走為上着 謝安琪同環球搞到一鑊泡，上週五1連2晚演唱會更寸爆公司，環球高層、歌手甚至員工都冇眼睇，懶得捧場！ Kay有籌碼，原來一早有後路，其經理人夏森美同環球高層黄劍濤反晒面，餘下3年合約，夏森美決意走人，據知bma羅傑承將成為Kay新金主，更不惜揼300萬為Kay贖身。 Kay誓逃出火坑，好過留在環球「睇Kary面色」做人，一於賭一鋪。


演唱會前半段，Kay尚算係以歌會友，下半part就開始嚟料，句句夭心夭肺指向環球，實行喺紅館示威！ 我好強橫，係野草捽唔死，係海水污染入面嘅海龜，好長命，生命力強。雖然出面風大浪大，但如果落雨就當洗面，大浪就當沖涼，等大風吹乾。


06年簽約環球旗下label新藝寶唱片公司，Kay事業發展一直穩步上揚，就算未婚懷孕，環球高層Duncan黃劍濤都出面支持，08年一首〈囍帖街〉更令Kay搭直升機標上一線。不過環球一直同Kay經理人夏森美唔啱嘴形，雙方更已達反面階段，經過1連2晚演唱會，Kay對環球隻字不提，又句句夭心夭肺，仲力撐夏森美，明顯環球的離間計用唔着！

踢走經理人
其實環球一直想擸埋Kay的經理人合約，不想與夏森美共同擁有合約，變相賺錢唔使分多份，加上Duncan同夏森美為宣傳問題鬧晒交，又適逢Kary加盟，環球自然放棄Kay。「Kary唱片同經理人約都係環球，但Kay就下下要經夏森美，Duncan一直想Kay踢走埋夏森美，不過點都冇效，Duncan家惟有要錢唔要人，解約對大家都好！」知情人士說。上年8月，Kay同環球續約5年，當時雙方仍有彎可轉，直至10月，環球每年的高峰會議，環球初時屬意Kay到韓國，出席代表香港區做表演嘉賓，最終卻換上Kary，雙方關係正式決裂。夏森美四出幫Kay搵後路，初時都只係想畀少少壓力環球，但Kay解約之意愈來愈大，知情人士說︰「Neway、星煥、bma都傾過，羅傑承最揼本，肯出300萬幫Kay贖身，仲話搵曹格同佢一齊開拓亞洲市場，都傾得七七八八。」對於300萬贖身一事，羅傑承回應︰「要睇Ban Ban Music（夏森美公司）同環球傾成點，搞得掂一定有興趣。」至於夏森美則話：「有啲乜嘢真係要等演唱會後先正式諗，有明確答案一定會公布！」

老公出手傾金牌
張繼聰簽約金牌之後雖然冇咩起色，不過做生不如做熟，據知張繼聰亦向金牌推薦。雖然有傳龐維仁就快撤出，但新上任頂替陳輝虹嘅CEO 李文偉，就好有興趣搞番起金牌個朵。喺Kay演唱會頭場當晚，除咗大手筆嘅羅傑承外，金牌嘅龐維仁同李文偉都有現身，實行睇住揀！

學精變乖
2009年12月，無綫與環球、華納、 EMI及Sony 4大唱片公司因版稅問題鬧翻，而隸屬環球嘅Kay更係首位4大歌手上其他電視台嘅歌手，無綫內部有傳，就算有朝一日，無綫跟4大和好，Kay都照封殺。經歷低潮，Kay學精識做人，上年11月CASH頒獎禮，到場時巧遇樂易玲，竟一反常態拖手示好，咁咪乖囉。 ####

 
羅傑承帶埋老婆去睇Kay演唱會，羅生出咗名夠豪爽，搞支足球隊都使幾千萬，300萬幫Kay贖身？濕濕碎啦！

 
唔咬弦 Kay經理人夏森美（左）同環球高層黃劍濤（右）唔妥到出面，每次出公司活動，影合照時都面左左，更成為Kay同環球決裂最大成因。


近排夏森美受到好多攻擊，不過佢仲好肥，應該冇事，我哋公司（經理人公司）細細哋，只係家庭式作業，都可以上到紅館已經好好！

 
上年環球高峰會議，Kary係唯一亞洲女歌手上台表演，台下全部係澳、紐、英、美及亞洲各地高層。


環球冇人理，老公張繼聰跟埋去慶功宴幫手，夫妻檔預演。


張繼聰有意拉攏老婆過檔金牌，今次Rubber Band擔任演唱會嘉賓，都係張繼聰一手撮合。

 
出賣浴照演唱會Kay出力唱，兼打親情牌，大晒幸福家庭照，連老公同仔嘅出浴照都出埋。


現場睇辦（左）新上任金牌大風CEO李文偉同龐維仁一齊到場，一邊睇一邊咬耳仔，似乎滿肚大計。




埋樂堆同無綫破冰無期，見到樂易玲，Kay主動打招呼，不過樂小姐似乎冇咩反應。


撩記者 Kay最近出活動都「四萬」上身，唔知記者們受唔受呢？

arrow
arrow
    文章標籤
    kay kary 理人 金牌 演唱 duncan 上年 bma 出面 踢走
    全站熱搜

    stacylife 發表在 痞客邦 留言(0) 人氣()

    E-mail轉寄