早前有指無綫逼吳鎮宇簽多部部頭合約，令他卻步唔肯落實接《衝上雲霄2》，經多次斡旋終於傾掂數，明年5月鎮宇將返娘家再演型仔機師。《Face》圖片

03年無綫台慶劇《衝上雲霄》叫好叫座，無綫一直想拍續集翻尋味，但一直請唔到該劇主角兼靈魂人物Sam哥吳鎮宇出山。今年台慶頒獎禮，吳鎮宇做視后頒獎嘉賓，胡杏兒一手拎住獎，一邊喊住求師傅應承參演《衝2》，希望用誠意感動鎮宇。
出爐視后胡杏兒之後加把勁，向高層反映，極力游說鎮宇拍《衝2》，仲話寧願減人工都要與對方再度合作。視后開到口，大老闆殼王陳國強亦親自致電力邀鎮宇。
無限誠意加埋銀彈攻勢，鎮宇最後收8萬蚊一集，返娘家再演型仔機師Sam哥。

 
當年《衝上雲霄》收視理想，帶挈當時一班新晉小生花旦吳卓羲、黃宗澤、胡杏兒等成功上位。眼見電視台大戰打到嚟，最近播出的《天與地》收視又差強人意，無綫當然想開拍《衝2》救亡。
去年年底已宣布開拍的《衝2》，除了搵吳鎮宇、胡杏兒舊班底外，仲加入張智霖、林峯、徐子珊、陳法拉等，更打算去歐洲及日本取景。據知鎮宇初時以「度唔到期」為理由推掉此劇，無綫惟有退而求其次，搵靚仔張智霖做第一男主角。知情者說：「Chi Lam向來有觀眾緣，佢高大靚仔，做飛機師都好合適，加上佢上一套拍嘅無綫劇《魚躍在花見》收視唔錯，公司搵佢坐正，貪佢有收視保證。不過如果冇鎮宇，始終公司都擔心唔夠號召力。」

殼王親自游說
視鎮宇為啟蒙老師的胡杏兒，非常渴望再與師傅合作，她除了在台慶頒獎禮以出爐視后身份在台上叫鎮宇出山之外，更有傳她曾向無綫高層施壓，知情者續說：「胡杏兒拎視后第二日打電話俾無綫高層，佢話點都要搵鎮宇返嚟拍《衝2》，就算自己減價都唔緊要！呢件事驚動到大老闆（殼王陳國強），殼王仲親自打俾鎮宇同佢傾，話萬事都有商量，最終傾掂8萬蚊1集。」
本周三（28日）杏兒不諱言對本刊說：「雖然我拍劇個價係固定咗，但若然鎮宇肯拍《衝2》，我真係減價都無所謂，因為成班演員都好想佢返嚟。有吳鎮宇同張智霖嘅話，就天下無敵啦！」胡杏兒視錢財如糞土，果然有視后風範。
對於吳鎮宇即將回巢，以8萬1集拍《衝2》，樂易玲只肯承認鎮宇已落實接拍：「出年5月先開拍喎，現階段係mark緊吳鎮宇個期，不過好多嘢未定，連邊個做監製都未知。（胡杏兒同殼王都有出面游說鎮宇喎？）呢啲唔講喇！」

 

為囝囝出山
《衝2》一日未開拍，仍存在很多變數。對於是否落實返娘家，鎮宇坦言：「依家傾緊，檔期已留咗俾TVB。上次出席頒獎禮囝囝不停指住電視，所以今次接拍《衝2》都係想拍俾囝囝睇。」
至於另一男主角張智霖，有報道指他與鎮宇不和，Chi Lam聽後大叫：「黐線！我同鎮宇不知幾好朋友，其實上一集原本有機會合作，不過檔期問題告吹，今次等公司安排啦！」
《衝2》將會是明年台慶劇，有兩大型男傍住，杏兒咪好大機會再冧莊攞視后？ ####

 


我拍晒心口，鎮宇一定拍。
（設計對白）


胡杏兒今年在吳鎮宇手上獲得視后，她坦言當年與鎮宇拍《衝上雲霄》時似「一嚿飯」，更公開請求對方一定要返無綫拍《衝2》。《蘋果日報》圖片


兩高層給力
今年初殼王陳國強入主無綫時，曾表示不會干涉內政，不過最近無綫立立亂，殼王亦要出面穩定軍心。據知他親自出馬致電鎮宇，極力游說對方返無綫拍劇。《蘋果日報》圖片


鎮宇係無綫福將，近年拍「Laughing Gor」系列電影，票房皆有保證，樂易玲當然碼到實。年中樂小姐更被影到與鎮宇及其經理人Helen在無綫見面。《FACE》圖片


《衝2》未開拍已是非多多，早前有傳張智霖與鎮宇有你冇我，不過Chi Lam聲稱兩人不知幾friend，一劇藏二虎絕對冇問題。今次Chi Lam做靚仔機師拍住陳法拉，師奶觀眾一定會鍾意。


Chi Lam配法拉


原班人馬不再
02年由潘嘉德監製的《衝上雲霄》，演員陣容非常鼎盛，除了當紅小生花旦吳鎮宇與陳慧珊，還有一班當時被力捧的小生吳卓羲、黃宗澤及陳鍵鋒等。


12年殘障輪椅女
胡杏兒肥妹奸妃都扮演過，《衝上雲霄2》中，她將演殘障人士，要坐輪椅拍劇。男友亦由鎮宇換上林峯，對她來說角色都算新鮮。


02年嫩口地勤
02年拍的《衝上雲霄》，初出茅廬的胡杏兒飾演空姐，同影帝吳鎮宇係情侶，當時她叫對方做師傅。

arrow
arrow
    文章標籤
    lam chi 出山 法拉 小生 今次 娘家 花旦 再演 知情者
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacylife 發表在 痞客邦 留言(0) 人氣()

    E-mail轉寄