賭王爭身家事件中，二房長女超瓊一直拒絕表態。直至周三（ 26日）當日，才在三房家現身，明顯和三太聯成一線。
一、四房結盟
25/1晚上 11:00三房發聲明
三太陳婉珍急 call傳媒，在其布力徑大宅與超雲召開記者會。三太代賭王發聲明指：「屋企嘅事閂埋門一家人自己解決，好容易，慢慢傾，一場誤會嚟，家人之間冇欺騙成份。」手寫聲明附有賭王簽名。又指賭王當晚在其家中過夜。
26/1早上 11:30睇貓紙讀稿
賭王在三太大宅內首度露面，並接受傳媒訪問。訪問中賭王親口證實財產轉讓安排。其間全程照着面前的貓紙讀，每說一個字更要停頓數秒。
26/1下午 3:50四太夾賭王回家
賭王在三太家中發表聲明後不久，四太上門藉陪賭王食午飯為由，要求帶賭王離開三太大宅，但不得要領，逗留 20分鐘後便離開。四太奪賭王失敗後，至三時左右再折返，至三時五十分，成功帶賭王返回淺水灣大宅。
接收百億資產
其實，早在三個月前，四太已經冧掂賭王，答應把三、四個物業轉贈給她，據知當中連市值十億的淺水灣道 1號大宅，亦已經成為四太囊中物。上個月，四太已經搬入大宅，不過為免惹人話柄，她對外指因自己間屋裝修才暫住。近水樓台，四太當然想進一步親近賭王。
而與四太水火不容的二房，自四太遷入賭王大宅後，為免大家面左左，每次探賭王前都會事先通知管家，好讓四房人迴避。二房眼見四房拉攏大房，佔據賭王大宅作基地，亦急謀對策。知情者話︰「四太住咗喺大宅，二房要探老竇好唔方便，賭王惟有定時每個星期抽一、兩日返二太屋企食飯。」
何超瓊得悉賭王將物業及 57.6億澳博股份轉贈給四太後，曾就此事當面向父親詢問。
十億大宅官非不斷
根據堪輿學家譚雲龍指出，何鴻燊位於淺水灣道 1號大宅，風水超靚，皆因對正兩個靚山，有財有勢。他說：「座向是未丑，大宅對正武曲金山嘅山峰，回龍顧祖格，山夠高，係富中取貴。不過有少少瑕疵，就係個山崩咗少少，會對健康有影響。而望左邊嘅金鐘覆釜山，左邊有青龍，高聳有力，山形似金鐘山，係十貴之一，住咗人會好富貴， 2004年後，間屋嘅地運女人住會較旺。
「座向今年（虎年）五黃到座，爆發災難，賭王 1922年出生，命犯交劍煞，交劍煞主官非、口舌，如果依家裝修、動土仲大鑊。而今個月係月破， 1月 6曰至 2月 3日間屋因犯月破會有好多麻煩。而賭王 2010年至 2012年，犯本命三煞，呢三年都好凶險，要特別注意身體健康。」
家族成員亂使錢
最辣㷫何超瓊的，是近日有家族成員，竟然將一些個人開支，放在一間上巿公司開數。知情者話︰「有人愈嚟愈大使，每個月由公司基金撥出嘅家用愈攞愈多，試過一個月使成三千萬，有個月仲離譜，其中五百萬係用嚟買珠寶同買衫。 Pansy見條數咁大，曾經召咗個會計嚟了解事件。最後知道有人亂 fing錢，於是就呢件事喺賭王面前投訴。」
何超瓊見有人出招爭身家，可惜二太藍瓊纓近年身體轉差，不便出面，於是便找三太做「家長」角色，齊齊抗衡四太。為免四太再有進一步動作，所以二、三房就來個先發制人，游說賭王將澳娛的股份平分予她們兩房，藉此攤薄四太在澳博的勢力。
周一，澳博突然停牌兼發通告，指賭王將個人的 4.8%澳娛股份，轉入旗下公司 Lanceford，然後再由 Lanceford高調宣布公司由三太陳婉珍及二房五名子女各佔五成股權。消息傳出後翌日（周二）下午 1時，賭王的律師高國峻卻向傳媒表示，指澳娛股份的安排未經賭王同意，當中可能涉及詐騙，更形容行為跟騎劫無異。同日二房的超鳳即公開父親親筆簽字的文件以示清白，更即時到淺水灣大宅接走賭王，先返二太家開家庭會議。
知情者話︰「賭王返到二太屋企後，當時超鳳好激動，喺老竇面前喊晒，又嬲到拍枱，話唔忿氣俾人擺上枱。而在場的超儀亦好火，話家姐做嘅都係為個家好，但就被人講到罪人咁。賭王見兩個女咁激動，猛咁話得嘞、得嘞，叫佢哋唔好喊，又話一家人點都唔會告。」知情者又透露，二房要將賭王接到二房大宅，是因為怕賭王淺水灣大宅有四太的線眼，惟恐隔牆有耳。
16/1服侍賭王換便喉
兩周前，賭王秘密入養和換便喉，和做身體檢查，而是次入院全程由四太負責，貼身侍候賭王。上周日（ 16日），本刊獨家拍得四太探完賭王離開的照片。記者追問四太賭王入院一事，她只笑而不答。
開記招炒律師
為免夜長夢多，二房當晚齊齊將賭王帶到三太大宅。經二、三房商討後，於深夜 11時許，三太通知傳媒，代賭王發聲明，內容大意指一家人的糾紛會閂埋門解決，不會訴諸法律，並稱已解僱了高國峻律師。
當晚，二房的超瓊、超鳳及賭王齊齊留在三太大宅過夜，翌日三房便 call齊醫生及電視台來拍攝，寫好台詞讓賭王宣讀，而反應有點呆滯的賭王，鏡頭前徐徐讀出今次澳娛分股是他「經過深思熟慮的決定」，並指不再需要 Gordan（律師高國峻）再為他處理。最後更強調：「如果再有人持他簽名的字條再修改，內容一定不真實。」目的顯而易見，就是杜絕有人再推翻二、三房平分 Lanceford股權的安排。
二房分最多
上月中，賭王把自己在澳博 7.63%股權轉讓予四太，但本周一，賭王突然盡分身家，將最值錢的澳門娛樂 31.65%股權，接近平均分配給二房五個子女和三房陳婉珍，但四房梁安琪卻無份。二房何超瓊控制的信德本身持有澳娛 11.5%股權，兩者加起來合共 26.65%，較霍英東基金 26.57%還要多，一躍成為澳娛最大股東。
禮物無得收回
何鴻燊以「禮物」形式送贈二、三房的澳娛股份，之後可否收回禮物？律師黃國桐表示：「唔可以，禮物送咗出去就唔可以攞番，除非口頭話送但未送就可以收回。（可唔可以追討所送贈嘅股份？）佢可以追討，但機會近乎零。（如果證明賭王簽名時神智唔清醒？）咁點解佢家出嚟又清醒？要攞出證據囉，都可以話係誤導情況下簽，又可以話有人用槍指住佢迫佢簽，亦可以話文件係偽造，但要攞出足夠證據，所以可以攞得番機會係好低。」
至於賭王在公開的三封信件及聲明中，所簽下的名字，律師表示無論內容是什麼，一切以最後日期的簽名作實。若要推翻簽名，則需要有醫生證明當事人在簽名時是否清醒。
四太現身出招
周二未見露面的四太，周三於賭王宣言短片播出後，下午 2時左右，突然現身三太大宅。四太到場後，二房三姊妹即時眼冤走人。而四太在三太家中逗留半小時便離開，然後再落銅鑼灣出席保良局的活動。記者上前問她是否到三太家中開家庭會議，她表示︰「唔係！（賭王係咪應承將淺水灣大宅送俾你？）冇咁嘅事，係都係俾大房啦！總之所有嘢以賭王講嘅作準，我冇嘢好回應。」
保良局活動完了後，四太於三時又折返三太家中接走賭王，然後返回淺水灣大宅。
其間，四太被問到今次爭產風波，她初時甚為得體說：「呢啲花邊新聞我唔回應！（管理層變動，會唔會影響將來合作？）我從來都會聽取投資者同大家嘅意見，共同做出成績，我哋上個月都同股東、大股東交代……」不過當記者提到依家大股東係三太時，四太即提高聲浪話：「我哋有好多股東，唔好話大股東小股東！所有有買澳博股票嘅人士，都關心公司發展。」
律師有片在手
四太與賭王返大宅，而大房的超賢原來早已在大宅等候。四時半，高國峻律師又再到大宅，逗留廿分鐘後，便去高等法院。有傳他是向法庭申請禁制令，禁制某些家族成員埋賭王身。
記者上前問他是否替賭王處理財產問題，他卻封嘴表示不會回應，但就向傳媒透露有一段在醫生見證下的賭王短片，並強調自己仍是何鴻燊的代表律師：「我不會理會三太在深夜、尤其是當何鴻燊仍在睡覺時發出的聲明，我們會繼續採取法律行動。」
高國峻接受英國《金融時報》訪問時表示，「我們持有賭王昨日早上拍下的一條錄影片段，片中賭王對住鏡頭說：『幫我追回來（ Get me back）』。」據知有人一早已經部署好拍這段短片，更找來醫生證明當時賭王的精神狀態是清醒，準備日後作為打官司的證據之一。
晚上，大房何超賢再發聲明，內容指父親會將身家平分四份，而大房亦聯絡了二、三房，但暫時並未有回覆。賭王親自現身欲解決家族爭產風波，不過，看來戰爭不但未有平息，似乎好戲還在後頭。
撰文：娛樂組
攝影：攝影組
留言列表
