「活在當下，樂在其中。」兩個多月前，黃智賢在訪問中曾跟我這樣道。

是的，上天既然給予每個人不同的特質和際遇，便應該安分守己，好好的利用，好好的活，從中自會找到樂趣，接着亦自會遇到一切更美好的。

正如麥包麥長青，要不是他擁有一個大肚腩身形，以及樸實無華的親和力，大概便不會在電影《喜上加囍》中，演到有破壞冇建設、傻更更的「三叔」角色；也不會被安排主持《新春自家菜》，跟印度人家庭邊吃邊談談過年習俗；而我，也不會相約他在平民百姓最愛光顧的冰室拍照做訪問。

「我想要嘅嘢好簡單o架咋！」坐在卡位中的麥包，挨着牆，一手靠在椅背，一手靠在枱面，一邊大髀也放到椅子上如是說。「我唔需要住豪宅、揸法拉利，又唔講究名牌，總之繼續有工開，搵到食，有層樓，爸爸媽媽、兩個小朋友生活到，一年可以成家人去到一次旅行，咁就夠o架啦！雖然依家我都未達到呢個目標，但都已經好開心、好滿足o架啦！」

沒錯！現實中的「非凡哥」，對生活的要求，就是平凡得如普羅大眾打工仔的一樣，不同之處，是他現在所擁有的，可能比你我他更得來不易，所以，在整個訪問中，他至少多謝了二、三十個台前幕後，人名不盡列了，反正令我感受最深的，是知足便會常樂，生活簡單，還懂得感恩，就是福。

多把刀

對麥長青來說，一○年《巾幗梟雄之義海豪情》中的「非凡哥」一角，的確是他演藝事業上的里程碑，繼前年憑此在無綫成為「最佳男配角」後，去年年尾，又摘下了在新加坡舉行的《第16屆亞洲電視大獎2011》「最佳男配角」獎項。

「能夠攞到呢個亞洲區嘅電視大獎，我覺得好榮幸同幸運o架！因為呢個獎啲評判，有泰國人、印度人、中、日、韓，全部都係亞洲區啲資深業內人士，佢哋唔會識我，評審時都只係每套提名電視劇揀一集嚟睇，所以當我知道自己可以入到五強時，我真係覺得好愕然，我嗰陣拍緊《喜上加囍》，我就同劇組、同（曾）志偉請假，我話，我好想去呢個頒獎禮，因為我唔知我呢世人仲有冇下一次參加呢啲盛典嘅機會，好想過去見識吓，睇吓呢個世界，好彩佢哋最後都肯放人！」

多了「最佳男配角」這個名銜後，這年來可有名利雙收？「上年，好多傳媒都問我，點解攞咗獎之後，冇繼續『嘭嘭』聲谷行個勢，反而仲靜咗落嚟，其實我一直都拍緊劇，只係未推出啫。而且我攞咗獎之後，我出面啲工作都多咗好多，我啲監製朋友都同我講，以後佢哋同外面啲人sell我時，會幫我加多個『最佳男配角』嘅朵，有個獎，我叫做多把刀啦！哈哈哈！」

九大

麥包十四、五歲就讀中四時，在老師鼓勵下，參加當年的「超級新星」大賽，輟學讀藝訓班而入行。「我嗰陣只係鍾意睇戲，從來冇諗過做戲。TVB當年搞呢個比賽，我學校（陳樹渠紀念中學）有好多同學都參加，有位好好嘅老師見我個人咁冇自信，就鼓勵我去參賽，佢話個比賽可以令我見識多啲，學到好多嘢，雖然我最後只係入到初賽，但參加咗之後，我就覺得呢行都幾好，加上我唔識英文，我覺得讀書真係唔啱我，咁啱藝訓班開班，我就同媽咪講，我唔想讀書，想讀藝訓班。」

八七年藝訓畢業後，他先被安排到兒童組主持《閃電傳真機》，及後才開始拍劇生涯。「我離開兒童組時，本來諗住keep fit，但後來達哥吳孟達同我講：『我自己當年計過數，小生，一大班喺度，既然自己唔係最靚仔嗰個，做主角點都輪唔到自己，咁咪谷殘自己做人老竇囉！』加上咁啱公司又同一時間簽咗六、七個小生返嚟，我就諗，咁TVB仲有乜嘢character係少有嘅呢？我就揀咗做「波叔」（梁醒波），做肥仔、做醜生，結果嗰陣啲劇呢啲角色，就畀我接晒嚟做，我仲keep乜嘢fit呢？小生嗰圍枱，個個係咁爭緊食，醜角呢圍呢？九大簋擺晒喺度，冇人話食喎，咁我咪自己坐喺度慢慢食囉，但當然，我一個人係食唔晒嘅！」

然而，他卻沒有因此「愈食愈肥」。

又一村

麥包是個樂於安穩的人，如是者在TVB效力了廿多年，期間也有好幾個角色，曾令外界留意，可惜大都只是曇花一現。

「其實比起『非凡哥』，九九年《茶是故鄉濃》嘅『大水牛』，到我依家睇番，我都好鍾意！我有好多朋友識咗我之後，再睇番呢套劇，都話我呢個角色做得好！我嗰陣就諗：呢個角色個個都讚好喎，咁係咪時候上位呢？結果呢套劇出街之後嗰九個月，我冇嘢做，然後嗰兩、三年都喺啲劇度係『行行企企』！

「做咗咁多年，成日都好似一潭死水咁，浮浮沉沉，冇乜作為，又冇乜突破，好多時我都心淡o架！」

更令他難受的，是人工不高。「有段時間，我只係簽咗一年一個騷，靠出面幫人搞商場推廣、市場策劃賺錢維生，後尾我媽咪同細佬都入咗醫院，公司有幾位高層監製知道，就打畀我，叫我返TVB，佢哋話至少我有個最低保障，就係因為呢個恩，我續上一份約時，完全冇同公司傾，我同佢哋講，你哋想簽我幾多年、幾多錢，你哋話事啦，我要報恩呀！」

直至一○年「非凡哥」出現前，繼續「行行企企」的麥包已經意興闌珊，打算退出娛樂圈轉行。「我嗰陣真係諗住唔做o架啦！嗰陣喺香港想拍劇，只係得TVB，你話北上發展咩？可以北上發展嗰啲，都係喺TVB做起咗，先可以有呢啲機會，我又唔係呢啲，我只可以揀退出，但好得意嘅係，喺我真係想唔做時，就無端端有個獎畀我，我攞獎時，先明白個天係想話畀我知，我呢廿幾年嚟，我做嘅係有人認同、有成績o架！」

朋友運

結果，去年五月，麥包跟TVB續約了三年。「呢次係我真真正正坐低同公司傾續約，我同佢哋講，我都想睇吓呢三年，我繼續做呢行仲可唔可以養到自己、養得起頭家。好彩公司都有加人工畀我，加個percentage仲係雙位數字，可能我本身底薪低，所以我已經好滿意！」

更有幸的，是他在圈中廿多年人緣向來都很好。「Bowie（林保怡）嗰陣走時同我講笑咁講：『你望都望我走啦！我唔走，你邊有得上位呀？』我話：『唔係喎，不如你喺外面有乜角色啱我做就搵我啦，你可以抽番啲佣嘛！』哈哈哈！真係o架！阿（陳）浩民、（樊）少皇、（劉）凱威佢哋，依家個個喺出面都做緊主角，一見有啲乜嘢角色啱我做，都會搵我；同我一齊出身嘅一啲監製、導演，佢哋有好多都已經喺外面做到總監製、總導演，成日都會介紹我上去開工！

「外面啲老闆好簡單o架咋，佢哋要投資開戲，要主角都只會揀啲賣到埠、多人識嘅去做啦，佢哋唔會識我，但啲二、三線同配角角色，佢哋都只係畀晒監製、導演同其他演員搵人做，咁我有得做咪做囉！其實咁仲好，你叫我真係長駐喺上面開工，離開香港，我又唔想同我老婆分開，我又唔想成家人上晒去長住，依家我得閒就上去開一個月工，拍佢十集、八集，已經係喺TVB成年嘅人工！當然，最好之後每年都有一半時間喺上面開工，暑假留番喺香港陪細路，或者做吓香港嘅工作啦！不過，我依家都好滿足o架啦！」說罷，他露出一個很感激的笑容，眼眶開始泛淚。

畢竟，能夠來到今天，這條路，他足足走了廿四年。

二萬二

做娛樂圈易搵錢，的而且確只是純粹的表面風光，查實有更多並非一線的藝人，至今仍然像很多打工仔一樣要為口奔馳，手停口停。

就如麥包，即使在這行打滾了廿四個年頭，至今其實還沒有一個私人物業，而且生活擔子亦十分重。

「我依家一個人搵錢，七個半人食。我爸爸媽媽、兩個仔女、老婆，仲有姐姐（傭人），外母當半個計，因為我只係畀錢佢買嘢食。你諗吓？我上年未續約前份糧都未夠交租，你話我點cover？」

他現在租住深井碧堤半島一個千二呎單位，我問他月租大約多少，他想也不想便說：「二萬二！咁你諗吓份糧有幾多？哈哈哈！好彩，我太太一直以嚟肯跟我有粥食粥、有飯食飯，我從來唔會怨TVB人工低，因為係我自己心甘命抵，自己選擇，簽約時TVB冇攞住把槍叫你簽o架嘛！係咪先？哈哈哈！」

生活如斯逼人，我忽然很佩服麥包仍然懂得開懷。

arrow
arrow
    文章標籤
    tvb 配角 非凡 好多 小生 角色 多年 上加 外面 最佳
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacylife 發表在 痞客邦 留言(0) 人氣()

    E-mail轉寄