與林欣彤見第一面，是今年八月，第二屆《超級巨聲》六強剛誕生，六個小朋友來本刊影樓為專訪作客，沒有化妝髮型和助手跟場，吵吵鬧鬧一整晚，親親熱熱地擠在破爛的貨van裏走。
第二面，20歲的她已經勇奪《巨聲》冠軍3個月，多次登上週刊封面、上學放工去到邊都有狗仔隊護送、台慶亮燈與汪阿姐、佘詩曼、黎耀祥並列第一排、出席本刊的潮流icon頒獎禮時，由保母車接送的林欣彤正在回答記者有關出道三個月勁賺過百萬的傳言。


4個月前，林欣彤還對我說沒決定是不是做歌星，所以很怕決賽夜，這個晚上化着濃妝穿起小禮服，有無綫經理人貼身侍候着，回答起問題頭頭是道，我心裏的潛台詞是，小妹妹的適應力真強，明星，果然是被名氣堆砌出來的。
這一天的個人專訪，是我們見的第三面。咖啡店裏很清靜，光線也比夜店充足得多，林欣彤換上第一套公主裙，駝着背蹦蹦跳跳地跑出來、拍照時被化妝師一次又一次提點着，還是忘了眼睛要睜大、嘴角要上揚、手要蓋住短裙以免走光時，露出有點抱歉的傻氣笑容時，我看清楚了，林欣彤還沒變，還是4個月前的那個素人。

一夜成名
4個月前，林欣彤和《超級巨聲2》的其他五強陳國峰、吳業坤、謝東閔、胡鴻均和羅孝勇一齊擔任專訪對象，異口同聲都說，決賽之夜輸贏不重要，大家能走到這一步都是贏家，贏的是友誼和經驗。話雖如此，9月12日的《超級巨聲2》總決賽，冠軍只有一個，從此以後生活徹底改變的，只有林欣彤一個。
諗起9月12日嗰一晚，百感交集。
我仲記得嗰日我病未好，聲唔太清，冇諗過係唔係攞冠軍，成日只係好擔心首歌唱唔唱得掂，捱唔捱到比賽完。一切發生得好快、好唔真實，嗰一晚錄完影，去到邊已經被記者包圍住。
頭嗰幾個星期，我真係好擔心從此以後日子就要咁過、返學、返屋企、約朋友、去食飯永遠都會被狗仔隊跟住；擔心自己對住鏡頭，靚唔靚；擔心拍戲、出席活動仲有對住記者，我做得夠唔夠好、會唔會講錯嘢……始終，由細到大，我只對自己唱歌有信心，甚至就算唱歌，我都知道天外有天、人外有人，大把人叻過我，唱歌以外嘅嘢，我一啲把握都冇。我好怕，由參賽者變正式入行，人哋就會要求我係一個面面俱圓、識唱歌識做戲又識做人嘅全能藝人，而我自己真係做唔嚟。
好幸運，起碼到呢一刻，我遇到嘅都係好人。影相，有化妝師提點、對記者，經理人會教我，就算去到拍賀歲片，每個人都對我好寬容。好快，我就明白一個道理，唔需要要求自己一夜之間變完美，我嘅原則係，幾叻都好，人都唔應該太自負，咁先會有進步空間。

百萬富翁
勝出比賽至今，林欣彤已經是大新銀行和植村秀的代言人以及賀歲片《我愛HK開心萬歲》女主角、大頭廣告遍布各大媒體和隧道口、表演活動遍布大小品牌、商場、曝光奇高。雖然當事人自己說，巨聲六強在比賽後工作都不斷，事實上，還是香港專業教育學院航空及客戶服務三年級的20歲小女孩，是外界傳聞4個月狂賺200萬的唯一一個。
過唔過百萬我真係唔知會……啱啱出咗糧有幾萬蚊，已經係我20歲女賺嘅最大嚿錢，我買咗部電腦送畀細佬、請一班朋友食咗餐shabu shabu、其他大部分就畀咗媽咪。一家人家住喺居屋，地方唔夠住，我同細佬仲係一間房瞓，爹哋媽咪一直有計劃想換樓，我嘅目標係幫輕爹哋媽咪。


雖然實質數目唔太清楚，但我好明白，呢幾個月搵到錢唔代表未來都會，我好清楚，人氣同讚賞唔會永遠跟住我。公司暫時計劃喺出年年中、等我正式畢業就安排我錄音出碟，我有諗過，到我真正出碟做歌星，歌迷、傳媒對我就未必似家咁仁慈。由細到大，我身體都麻麻，氣管又差，有時候我都會擔心，萬一有一日唱唔到歌點算，最壞打算係依照我本來個計劃考空姐，或者練好啲琴，就算第時喺幕前生存唔到，我都仲可以做幕後，做我最鍾意嘅音樂。
上兩個星期，做完《福祿壽演唱會》嘉賓、再趕去出席馬會活動，又要通頂拍戲，做完三十粒鐘，第二朝直踩返學……我好堅持，無論幾辛苦一定要讀到畢業，除了為咗有份文憑喺手，最重要嘅係，我仲當緊自己係個副業做藝人嘅學生，起碼仲有半年時間，做個簡簡單單只需要關心學業嘅學生。

六角戀人
說不上美、身材也談不上惹火，一出名，5呎2吋、單眼皮的林欣彤也成了雜誌封面的緋聞主角。前度、疑似現任羅孝勇、還有疑似追求者陳國峰、吳業坤、馮琛都在報道中被形容成情場女殺手的林欣彤耍得團團轉，看着眼前這個至今對着鏡頭還不會擺pose又不太會笑的林欣彤，說句心裏話，我不信。
一夜成名以後，好多報道莫名其妙咁走出嚟。有啲話我唱衰前男友、有啲話我係拜金港女所以黐埋羅孝勇，就好似話我俾無綫賣畀英皇嘅報道一樣，完全冇根據唔知從何而來。


比賽以前，我唔會當娛樂新聞係真，亦都幻想過自己有一日可能處身其中，我以為自己應付得嚟、原來開頭真係好辛苦好無辜。我為人，冇人比我爹哋媽咪更清楚，自己個女俾人話玩弄其他男仔，佢哋最擔心係我，嗰段日子成日都問我：「囡，你有冇事？你頂唔頂得順？」
有一段時間，我喊過，《巨聲》一班朋友約我，我又拒絕過。去到邊都有記者跟，我怕我出嚟同佢哋玩，班朋友唔知會俾人點寫。
慢慢我就諗通咗，俾人跟俾人寫，我改變唔到，惟有自己嘅諗法可以改變。家我出街唔化妝、唔戴太陽眼鏡、照樣同朋友食飯、行街㓤魚蛋。我怕咩？㓤魚蛋又冇錯。有一日有一個適合嘅人喺身邊出現，我諗我都唔會隱瞞自己嘅感覺，同㓤魚蛋嘅道理一樣，有錯咩？

巨星之路
做了半年人氣巨聲，拍照時，林欣彤對梳甚麼頭、化甚麼妝、換哪套衣服都逆來順受，擺啲pose會不會穿崩和暴露肉臂既沒概念也不執着，是歷來最容易擺布的專訪主角。
一拍完照，她又拜託化妝師下樓買Frozen Yogurt回來，邊坐訪問邊吃，一口氣還點了三個toppings，全場最貪吃。
「有得食我照食，靚唔靚我唔關心，化妝師成日提醒我唔好駝背我都唔記得，哈哈，連朋友都話我行路姿勢好核突，唔似歌星……因為我嘅目標又唔係做巨星，我係鍾意唱歌?！」
還能做自己是好事，但我懷疑，6個月後就要畢業正式出道的她還能做自己多久。



我好清楚，人氣同讚賞唔會永遠跟住我。


身為《超級巨聲2》眾望所歸的頂頭大熱，林欣彤剛獲得Yahoo搜尋年度十大，一點不意外。《蘋果日報》圖片


出道第2個月，就在無綫台慶亮燈儀式上與邵逸夫、汪明荃、黎耀祥齊齊企頭排，破晒電視史紀錄。


林欣彤最新嘗試是主演賀歲片《我愛HK開心萬歲》，與李治廷合演梁家輝、吳君如的一對兒女。


9月12日當選《超級巨聲2》後，林欣彤去到邊都有傳媒護送：「好快就諗通咗，我又冇做錯事，怕咩？」《蘋果日報》圖片


與前男友Skeleton Koo拍拖一年，年中分手：「原因我唔想講，我從來冇講過咩，都唔明話我唱衰前男友嘅新聞從何而來。」


與前男友分手後，林欣彤緋聞精采，最似層層的，是她常常自出自入，家住堅道的《巨聲》季軍羅孝勇。


與羅孝勇的關係，林欣彤說：「朋友囉，將來嘅嘢好難講，有感覺我唔會隱藏，我冇做錯！」《壹週刊》圖片


我嘅目標又唔係做巨星

arrow
arrow
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄