睇
擁有兩個 Instagram戶口，「 easonchanys」屬公開，粉絲可任睇演唱會後台情況，而「 MREASONCHAN」係 Eason私人戶口，係 friend先入到！
去年 Eason要坐住輪椅綵排中央電視台的春節晚會。
曾繁光：建議終生食藥
精神科醫生
曾繁光
Eason話自己有「人群恐懼症」同「 bipolar」，據精神科醫生曾繁光指出， Eason應該係患有「社交焦慮」及「躁鬱症」，「社交焦慮係指患者唔鍾意被注視，去到人多嘅地方會不安、作嘔，甚至覺得自己會死！佢哋會選擇唔出街唔見人。而躁鬱亦叫『雙相情緒障礙』，躁嘅時候情緒會極度高漲，好𤷪，唔使休息但精力充沛，又會覺得自己好叻，所以有時會魯莽做出不負責任行為，有啲人會性慾高漲變得濫交；至於鬱嘅時候情緒變得低落，睇所有事都負面！」
兩種病一旦發作，曾醫生建議終生食藥，「病人要食情緒穩定劑，最好長期食，因為一停藥好易翻發！其實呢個病係天生，壓力只係誘因，而且心理治療嘅效果唔大，一定要食藥。」
留言列表
