自從09年7月為老公劉建浩誕下「蝦餃仔」劉昇，人妻陳慧琳（Kelly）一直夾於家庭同事業中間，更試過活動期間因太掛住乖仔而爆喊，嚇親身邊人。
據知Kelly生完B後情緒有點不穩，一方面希望24小時貼身照顧「蝦餃仔」，但另一方面又放唔低娛樂圈生活，經常心郁郁想復出。兩頭唔到岸，Kelly最近接拍有周潤發、甄子丹主演的4億大片《齊天大聖》時，講明只會留北京兩日客串做觀音，完成戲分後即時回港湊仔。
雖然只得兩日戲分，但據知Kelly為演好觀音一角愁爆，上週為新戲在北京開記招，迫住強顏歡笑。


形象健康的38歲陳慧琳，自從上年年中生完劉昇，每次出席活動都主動向傳媒講乖仔近況，超級廿四孝。為見「蝦餃仔」多幾面，Kelly早前承認已推掉唔少工作，「其實巡迴演唱會已經推晒，排舞好嘥時間o架！」唔肯長期離開乖仔，Kelly近來專接一兩日貨仔的廣告工作，復出短短年幾已經接拍金至尊、美心月餅等多個廣告。

老公叫停
雖然廣告錢出名易賺，但Kelly憶「蝦餃仔」成狂，每次外出工作仍要將乖仔相簿隨身攜帶，曾經講過「阿仔連啲屎都係香」的Kelly，更試過兩度在公開場合因提起囝囝而喪喊，情緒失控。
「Kelly平時冇嘢做都係留喺屋企湊仔，佢真係可以全日對住個仔都唔會嗌悶！其實Alex（劉建浩）最初見老婆頻頻撲撲，情緒又唔係咁穩定，而且Alex好想追個女，所以都有叫Kelly唔好做，專心做全職媽咪。不過Kelly覺得自己仲後生，又仲有market，咪寧願辛苦啲都要復出囉！最近Kelly就為屋企事，搞到個人唔多開心，成日都好愁咁，可能掛住『蝦餃仔』啩！」Kelly身邊人透露。

恨代表作
唔捨得乖仔，Kelly復出亦大把嘢愁。Kelly 08年產前同黎明合作的《江山美人》票房仆直，香港埋單收得7百幾萬，對事業心極強的Kelly算係幾大打擊，所以對於今次產後復出頭炮，絕對唔衰得。
「雖然大把廣告商爭住請Kelly拍廣告，但佢一直希望可以喺電影有個代表作，仲有心願攞影后添！佢今次接《齊天大聖》就係睇中套戲係大製作，又可以打入國內市場，加上有咁多巨星孭飛，又唔使長期留响北京，所以佢都一口應承。」
家庭與事業齊搏殺，做人阿媽係咁煩o架喇！

年半搵3千萬
復出短短唔夠兩年，Kelly已拍了5個香港廣告及1個內地廣告，以Kelly身價高達500萬計算，單係呢年幾已穩袋3千萬！奶粉錢咁易賺，難怪唔等錢使的Kelly都要密密接啦！

金至尊珠寶
美心月餅
迪士尼樂園
依波路手表
DHC深層卸妝油
泰豐床上用品(內地)


週日到北京出席《齊天大聖》記招時，唔知係咪因為壓力太大，全程強顏歡笑。事後佢話：「難得遇上呢個角色，我又唔使離開個仔好耐，咪即刻應承囉！」《蘋果日報》圖片


5呎9吋高嘅Kelly，無論企喺甄子丹定郭富城身邊，都高過對方成半個頭，搞到城城勁冇癮。《蘋果日報》圖片


早前提起乖仔劉昇，Kelly曾喺記者面前都忍唔住喊，鍾意小朋友嘅佢仲話40歲前要追多個女。《蘋果日報》圖片



唔使開工時，Kelly都會同老公乖仔出街玩，仲試過帶埋兩歲未夠嘅蝦餃仔去印尼民丹島旅行。第 186 期 大乜週刊 圖片


細佬爛玩
Kelly細佬陳司翰（紅圈）喺香港撈極唔起，早前同大律師清洪契仔巫翊鳴喺夜店玩水戰，搞到差人上門，事後Kelly開口鬧細佬，「呢啲責任應該佢自己負！」《蘋果日報》圖片


老公愛蒲
做絲花生意嘅Alex（右），間中會同老友側田（左一）夜蒲，亦試過被影到當街扯煙，Kelly多次勸佢戒煙都失敗。


Kelly一家租住嘅加多利山獨立屋，長期拉上窗簾，而且花園更安裝電網同圍欄，連Kelly都話感覺似坐監。


迪士尼樂園


DHC深層卸妝油

arrow
arrow
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄