廣結富豪網絡
據知 X小姐是選美出身，出道後不久就與富豪扯上關係，無論在港，甚至國內都曾經出席多個富豪飯局。近年 X小姐的工作量不多，最廣為人知是她和富豪相戀，可惜最後分手收場。不過 X小姐為人進取，與這位富豪相戀期間，除了吸金千萬外，更憑自己當時「阿嫂」身份，與多位隱形富商打好關係。斷了愛情的 X小姐因此並未斷了自己米路，靠自己的人脈網絡成功升格為淫媒。
中介人抽佣實況
據一位娛圈中介人透露，游說女星陪老細冇得夾硬嚟，不自願做不道德交易的女星大有人在。不過亦由於「外快」的確可觀，有部分等錢使的女星會接受這個搵快錢方法，至於只是陪富豪食飯，抑或肯提供特別服務就因人而異。她還透露了行內收費。
見面飯局
女星一般飯局價由 3萬至 8萬不等，中介人從中抽佣約 30%。
特別服務
一般二、三線女星收費約 12至 30萬不等，而一線女星則大多自訂身價，再由中介人與富豪代為斟洽。一般由數十萬至百萬不等，中介人一律抽佣約 20%。
姊妹花拍住上
X小姐旗下佳麗眾多，唔憂冇生意，淨係佢嗰兩位上年因拍電影而熟絡嘅高腳姊妹花，每個月都為 X小姐帶嚟 6位數字收入。姊妹花今時今日咁襟撈，都係由於 X小姐教女有方。話說 X小姐有次收到有錢佬急 call揀女，冇貨之下惟有呃姊妹花出嚟 high tea，實則係俾有錢佬驗貨。姊妹花見到個有錢佬面目可憎，馬上耍手擰頭，點知 X小姐竟然挾住姊妹花去廁所，逼佢哋埋牆角，軟硬兼施咁利誘佢哋。出返去之後， X小姐仲親身向個有錢佬施展冧功，又餵又錫人耳仔，姊妹花對 X小姐嘅行為五體投地，自此亦踏上呢條歪路，仲撈到風生水起。難怪最近佢哋三個人，冇乜實際工作都身光頸靚，周身名牌。
吸納佳麗貨源
X小姐對於旗下人馬的要求甚高，首選當然是與她一樣，都是選美出身的靚女。知情者說：「 X小姐自己有一本相簿，入面嘅女星全部都係選美佳麗，有齊晒年齡、三圍尺碼、選美年份同得到乜嘢名銜等，資料好詳盡。」據知近兩年 X小姐對電視台選美比賽十分留意，經常透過傳媒實各佳麗走勢，甚至親自打電話俾電視台高層，套取一班大熱倒灶佳麗的聯絡方法。「 X小姐好叻，試探班佳麗嘅口風，如果啲佳麗講到明唔介意撈多瓣， X小姐當然明買明賣，清清楚楚講晒工作性質。有啲佳麗可能十五十六， X小姐都會盡量游說佢哋，仲以自己嘅經驗為例，證明俾佢哋睇啲錢係幾易搵。」知情者說。
旗下兩佳麗搶手
X小姐為免飯碗遭傳媒揭破，會揀選港島區五星級酒店的中菜廳的貴賓房，作為飯局地點，而且她警覺性很高，當她懷疑有傳媒跟蹤的話，情願將飯局押後，也不願自己的真正身份曝光。至於 X小姐旗下女星的身價普遍屬海鮮價，每次出席飯局至少收取約五位數字的見面禮。如果富商在飯局驗明正身而有興趣再作進一步接觸， X小姐就會再與這位富商私底下傾價。據知 X小姐每次在事前會向女星抽二至三成佣，作為中介人費用。現時她旗下有兩位擁有模特兒高䠷身形的佳麗最炙手可熱，成為不少富商的搶手貨。
姚子羚談親身經歷
對於女星被邀出席睇辦飯局， TVB新紮姐仔姚子羚亦坦言曾經被邀出席類似的飯局。她說：「聽過多好多人講呢啲嘢 o架喇！試過有朋友約我出去，去到好似安排晒啲位咁，仲叫啲女仔要間開坐。我覺得好奇怪，咪詐詐諦諦走咗去囉！不過我唔會因為咁，朋友嗌到都唔去，總之自己小心就得，覺得有問題咪走囉。一見到有利是同禮物收就知咩事啦！」
縱然不少女星像陳茵媺、鍾嘉欣等都聽聞過淫媒事，但入行五年的葉翠翠和呂慧儀卻異口同聲表示從冇聽過。葉說：「間唔中就會炒作呢啲事，但我冇接觸過咩淫媒。」呂慧儀更誇張說：「冇聽過飯局，忙到連食飯都冇時間。」
港姐亞姐入會搵老闆
「慧妍雅集」同「仁美清敘」係選美兩大巨頭衍生出嚟嘅慈善團體，下下慈善行先，所以嚴謹揀選會員。好似有個過氣佳麗「鴨仔」，曾經都做過會員一年，不過「鴨仔」喺嗰年竟然頻頻借做善事為名結識一班富家子弟，試過誇張到主動打電話俾某個富二代猛約人去街，呢啲擺明搵老細嘅惡行，當然逃唔過其他會員嘅法眼，於是所有會員夾晒口供，取消咗佢嘅會員資格。
搵食行遠啲，好似「公仔箱」就識撈好多，明知要經常要返國內合作搞活動，就事前打晒電話收風活動有邊個老闆助陣，再暗盤同班佳麗傾，所有交易都喺國內一次過搞掂。於是「公仔箱」至今依然屹立不倒，仲係會員！
嚴選佳麗會員
X小姐的出現，間接整衰「港姐」和「亞姐」個朵。因此分別代表上述兩個選美成員組成的「慧妍雅集」和「仁美清敍」為了一洗淫風，會員每年除了召開會議去嚴選會長外，如發現有會員涉及不道德交易或曾出席過富豪飯局，就會立即取消她們的會員資格。
雖然淫風籠罩，但「慧妍雅集」會長趙雅芝亦曾出面力撐港姐，她說：「我冇聽聞飯局傳聞，我哋有 50至 60名會員，近幾年嘅港姐都係會員。」
不過去年 10月，原是擔任「仁美清敍」秘書長的李妮，就突然被傳與會長黎燕珊不和，事後李就以該會透明度不高為由主動退會。
Z小姐從中落格
有龐大嫩口佳麗作為班底， X小姐當然火速成為行業風頭躉，亦搶去不少老一輩淫媒的生意。據知近月有一名亦是選美出身，曾經任職公關工作的中介人 Z小姐，安排女星出席富豪飯局後，竟然私吞富豪送俾班女星的「利是」。知情人士說：「呢個 PR喺呢行都出名，不過佢上年有一段時間好奇怪，成日約佢身邊啲女星朋友出嚟食飯，席上一個女星事後話，去到先知道係富豪飯局，分開晒班女星嚟坐。某幾個女星話要走，但個 PR就解釋呢班有錢佬只係生意上嘅朋友嚟，仲話班女星冇義氣。好彩班有錢佬都幾禮貌，冇摸手摸腳，不過後來俾人發現咗原來當晚嘅飯局，每位出席女星都有一萬蚊利是收，先知道呢個 PR從中落格。可能前排佢屋企出咗事，等住呢十幾萬周轉。」據知 Z小姐至今依然活躍娛圈，不過就已經與不少女星反面。
娛圈淫媒扯皮條事件無日無之，雖然有班女星不介意獻身搵快錢，但仍有藝人是潔身自愛。
應采兒爆淫媒挖女
娛圈充斥淫媒和經營不道德交易的女星，令到不少正牌藝人極為憤恨，早前就有敢言的圈中人大膽揭露這個娛圈歪風。
去年 9月，敢言的應采兒在微博踢爆有位好姊妹受到淫媒騷擾，游說她出席飯局。應采兒又直指其姊妹不是那種人，否則就被推入火坑。
採訪、撰文：娛樂組
留言列表
