四年一度的世界盃，下個月十一日於南非正式開波！城中不少名人紅星，今屆大多選擇留港觀賽，一來唔想山長水遠飛去南非，二來又擔心當地治安。

雖然話留港睇波，但個個提起世界盃都未開波先興奮，如周秀娜早早約定好友到酒吧觀戰，楊崢就摷番年前於德國購買，價值二千元球衣捧德國隊，霍震霆及陸恭和更買定3D大電視招呼朋友返屋企睇立體波，馬鴻銘則講明會下注，小賭怡情增加刺激感。

人人準備充足，齊齊迎接世界波！

周秀娜 儲球衣睇靚仔

周秀娜近期頻頻獲邀出席足球活動，實際上她一樣喜歡看足球，近期更開始儲球衣，最鍾意的球員是卡卡（巴西），「他球技好，人又靚仔，最難得是感情專一；美斯（阿根廷）、禾確特（英格蘭）都好。」她今屆心水捧走世界盃的是阿根廷和英格蘭。

周秀娜雖然手頭上好多工作，但她表示一定會抽空與朋友到酒吧看波，最興奮是入球一刻，全場歡呼，「男友會同我哥哥、細佬一齊看，佢哋可能會排斥我，好彩我都有班波友。」

周秀娜最享受入球歡呼的一刻，會到酒吧睇波，她最鍾意球員卡卡，指他靚仔又專一。

楊崢 熱捧德國隊

名模楊崢對四年一度的世界盃特別關注，她表示進入十六強後，必定會留在家中與家人一起欣賞餘下的各場賽事。「四年前的世界盃，我親身飛去德國觀賽，感受現場的氣氛。不過，今年就無打算去南非睇，除了擔心當地的治安外，工作時間表亦唔容許。不過，我全家人都係愛波一族，所以今年，我都係留在家中同佢哋一齊睇。」

楊崢熱捧德國隊，四年前更專程到德國觀賽，楊崢笑說：「那次我在當地購買了一件價值二百歐羅（約二千港元）的德國球衣，穿着入場欣賞賽事。睇現場同睇電視完全兩回事，現場節奏好快，球員入咗波後，只會慶祝十秒，但電視就會重播多次不同角度的playback，節奏較慢。」

楊崢上屆到德國看世界盃，用二千元買了件德國隊波衫，今屆她又會穿德國波衫，在家看世界盃。

陸恭和掃3D眼鏡招呼朋友

踏入五月，陸恭和忙個不停，追看NBA、網球大賽、歐聯決賽等，六月又要追看世界盃，他表示會由分組賽開始看，為了看得盡情，他特別用三萬元買了一部55吋的3D電視機，留待下月正式開封，「用3D看，人和足球都好立體，好多朋友連cable都費事裝，book定來我家睇波，我特別買多幾副3D眼鏡和幾箱汽水，招呼朋友。」陸恭和最欣賞的球員是C朗（基斯坦奴朗拿度，葡萄牙），「他速度快，有腳法，是寸啲，都抵佢寸，因為他真是勁。」陸恭和以頗專業的口脗分析形勢，「歐洲隊今屆應該好難踢，天氣熱不容易適應，隊波又踢殘了，反而南美和非洲隊有着數，冷門的烏拉圭上到八強都唔奇，我看好葡萄牙，整體好強。」

陸恭和用三萬元買了一部55吋的3D電視機，務求以最立體的畫面睇好波，「我會買多幾副眼鏡招呼朋友。」

霍震霆換60吋3D電視

港協暨奧委會主席霍震霆，世界盃期間雖然要飛去南非，不過就唔喺現場欣賞賽事，而係到當地開世界足協會議。不過，與兩位兒子啟剛和啟山都是足球發燒友的霍震霆，近日正物色一部60吋的3D電視機，確保不能於現場觀賽，都有最佳的視覺享受。

霍震霆正尋找一部60吋的3D電視機，同三個仔一齊追看賽事。

歐陽妙芝情迷馬甸尼

歐陽妙芝的老公方時俊是足球迷，每次去歐洲旅行，一定會看一場波，他更有計劃到南非看世界盃，「老公好想去，好想感受現場氣氛，但他好忙，仍未知可否抽到時間過去。」

以為只是陪老公看波的歐陽妙芝，原來一樣有心水，她力捧意大利，皆因她是球星馬甸尼的粉絲，「○○年我到意大利工作，一位model朋友招呼我到她好朋友的屋企，當時我不知她是馬甸尼的太太，她只說老公是AC米蘭隊長，又叫我等她丈夫回來合照留念，但我太累要先回酒店，結果錯過了良機。

「我鍾意意大利人，一定支持意大利隊，但老公話不可以看輕美國隊，一樣好波。」

歐陽妙芝與丈夫都是球迷，今年世界盃賽期如有時間，一定飛去南非睇波。

歐陽妙芝年前到訪球星馬甸尼家，可是當時她不知對方是著名球星，錯過合照機會。

去年聖誕，意大利球星馬甸尼好有心，訂做了兩件球衣，上面分別印有歐陽妙芝兩名兒子的英文名，還附上親筆簽名。

馬鴻銘小賭怡情

全國政協馬介璋兒子馬鴻銘是正宗足球迷，鍾意睇波又鍾意踢波，○二年他曾親身到日本看總決賽，巴西對德國，他回憶說：「現場好好睇呀，氣氛一流。」今年他決定留港睇波，因為覺得南非太遠，治安又差。

馬鴻銘坦言場場都想看，最後要看時間能否配合，他今屆看好阿根廷和巴西，最喜歡的球員是阿根廷的美斯，「美斯是國腳，好好波，速度好快。我期待看意大利、巴西、阿根廷和西班牙，南非都應該幾犀利，有天時地利人和。」

為了增加刺激感，馬鴻銘會同朋友一齊賭波打牙骹戰，「我鍾意同班朋友一齊看，落酒吧飲下啤酒、剝下花生，小賭怡情，一千幾百都OK，或者朋友牙骹戰，賭餐飯，刺激啲！」

馬鴻銘每場賽事都想看，力捧美斯好波兼速度快。因為太太蔡加敏對足球興趣不大，所以到時他會約朋友睇波。

康寶駒南非觀戰

前足總主席（九九至○七年）康寶駒，今屆將會跟隨大隊到南非約翰內斯堡，擔任世界盃紀律小組的工作。熱愛足球的他，雖然不能走到不同的場館欣賞賽事，但他卻安慰自己說：「幸好開幕賽和決賽都在約翰內斯堡舉行。」

康寶駒坦言絕不擔心當地的治安，「今次我係跟世界盃大隊去，出入都會一大班人，除非有恐怖襲擊啦，不過呢個可能性都好低。」

巴西和英格蘭都是康寶駒熱捧的球隊，「鍾意巴西係多年來的情意結，而英格蘭就因為睇得多英超的賽事，加上對球員比較熟，所以呢兩隊都係我今年支持的隊伍。」

康寶駒今屆會跟大隊到南非約翰內斯堡，擔任世界盃紀律小組，想看邊場波都話咁易。

琦琦同老公各有各睇

琦琦同丈夫任達華是足球狂熱份子，而且6年前她以歐洲國家盃作「安胎藥」，日日在家睇波打發時間。講到今屆世界盃兩夫婦就各有各看，她開懷地說：「到時我會放他假，等他同班男人朋友看，我同爹哋、媽咪看，我最鍾意食瓜子、話梅、台灣牛肉乾和檸檬王，又可以叫全女班朋友，一齊打邊爐，邊食邊看。」

琦琦捧英格蘭，尤其喜歡謝拉特和林伯特，「我年年捧英格蘭，對他們有好感，球技好好，四年前輸得慘，我都傷心了好耐，希望今年可以打入四強，老公就捧巴西。」

問琦琦有無計劃到南非看世界盃？她一口否決，「南非好鬼熱，不如舒舒服服在屋企。屋企部電視有成60吋，一樣好睇。」

琦琦世界盃期間會放丈夫任達華假，「老公鍾意同朋友睇，我就鍾意在家舒舒服服同父母一齊睇。」

陳細潔睇決賽歎紅酒

陳細潔（Abbie）笑言做甚麼都可以一個人，但睇世界盃一定要約埋一班朋友先夠氣氛。「今次我冇打算去現場睇，因為呢啲日子機位一定好緊張，我怕有得去，無得返呀！」

笑言最愛一邊睇波，一邊品嘗紅酒的Abbie，今年已約好一班好友返屋企睇波，為了增加刺激，她更會與一齊睇波的好友打賭，「我哋所謂嘅賭波，完全唔會涉及錢銀，只係以酒代錢，等大家睇得投入啲啫！」

陳細潔表示早年熱捧巴西隊，但今年轉捧西班牙。「其實我自己無話特別鍾意邊隊，只係身邊的朋友，個個都話今年西班牙運氣好好，有好大機會奪冠，所以我咪跟大隊支持西班牙囉！」

陳細潔有一個九九年效力曼聯球員的簽名足球。

陳細潔愛捧靚仔球員，年前皇馬來港作賽，她有幸與施丹合照。

陳鴻業湊B睇波兩兼顧

不是球迷的陳鴻業，只看四年一度的世界盃，「好Hit好多人睇，不看怕無話題。」支持英國、意大利、巴西和中國的他，欣賞卡卡（巴西）和C朗（葡萄牙），問他太太鄭詩韻支持邊隊？他搞笑說：「太太支持靚仔，上屆是意大利，今屆未知。」

今年剛添丁的陳鴻業，直言世界盃期間要全力湊仔，睇波都限時限刻，「世界盃期間都想趁下熱鬧，最大機會是看到凌晨那場，那時段BB正在瞓覺。」

陳鴻業表示今年和太太鄭詩韻全力湊仔，只可以看到凌晨的賽事。