拍拖九個月的陳豪和陳茵媺（Aimee），自戀情曝光後，兩人不但可以光明正大約會，又得到公司及外界支持，在新劇《天梯》中合作，又獲客戶睇中以情侶檔出騷，明正言順出雙入對，拍住拖搵錢。

日前，兩人為《天梯》開工時，戲裏戲外陳豪對女友不但照顧周到，就算唔使埋位，仍坐足半日在場打躉陪女友，如此體貼細心，難怪女友Aimee早已做足準備新年時拜見未來奶奶。

陳豪貼心為Aimee拎咖啡、對劇本，怕女友累壞。

公開戀情後情侶檔出席活動，二人冧爆笑得燦爛。

貼身照顧

早前，兩人為《天梯》埋尾，原本當日只得一場戲的陳豪，一早拍完可以先行收工休息，但他卻留在現場，有如小影迷般陪住Aimee拍戲，大部分時間更幫女友對稿排戲。當日所見，平日靠拼音背劇本的Aimee，正戒掉用拼音而努力學中文，當她與小演員拍戲時，原本慣性中英夾雜的她，竟然將一大段對白完全消化，相信陳豪功不可沒，但同場的小演員當日表現生硬，導致頻頻NG，令Aimee一場戲拍足幾個鐘。

陳豪見女友企到攰，趁休息時，即向小演員埋手，先以表演魔術扮老友，然後再教導小演員背熟對白，之後埋位竟然成功一次過完成，Aimee對男友的舉動，投以感激目光。拍了半日，Aimee終於收工，陳豪即體貼地問女友「餓唔餓？」，又表現出紳士一面，為女友拎劇本、遞咖啡及化妝袋，雖然Aimee話「我自己拎啦！」，但陳豪的細心，令Aimee甜到入心。

雖然陳豪只有一場戲，但陪女友開工，坐足半日。