揭吳浩康再沉迷藥物　莊思敏決絕掟煲忽然1周 837期 @ 娛樂八掛大分享☆

藝人感情事變幻莫測，育有兩子的謝霆鋒和張栢芝選擇離婚收場，楊思琦和李泳豪更由分手升級至罵戰。本刊收到消息，拍拖五年，由原本不被看好到談婚論嫁階段的吳浩康和莊思敏，原來亦已分手近一個月。
據知，吳浩康今年初因夾band關係認識了一班志同道合的音樂製作人。在其中的豬朋狗友引誘下，終於按捺不住再度沉迷藥物。莊思敏發現後當堂心死，立即決絕掟煲。周二（9日），莊思敏亦無奈向本刊承認：「我哋係分咗手成個月。」
原本一心一意娶莊思敏過門的吳浩康，似乎還未接受被撇現實，周一（8日）還向本刊記者說：「我依家努力儲緊錢，買層樓先同佢結婚。」事隔兩天，他才主動投案承認分手。

今年28歲的吳浩康（Deep），在08年出唱片後就一直被所屬公司英皇娛樂投閒置散。馬死落地行，他除了兼職教泰拳賺取生活費外，月前更成功考取保險經紀牌照，積極做人，今年還計劃與拍拖五年女友，31歲的莊思敏（Jackquelin）拉埋天窗。

band房通宵開餐
本身家住藍田麗港城的吳浩康，一直希望盡快儲錢買樓結婚，而身為拿督女的莊思敏，多年來都沒有介意男友的家底不及自己，對於結婚一事亦未有要求太鋪張，二人共識最快明年初拉埋。不過今年初，吳浩康突收到公司通知，建議他轉以樂隊形式出碟。於是在半年前，他便開始埋首夾band，此舉亦間接令他和女友一步步走向分手。吳浩康在夾band期間曾試過一星期有五晚在band房練習，每晚更練到通宵才捨得走，亦因此再度沉迷藥物。「band房不嬲都烏煙瘴氣，個個吞雲吐霧都不特止，有啲仲好鍾意依靠藥物，話錄音都會投入啲喎。阿Deep就咁俾班豬朋狗友薰陶咗，夜晚試過喺一間VIP房開餐㖭。」知情人士說。
據知吳浩康對自己再度沉迷藥物的行為深感後悔，曾向這班損友揚言：「唔會再有下次。」不過紙包唔住火，這件事最終被莊思敏一位密友得悉，輾轉下再傳向她耳邊。「Jackquelin咁耐以嚟一直冇嫌棄過阿Deep，好信阿Deep，最初佢甚至唔信呢件事，覺得有人想離間佢哋感情。」為求追尋真相，莊思敏曾經與吳浩康當面對質，但結果卻令她大為失望。知情者透露：「阿Deep喺嗰刻認咗，仲喊住同Jackquelin誓神劈願話唔會有下次。」

瞞住女友風流
其實吳浩康和莊思敏拍拖以來，男方亦曾瞞住女方「沙沙滾」，有次莊更親耳聽到男友與友人講電話時直言想偷食。「阿Deep鍾意夜蒲就係人都知。Jackquelin咪惟有經常同佢一齊出去實佢囉，但有次竟然聽到佢同個friend講話想溝一條新女，Jackquelin火都嚟，不過都吞聲忍氣，但到知道男友再食番呢啲嘢，就真係接受唔到。」
據知莊思敏發現吳浩康再染惡習後，已多次主動向他提出分手，無奈吳一直未有正面回應，還依然對外宣稱二人有結婚打算。「Jackquelin覺得人一定要遠離呢瓣嘢，再同阿Deep繼續落去都唔會有將來，不如一刀切好過喇！」

以為做保險好折墮
周一（8 日），吳浩康接受本刊訪問，他非常樂意談及自己轉投保險行業，但就未有透露已與莊思敏分手，更對記者話會努力儲錢迎娶莊，他說：「好多人覺得我冇得做歌星好折墮，但我從來唔會求人買（保險），亦有人challenge我呢份工做得唔會長。不過我好有信心，依家香港人對保險意識強過以前好多㗎。之前都嘥咗好多時間㗎喇！我依家努力儲緊錢，買層樓先同女朋友結婚，跟得我嘅，都唔想佢要改變依家嘅生活素質。」

望吳浩康生性做人
周二（9日），記者就分手一事向莊思敏求證，她無奈向記者承認事實，對吳浩康沉迷藥物一事則未肯正面回應。
記：同阿Deep分咗手？
莊：……係，我同佢分咗手成個月，大家係和平分手嘅。
記：係咪因為佢再度沉迷藥物而導致分手？
莊：我唔可以同你交代係咩原因㗎喎……總之大家喺生活習慣上有啲唔同啦！
記：你哋依家仲有冇聯絡？
莊：我哋仲係朋友，希望佢以後生生性性，祝福佢有一個更好嘅將來。

避談沉迷藥物
周三（10日），即莊思敏向本刊承認分手第二日，吳浩康主動致電記者，他開口第一句即說：「唔好意思同你講咗大話，因為嗰一刻，大家都未有共識點樣講，我哋嘅分手好和平嘅。（係咪因為你再沉迷藥物？）……唔係基於呢樣嘢，我哋嘅溝通存在問題，分手都唔一定要有咩大件事。（咁你依家係咪有沉迷藥物？）我依家日日都返工，冇時間。不過之前都聽過有人傳我呢樣嘢，又同Jackquelin講同我一齊會害死佢。我唔想再多講，總之大家五年嚟好努力維繫呢段感情，分手真係好可惜！」
畢竟吳浩康和莊思敏拍拖以來經歷過不少患難、是非，可惜最終無緣做夫妻，可惜之餘，只能怪吳浩康不潔身自愛，斷送事業和愛情。

微博嗌心痛
畢竟莊思敏與吳浩康過了五年漫漫情路，如今結婚變分手，難免心痛，近日她更在微博透露分手心情。

情路是非多
吳浩康02年出道就有「新人王」稱號，前途一片光明，惟04年因藏毒而留有案底，形象即時下滑，自此星途黯淡。其感情生活反而多姿多采，雖然正式承認的女友只有胡定欣和莊思敏，但彼此的轇轕似乎糾纏不清，鬧出不少是非。

收強姦恐嚇
莊思敏06年曾被指介入吳浩康與胡定欣（左圖）之間，艱苦經營之下才成功覓得愛郎。07年，傳出有人密謀將派人強姦莊思敏，叮囑莊出入小心，莊亦承認真有此事，「依家有啲驚，都會同做警察嘅uncle備案先。」至於吳浩康則認為是一場惡作劇。

爆電梯受辱事件
08年尾，死敵莊思敏和胡定欣在無綫電視城電梯內狹路相逢，有傳莊被人以「你着我對舊鞋咋！八婆！」辱罵後喪喊。事後莊直認曾被人在電梯內喝罵，而胡則否認事件，並暗寸有人別有用心。

懷疑女友不忠
去年11月，吳浩康突然在微博宣布分手，更怒斥「和她到了分手一刻，狗公們滿意了吧」，有指他懷疑女友不忠。事後吳承認因酒後有誤會，衝動下才講分手，翌日已經冇事，還在微博晒合照。

結婚變分手
今年2月，吳浩康坦言開始計劃結婚，並希望帶同莊思敏一齊揀樓，甜蜜到暈。當一眾朋友準備儲定人情，想不到上月兩人竟突然分手。

戀上8億身家拿督女
由於莊思敏和吳浩康的家境十分懸殊，故拍拖初時不被看好。莊思敏的父親是中國光大控股的主席，亦是馬來西亞拿督，估計身家超過八億，相反吳浩康則來自小康之家。

莊思敏去年和妹妹莊思明租住豪宅貝沙灣，出入亦有司機保母車。相反吳浩康自02年參加新秀入行以來，一直與家人居住藍田麗港城。

1年前公開隆胸
####

31歲富家女莊思敏與28歲吳浩康拍拖5年，到談婚論嫁階段，可惜上月兩人忽然分手收場。記者最初問到吳浩康與莊思敏的感情狀況，他仍死撐：「我儲緊錢買樓結婚！」