入行7年，30歲薛凱琪今年7月將殺入紅館舉行處女個唱，為咗今次演唱會，Fiona推咗4套電影同3套內地劇，誓要為紅館騷全力以赴。事業鬥心勁，不過據知最近薛凱琪亦為家事煩惱。現與母親居於自置的畢架山帝景峰的她，年半前雖經歷父母離異之變，但兩父女關係仍甚佳，不過去年卻驚聞生父薛偉豐心臟出現病變，需求名醫幫忙。
一向樂觀的薛凱琪，接受本刊訪問時，剖白已為家人戒肉4個月祈福，而醫藥費加上月供3層樓，她亦坦言：「負擔好重！」


4個月前，踏入30歲的Fiona開始戒掉紅肉，只食海鮮，到最近連海鮮都嘗試戒掉，跟緋聞男友方大同一樣茹素，Fiona說︰「係為咗父母健康，因為……正求醫中……想make個wish，（父母健康出現問題？）其中一個，唔想講太多影響他們。」據知，Fiona的父親薛偉豐近年心臟出現毛病，雖然父母早已分離，Fiona跟隨母親生活，但Fiona仍為父親四出搜尋名醫。

為父守齋
Fiona於10年訪問時，透露父母正搞離婚，之後父親再被拍得有另一頭住家，雖然雙親感情不再，但Fiona仍然非常愛錫父母；09年薛偉豐被揭於93至04年間，先後7次遭入稟追債，Fiona都出面代父澄清經濟冇問題。現在薛母已沒有經營補習社，而薛父亦已經結束多間公司過着半退休生活，兩老都靠Fiona一個女仔，養起頭家。

跳舞唔敢再hea
要孭起頭家，Fiona自然要為事業搏命。雖然距離演唱會仲有5個月時間，但Fiona 1星期練舞3次，積極備戰。處女個唱請得2位猛人助陣，包括監製Fran 9和朱祖兒；而好友Wyman一早已講明幫佢搵靚衫，Fiona說︰「我知道第一次開紅館係好重要，其實我入行第2年已經有人搵我開紅館，不過我覺得未ready就寧願唔開住。」以往的〈886〉都係跟拍子隨意亂跳，今次Fiona唔敢再hea，新歌〈9:55pm〉特別搵天王級排舞師High King排咗一段舞步。「起碼都要有誠意，唔可以再亂跳，所以同公司講咗4月後唔接戲住，一共推咗3套戲、2套內地劇。」


除咗跳舞，Fiona希望喺紅館，以鋼琴自彈自唱一首歌，「細細個阿媽迫我每日學琴2粒鐘，同時又要補習數學、法文，根本就冇心學琴，阿媽嬲嬲哋就叫我咪再學，家諗番都幾後悔。」為父守齋祈福之餘，更要備戰紅館，瘦到98磅的她，真係要撐住呀！

踢走抑鬱
入行7年，Fiona強調只在08年拍過一次拖，「嗰次唔係太愉快，令自己情緒好低落， 之後才學識原諒一啲傷害自己嘅人。」08年至09年，Fiona患上輕度抑鬱，之後靠信仰令她康復；重提舊事，Fiona說︰「已經好番晒，家梗係想拍拖，起碼做嘢攰到死，收工都可以打畀佢。」

孭3層樓
為了令家人住好啲，Fiona於08年分別以600萬和530萬分別購入帝景峰2個單位，再打通入住，開始其供樓生涯。之後再以母親名義以690萬購入將軍澳日出康城首都一過千呎單位，1人孭3層樓，都咪話唔吃力！Fiona說︰「我冇生意頭腦，都係買樓穩陣，每個月好多使費，又要供樓，我負擔都好重㗎，所以咪要拍多啲戲，希望將來有一日，可以再買一間大啲嘅屋，最好有間畫室添！」

暫停接戲
Fiona平均每年只出1張唱片，主要收入靠電影和廣告，而且《分手說愛你》更令Fiona提名金像獎影后，單單去年，Fiona已接咗3套戲（下圖），但4月將暫別影壇為演唱會準備。

方大同與房祖名
踏入30歲嘅Fiona，事業衝刺期，感情仍未有着落，傳來傳去都係方大同，「佢係一個好難得嘅朋友，呢行好難搵到真心friend，識咗佢6年都keep到，發唔發展就未諗。」至於過氣緋聞男友房祖名，早前接受訪問取笑Fiona扮鬼妹，根本冇去過外國讀書，Fiona笑住回應︰「我從來都冇話喺外國讀書，不過佢幾好吖，好少入行咁耐，講嘢仲有純真嘅一面。」 ####

 



父母離異年半
Fiona入行第一個生日，唱片公司替她舉行生日派對，當時父母仍有出席，但1家3口合照近年已絕跡。


錫媽咪 Fiona跟母親相依為命，更因早前患上抑鬱症，跟母親關係變得更好。


最後同場 07年，Fiona舉行《Road Show Live薛凱琪音樂會》，父母最後一次同場出現。

 
唔再自創舞步，Fiona跟High King排舞，1星期練足3日，為求於處女個唱有大突破。

 
拗腰

 
趷籮


得個睇字前年，Fiona曾奪叱咤女歌手銅獎，去年因接戲慘敗於叱咤食白果，今年元旦只眼白白睇住緋聞男友方大同上台狂攞獎。


捱到病去年11月，Fiona於內地拍劇期間，又發燒又嘔，最後要送入醫院，真係搵命搏㗎！


Fiona患病時食唔安瞓唔樂，體重暴跌十幾磅。





《懸紅》（埋尾）


《爛賭夫鬥爛賭妻》（完成）2月16日上映


房祖名最近接受訪問時話Fiona嘅英國口音係扮出嚟，根本冇去過外國讀書，好鬼抵死！


方大同年年傳緋聞，不過Fiona都係嗰句：「同佢係好熟嘅朋友。」

arrow
arrow
    文章標籤
    薛凱琪 fiona 父母 大同 叱咤 hea 患上 去年 戒掉 今次 舞步
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄