震在東京
三月十一日，杜如風作為領隊，帶住一行十三人到東京，準備喪玩。就在前往東京住宿酒店的途中，遇上這次九級大地震。
「當時只感覺旅遊車不斷搖，仍不知道這麼嚴重，去到酒店才發現所有人都在空曠地方等待，一等便等了四個多小時，期間不斷發生餘震，燈柱的燈泡也搖到爆，才知這次真的是大件事。」
杜如風這個東京團本來四日三夜，但剛到埗便遇上大地震，行程自然不再一樣。
「頭一、二日全個東京交通其實都停晒，不過我們有旅遊巴，所以都可以在附近的餐廳吃飯，也參觀了一、兩個景點。」
其實在地震當天，整個東京市面都是有家歸不得的人潮，便利店、超市的食物和水早就被搶購一空，只是市面秩序非常良好，完全沒有混亂的情況出現。
只是面對天災，眾人亦無心玩樂，每晚都留在房中看日本的新聞報道。
「回港的機票竟然加到一萬七千元，我覺得係趁火打劫，有得揀我寧願捐畀災民都唔會畀！但我帶住咁多人，要顧及大家安全，最後公司都係焗住畀。」
人很渺小
直到上星期六，Helen仍然有一位居於東京的朋友音訊全無，不論手機還是電郵都完全沒有回覆。還幸杜如風居於東京的契媽一家人都平安無事。
「我在日本讀書和工作了很久（讀書時還有位日籍男友），早就把東京當成是自己第二個家。
地震當日到第二天下午，因為所有電話都斷，杜媽媽一直冇辦法聯絡到愛女，甚至喊住打電話畀所有有關人等，求他們想辦法聯絡杜如風，因為當時冇人知她是生是死。
「好彩到夜晚可以上網，就用whatsapp同朋友聯絡，叫他們第一時間要搵我阿爸阿媽，話畀佢哋聽我安全！」
「我真係知道原來自己條命，唔係淨係屬於我自己，若果我咁就死咗，父母會好傷心。這一秒我仍然在生，但下一秒就可能已經死咗，本來直行條路仍然風景如畫，轉個彎就已經面目全非。」
為X道歉
杜如風雖然人如其名，有時真係瘋瘋癲癲，不過這次更在微博上惹火，與網友留言互鬧，就連個X都出埋。
其實回港後杜如風坦言冇心機同任何人講說話，就連專欄都唔想寫，但眼見爸爸杜惠東就算有病都未停手，也就「的」起心肝半夜趕工。
「我老竇就連早排入醫院都繼續寫稿，咁我冇理由停手，我都話開間杜氏寫稿山寨廠，老竇日班我夜班。」
神經爆料
杜如風近一、兩年才叫做開始「出名」，因為旅遊節目而多了很多工作機會，搵錢是多了，不過仍未夠買衫。
不過，當年投考有線電視，死都唔畀老竇同當時有線高層徐小明聯絡，誓要靠自己。
「我真係自己排隊等面試，等足一個上午，直到入去做，初期都冇人知我係杜惠東個女。」
現在紅過老竇，笑住慨歎話玩咗三十年，終於都要還，只不過自家製拍旅遊節目搵到的錢，唔好話未夠佢買衫，就連成本都未cover。
「今輯去倫敦、紐約都係貴地方，計完條數最後都係蝕。不過我要澄清，我每季最多都係買兩萬蚊衫，錢由阿媽管，每個月有五千蚊零用，家陣收入同支出係成正比o架！」
作為前嘉禾宣傳部高層的獨生女，杜如風其實由細到大見慣大明星，最愛梁朝偉的她，曾幾何時探班、記招、慶功宴，都一定有佢出現，梁朝偉後來每次見到她都會說：「你又嚟呀？你簽咗百幾個名啦！煩唔煩呀你？」
與陳奕迅夫婦更是由細玩到大的好朋友，徐濠縈在銅鑼灣的時裝店，更是她的「朝貢」地，每個月出糧都有「大比例」給了好姊妹徐濠縈。
留言列表
