南華班主、bma唱片公司老闆羅傑承最近有好多新搞作，除羅致前曼聯球員畢特做外援外，投資過億嘅新K場RedMr更會在12月18日正式開幕。
自今年3月Neway收購加州紅後，便形成壟斷局面，但四大唱片同Neway就版稅問題傾唔掂數，故大部分四大嘅歌手新歌都冇得唱。今次羅傑承開K場，正好打救一班好耐冇K歌見人嘅歌手。開幕當日四大嘅歌手將會力撐RedMr，當中以環球人腳最鼎盛，除李克勤、謝安琪、張敬軒及樂隊Mr外，有工作在身嘅譚詠麟與陳奕迅，亦會預先錄定恭賀片段贈興。至於同Neway關係極好嘅英皇，就唔會派人出席啦！


羅傑承預計會斥資3億開8間RedMr，助他打江山的全是原加州紅老臣子，12月18日先開張的是銅鑼灣及尖沙嘴店。據知為打響聲勢，RedMr力邀四大嘅歌手出席開幕儀式，當中以環球最人強馬壯。
「當日一知道羅傑承要開K場撼Neway，班四大嘅歌手都好支持，因為大家都唔想K場俾人壟斷，歌迷根本冇選擇權。12月18號開張當日，四大嘅歌手幾乎都會出席，譚校長本來應承咗拉隊支持，但嗰日原來要出外做嘢，佢即時吩咐環球其他歌手要撐RedMr。RedMR仲請咗台灣代表周杰倫同楊丞琳，不過佢哋仲未覆實。」知情者說。
RedMr來勢洶洶，Neway亦不甘示弱。早前Neway花過千萬為元朗Neway CEO新店宣傅，請埋阿Sa蔡卓妍做廣告代言人，非常揼本。知情者透露：「Neway同英皇關係非常好，呢期就搵咗阿Sa同William幫佢做生招牌，始終佢哋都好有市場價值。Neway同英皇、無綫搞好關係，亦可以杜絕佢哋跳槽RedMr。今次RedMr開張，英皇同無綫人都唔會到。」

一流K房享受
RedMr除引入全球最先進音響及點歌系統外，最重要的賣點就是可以唱到Neway冇嘅歌。知情者透露；「Neway依家唱來唱去都係自己旗下、英皇、東亞、TVB歌手同部分四大嘅舊歌，而環球李克勤同謝安琪完全冇歌唱。嚟緊RedMr有晒四大，即環球、華納、Sony同EMI嘅新舊歌。雖然暫時冇Neway咁多分店同K房，但音響同視覺效果都一流。銅鑼灣有幾間VIP房，其中一間有部103吋全高清大電視，另一間有3部62吋大電視，可以同時收睇3場唔同嘅足球賽事，部分房仲有3D電視㖭！揀歌系統除咗輕觸式螢幕外，仲可以將你當日唱過嘅歌曲紀錄傳送去iphone或ipad。」新K場有辣有唔辣，雖可滿足四大嘅歌手fans，但四大以外的歌就唔會有。


本周一（29日），羅傑承出席活動時表示RedMr已和多間唱片公司簽約，「除咗四大之外，我哋仲同周杰倫嘅JVRMusic傾好，周杰倫9成以上嘅歌都有得唱，日後仲會同其他唱片公司傾合作大計。而獨家試唱會維持一段時間，例如我哋公司會贊助唱片公司拍MV，之後我哋就會有獨家試唱，獨家會維持半年至1年，之後就會公開俾其他公司唱，最緊要係公平同開放。」此招擺明衝着對手而來。不過羅太梁芷珊說：「我同Neway二少薛嘉麟都係保良總理，見到面都會打招呼。而羅生同薛老爺（薛濟傑）又係商場上嘅朋友，我哋唔係想做到惡性競爭，總之各有各做啦！」

四大歌手唱好
四大唱片的歌手將會力撐RedMr開幕。環球派出李克勤、謝安琪、張敬軒出席；華納有方大同、薛凱琪及周柏豪；Sony則有陳栢宇及楊丞琳。

Neway黨唔撐
同Neway有合約嘅唱片公司，如英皇、東亞、金牌大風及無綫歌手，將不會出席RedMr開幕。


克勤：我一定支持羅生！（真實對白）
譚校長：我唔喺香港，不過我都撐！（真實對白）
William：我唔知有新K場喎！（真實對白）


無論有冇約，都嚟我個新K場見識吓啦！（真實對白）
羅傑承日內會廣發英雄帖給各大傳媒及業界人士。其中100位VIP更會收到羅生親筆簽名的邀請信。


銅鑼灣店
12月18日RedMr的開幕活動，將於銅鑼灣皇室堡店舉行，該店的接待處逾千呎，有38間K房。


尖沙嘴店
同步開幕的尖沙嘴店，位於加拿芬道國際商業信貸銀行大廈的1及2樓全層。


學友：我好支持，不過我係family man，唔會出席開幕。（真實對白）


方大同：終於等到RedMr開呢一日喇！（真實對白）


Mr：RedMr個名改得幾好！（真實對白）


謝安琪：開新K場係好事！（真實對白）


阿Sa月前為元朗Neway CEO拍咗一輯廣告，除咗電視廣告外，平面廣告亦一街都係。



RedMr雖然有四大唱片嘅歌唱，但東亞旗下千嬅同Sammi嘅歌就唔會有！


巨聲幫：公司冇安排！（真實對白）
無綫旗下的巨聲幫及東亞的王菀之，都話冇收過公司通知要出席新K場開幕。


王菀之：我完全唔知有新K場。（真實對白）

arrow
arrow
    全站熱搜

    stacy4life 發表在 痞客邦 留言(0) 人氣()

    E-mail轉寄