林敏驄人愈老愈癲喪，近年不時四圍辣火頭，不少阿哥阿姐亦俾佢喺微博玩謝，搞到人見人怕。

娛一叮

爆粗咒人死　沙膽林敏驄惡搞主播

神神化化林敏驄， 50歲人依然癲喪，早前分別在亞視節目和微博中，涉對女星抽水揩油，事後雖然有所收斂，但惡搞本色依然冇變，日前更越級挑戰，對一向正經的新聞主播埋手。
今次慘遭惡搞的主角，分別是無綫鎮台體育主播伍家謙和前新聞主播柳俊江。林敏驄不但向伍家謙講諧音粗口「 FUK U」，還寸柳俊江「依家唔報新聞報訃文」，言詞帶有攻擊性，事後阿驄還死撐：「唓！咪當幫佢哋宣傳囉！」

林敏驄近年迷上玩微博，說話似講鄉下話，更經常自度鹹濕古仔及諧音粗口，總之小小鹹多多趣。經常借微博發表偉論的他，多次玩謝城中奀星、紅星、政界及長官，而且鑊鑊新鮮鑊鑊甘。上周五（ 9月 30日）凌晨，無綫體育主播伍家謙在微博上寫：「有同事買咗包咁嘢返來（圖為福字伊麵），勾起好多童年回憶！」點知相隔兩分鐘，林敏驄即留言說：「 FUK U福伊?!!」明顯是借故講諧音粗口。

事緣伍家謙上周五上載一張福字伊麵上微博，觸動到林敏驄，更留言講諧音粗口。

咒人報訃文

同一晚，一女粉絲對柳俊江留言說：「加油！冒昧問句：點解呢排唔見你報道新聞？」柳留言說：「冇報新聞好耐啦！」塘邊鶴林敏驄又出來搞事：「企（佢）間中報訃文！」柳隨即還擊：「你有需要我免費。」林發爛渣用諧音講粗口：「傻仔江，里米鍊貢報，吾系吊高里牌照。」好佬怕爛佬，兩位主播為免再受林敏驄新一輪粗鄙字眼攻擊，不敢再留言，以免愈描愈黑。

林敏驄在微博鬧柳俊江做傻仔江，又用諧音表示「你咪亂咁報，唔係吊銷你牌照！」兩人於微博你一言，我一語，甚有火藥味。

林：我叫佢做花柳江

周一（ 3日）本刊致電林敏驄，對於連平日一本正經的新聞主播都惡搞，林即哈哈大笑說：「玩吓之嘛！同佢哋識咗好耐，踢波識嘅。我平時唔係叫佢做傻仔江，我叫佢做花柳江㖭！（ friend到講粗口鬧人？）咪當幫佢哋宣傳囉！」
對於遭林粗口問候，記者聯絡伍家謙，他聽後大方說：「知佢留粗口，不過唔會嬲嘅，識佢咁耐，知佢份人係咁，亦都冇得嬲。」記者亦曾致電柳俊江，但至截稿前仍未有回覆。