動植物公園 愛‧不悔 狗



after都說有爸媽的狗狗像個寶！被 Simon和 Tania這對年輕夫婦當仔呵護愛錫到燶的「奀仔」，精神飽滿帥氣多了。

動植物公園
愛•不悔2009年07月16日

踏入 09年，至今，這個現象，有增無減。
芝娃娃約瑟爹利金毛/拉布拉多尋回犬北京八哥拳師貴婦歌姬史納莎聖斑納白威……全部身價動輒四位數甚至過萬起的名種狗，於過去或現在，先後出現在 SPCA香港愛護動物協會的犬隻領養名單之上。
SPCA喎！印象中，可領養的狗，從來離不開兩大陣營：混種唐狗和老弱病患，名種狗素來是稀客呀！到底是港人三分鐘熱度劣根頑疾已經病入膏肓藥石無靈，還是金融海嘯後遺症，樹倒猢猻散，狗壇尖子飯碗也都朝不保夕，被迫淪為領養大軍之列？
約瑟爹利「奀仔」便是因為愛協舉辦的領養馬拉松宣傳活動，現已成功 rehome的鮮活例子。


地獄 VS天堂

 


before因為一句「唔得閒」，長期被前主疏忽照顧的「奀仔」，毛髮打結四條腿像牙籤，瘦到根本唔見腳。


疏忽照顧

自小就有養狗經驗的 Simon和 Tania，兩口子組織小家庭後，一直渴望養番隻小型玩具犬，貪其尺碼的骰易照顧打理；又適合香港寸金尺土的蚊型樓房。不過恨還恨，卻從無打算買，「我覺得領養好過買，又可當做善事。」於是留資料登記輪候，但想也沒想過愛協領養的候選名單內，竟然連純種狗都有！「因為我媽咪都養咗三隻約瑟，所以一收到愛協通知問我有冇興趣領養『奀仔』，就即刻同公司請半日假，飛的去協會睇狗同辦理手續。」滿心歡喜的來到「奀仔」跟前，卻被當時的「奀仔」嚇窒：「真係好瘦好瘦，心口冇肉，全身見骨，就好似掛响豬肉檔架上的排骨，一歲狗得四磅幾。」忍不住問協會當值職員「奀仔」點解會被遺棄，答案是「前度主人因為返工時間長，唔得閒打理喎！」養狗養到不似狗形， Simon聽完當堂嬲到扯火！


365天日誌

 


接過「奀仔」返歸，第一件事，就幫「奀仔」條長條短打結的毛髮剪短重留，但剪完， Simon更加肉痛：「我一隻手指就可以起佢成隻腳。」


一有時間，兩公婆就帶「奀仔」四圍玩，坐地鐵搭渡海小輪；「『奀仔』好醒，一入袋就知有得去街街，從來唔吠。」


一歲之前無人理，但自從跟住好客的 Simon和 Tania，連帶「奀仔」亦相識滿天下。


今個農曆新年，「奀仔」著到身光頸靚利是：「成績好好，到三百幾蚊。」咦仲多過我！


自有寶貝「奀仔」，無論食瞓玩甚至屙，都成為 Simon的鏡頭主角。真的，其中一幅新鮮熱辣的「黃金」傑作， Simon都有 send與我共同「分享」。


一屋都見「奀仔」的狗床玩具，全部細細件：「總之啱阿仔口型同會發聲的，我就買。」可想而知 Simon有幾縱！


在 Simon和 Tania日日餵有機狗糧，營養膏和 Omega 3營養丸輔助下，「奀仔」就快邁向 6磅重大關，骨骼茁壯秀髮亮麗：「阿仔最鍾意梳毛，梳親都冧滋滋攤响人大髀唔願郁。」有對廿四孝父母貼身照顧，如今的「奀仔」真幸福。


 


 


從事廣告設計的 Simon，還幫「奀仔」做了張幾可亂真的爆笑身份證。


愛沒有底線

憤怒過後，和太太 Tania經過一輪電話商討，拍板了，就正式向協會填遞領養表。而根據協會正常程序，「奀仔」必須要排期進行絕育手術/杜蟲/打心絲蟲針等等例行二三事，才會正式將「奀仔」移交給 Simon。「這段時間，我一直忙於買狗床、狗仔日用品、狗玩具和網上四圍問人點幫狗進補，還因此而摷過大量相關資料。」做足準備，只為迎接「奀仔」回家那一天來臨，看得出 Simon的執着認真，亦聽得出初為父母的緊張心情。「我曾經都擔心過，自己會好似『奀仔』那位前度主人一樣，搞唔掂，就放棄！不過都只係一剎那念頭，事關我應承過『奀仔』以後都唔再讓佢受苦，無論點，我都會照顧『奀仔』一生一世，直到終老！」
常言道：鍾意小動物小孩子的男人，差不到哪裡， Tania和「奀仔」，有福了！

arrow
arrow
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄