李丞責　港姐 09' 冠軍劉倩婷　同車接阿媽忽然1周 840期 @ 娛樂八掛大分享☆

娛一叮

李丞責自8月尾被本刊斷正與09年港姐冠軍劉倩婷（Sandy）同車接阿媽後，便負上棄糟糠的罪名。事情發展峰迴路轉，李丞責隨後即自爆與前妻譚佩麗已辦妥離婚手續，還自己一個自由身，過億身家的李丞責變回城中筍盤。

不過「筍盤責」好快又封盤喇！本周二晚（20日），李丞責親口承認與劉倩婷蜜運中，對女友讚不絕口的李丞責，無懼離婚陰影勇闖第二春：「我欣賞劉倩婷率直嘅性格，我哋一齊好認真！」

「責婷戀」終於浮面，劉倩婷本周三（21日）更收到李丞責送嘅花，甜上心頭。

現年42歲的李丞責，入行做風水師23年，去年為無綫主持《中華福地》人氣急升，今年5月與09年港姐冠軍劉倩婷合作《香港玄案》撻着，為他的感情生活揭開新的一頁。

否認戀情有苦衷

今年8月28日，本刊率先踢爆李丞責密會劉倩婷，兩人同車去上環接載劉母外出，事後兩人夾定口供否認拍拖。本周二晚（20日），李丞責終於對本刊剖白，當日他是為了保護兩段感情，才有口難言。李丞責：「當日俾你哋影到同車，估唔到會咁大迴響，傳媒追訪咗幾個星期都唔停。當中有好多負面嘅揣測，傷害到我身邊嘅人。其實我同以前嘅另一半去年4月喺和平下分手，今年4月1日正式入稟法庭離婚，最近法庭終於正式頒布咗離婚通知。我想交代清楚我已經搞好曬離婚手續，亦好想發展第二段感情。」

有報道指李丞責負心兼風流，仲趕絕前嶽母，令對方臨老要在大埔街市打工賣菜，為此李丞責頗勞氣：「如果我真係花弗，十幾年來點會冇人講。離婚係因為夫妻感情再唔能夠維繫，佢（前妻）仍然有幫我做嘢，如果我真係有問題，從前嘅身邊人一定會出嚟講。有報道抨擊我矮，矮冇罪㗎！我用專業嚟搵食，寫我唔好，Ok！我食得鹹魚抵得渴，但唔好傷害我身邊人。我另一半嘅媽媽係一個好人，佢係菜檔股東，自食其力養大八個仔女，我好佩服佢，亦唔想件事影響到佢。我離婚係因為同以前嘅另一半相處唔到，性格係一個因素，我慣常遷就人，但感情唔係靠遷就。」

港姐愛踢拖

劉倩婷向來鬼妹仔性格，李丞責亦坦言最愛女友不拘小節，最欣賞佢唔姿整，平時踢拖出街都得。周二下午4時，外出後返回上環寓所的劉倩婷，也是踢住對人字拖。

曾外遊睇樓

舊人唔去，新人又點會來？李丞責與前妻因了解而分手，第二段感情萌芽3個多月發展迅速，那種甜蜜足以令他忘記失婚的傷痛。他親口承認與劉倩婷正在發展中：「愛情係要兩個人互相感應，太刻意追返來就唔窩心。Sandy係個知書識禮嘅女仔，佢份人好真、好率直又豪氣。對我嚟講，佢係一個好女仔，佢經歷好多。未識佢之前，啲報道傳佢斷背、有私生子，我同佢一齊唔會睇佢嘅過去，係睇以後。最初合作我當佢係男仔，相處後發現佢有另一面，同佢一齊好自然好舒服。雖然我冇同佢傾過以前嘅傳聞，但我識睇相，知道佢一定唔係斷背。」

對於女友比他細17年，李丞責說：「戀愛無分年齡，我唔會理。同車事件發生後，我哋互相支持，交心咗，感情增進唔少。不過仍然需要時間同空間去發展。（有冇拖過手？）私人嘢唔講，總之我哋係好認真，希望可以一路發展落去。（已經發展到曾經外遊拍拖？）我哋係去外地睇樓，順道遊歷一下。」

工作中收花

本周三（21日）下午，李丞責去花店買花冧女友，並吩咐店員下午6時許送去九龍灣Emax，當時劉倩婷正在錄影無綫節目《激優一族》。收到男友送花，劉倩婷甜笑回應：「（佢係咪第一次送花？）都唔係嘅。（點解你哋之前唔認拍拖？）相處中，感情要時間去了解。（係咪因為佢搞離婚嘅嘢未定唔安心？）呢排好多負面新聞，佢亦多咗關心我，了解多咗。（發展成點？）最近大家都忙，冇時間見面，平日都係靠電話同短訊聯絡。（你鍾意李丞責啲咩？）佢好細心，係一個值得欣賞嘅人，佢好識照顧身邊人。（媽咪係咪都好鍾意佢？）媽咪嘅睇法好重要，不如你哋自己問佢啦！（對呢段感情有冇信心？）依家我哋都係開心嘅，我都對佢好有信心。（聽講你哋一齊去過旅行，去咗邊？）哈哈！唔講喇！」

李丞責與劉倩婷今次肯大方承認戀情，咁咪唔使各大傳媒疲於奔命，追訪兩位主角啦！可以攞正牌拍拖的李承責仲話：「我哋唔係偷情，以後見到我哋可以大方叫我影張相啦！」

尖沙嘴訂花

周三（21日）下午5時，李丞責到尖沙嘴港威中心的花店訂花給女友，他在卡內親手寫上感謝對方支持與鼓勵的字句，雖然冇寫I love you，但都好有心思。

收花冧曬

周三下午6時許，正在九龍灣Emax錄影《激優一族》的劉倩婷，臨收工收到李丞責託花店送來的花，即場拆開張心意卡。知道送花者係李丞責，劉倩婷攬住紮花甜笑話：「我唔係第一次收花！」

前妻已成過去

李丞責強調與前妻譚佩麗是和平分手，離婚不涉及第三者。記者問他有否批算自己會離婚，他說：「我對愛情好執着，想扭轉命運，但原來好多嘢係定數。」

楊崢純屬虛火

去年李丞責與楊崢因合作《中華福地》而認識，當時李丞責已和前妻感情破裂。記者問他是否曾與楊崢拍拖，他說：「好似葉翠翠同陳敏之咁，我哋只係朋友。」 ####

周二晚（20日），李丞責向本刊記者剖白與劉倩婷的戀情，情深款款的李丞責話：「我會盡我能力發展呢段新感情！」

今年8月28日，李丞責與劉倩婷被本刊記者撞破同車前往上環帝後華庭接劉母。兩人表現尷尬，李丞責抿起嘴唇，劉倩婷一臉愕然。