左：試吓你係咪貪錢啫！（設計對白）
中：冇樓揸手點結婚！（設計對白）
右：抵你有今日！（設計對白）
娛頭
送樓縮沙　廖碧兒逼婚不成　林忠豪一個仙都唔俾
2011年01月13日

背住拍拖六年陳豪，搭上李澤楷表弟林忠豪（ Alastair）的廖碧兒（ Bernice）一心嫁人做豪門新抱，打鐵趁熱，一早向公司請定假，準備完成電視劇《依家有喜》後，焗林忠豪飛美國結婚。豈料林忠豪習慣講一套做一套，就連答應買樓給她作為結婚禮物的承諾，亦縮沙推得一乾二淨。拜金廖碧兒見勢色唔對，加上男方「吹水史」愈揭愈多，於是快速斬纜，自行了斷四個月戀情。
唔送樓，激走廖碧兒，大隻講林忠豪連早前公開答應贊助契姐戴蘊慧三百萬，替戴思聰開悼念演唱會一樣唔認數。戴蘊慧激動回應：「佢唔應該攞先人嚟抬高自己。」
請假結婚
月前被踢爆瞞住陳豪偷食林忠豪，幾乎晚晚到新歡屋企過夜的廖碧兒，形象直插，更拖累自己有份孭飛的兩套劇集，收視慘淡。以為有金龜林忠豪揸手，以後生活無憂，廖碧兒亦闊佬懶理，疊埋心水做少奶奶；據了解，她原來早已向公司請假，打算拍完電視劇《依家有喜》就嫁人。
「佢哋拍拖單嘢啱啱爆出嚟，兩個人仲係好 sweet， Alastair話 Bernice好想結婚唔做，仲同公司請咗假，大家諗住去美國註冊，佢又應承買層樓俾 Bernice做結婚禮物。後來 Bernice貪錢新聞愈出愈多，佢又開始收掣，四圍向朋友收料，仲話暫時 hold住，一個仙都唔會俾個女仔，試吓對方係咪貪錢先。所以佢同 Bernice講，嗌佢自己俾層樓首期， Alastair就負責供。
「其實佢都係得個講字，乜都吹一餐，到頭來都係唔俾錢。好似啲人以為 Bernice揸住個 Hermes手袋係 Alastair送，其實係陳豪幾年前送 o架，佢連一班人食飯都會特登早走唔夾錢，又點會送個成十萬蚊嘅袋俾女朋友。」知情者說。


本刊十二月初踢爆廖碧兒到林忠豪屋企過夜當晚，她手揸的 Hermes袋，是前度陳豪所送，據知林忠豪拍拖以來，未有送過禮物給女方。
 
林母莊月華對兒子跟廖碧兒結婚，她禮貌地回應：「唔會結婚。」隨即掛線。
 
一月五日晚，收工後的廖碧兒由老豆揸車接送到灣仔星街食日式燒肉慶祝生日，玩到十一點，再由老豆揸車返屋企，正日當天，她在微博放上蛋糕相，表示生日要開工，所以在前一天慶祝。


自從廖碧兒被踢爆背陳豪偷食林忠豪後，網民一致狂插，指她貪錢拜金。

拜金女現形
講到錢，算盡男女同時現形。吹水林忠豪講過唔算數，拜金女廖碧兒亦知道上錯船，送樓結婚事件告吹後，亦唔再嘥時間，先行撇，更在傳媒前跟對方劃清界線，以「人哋」來形容本來「好傾得埋」的朋友。
今個月五日晚，廖碧兒約了一班朋友及屋企人在灣仔星街食飯慶祝生日，完全無預林忠豪。


除夕當晚，廖碧兒和米雪等，一班《依家有喜》的演員出席倒數活動，佳節前夕被甩拖的她，明顯強裝笑容。
 
林忠豪泊在大宅門外的林寶堅尼跑車，不過車頭撞爛多時，身為愛車之人的他亦沒有拿去修理。
 
林忠豪堂細佬林忠澤跟奀星梁慧嘉拍拖參加君悅除夕派對，據知林忠豪曾經跟堂細佬拗手瓜爭女，結果梁慧嘉揀了較為踏實的林忠澤。（《蘋果日報》圖片）
 
大除夕夜，林忠豪單拖到君悅開派對，據知在場中他表明單身，更睇中名模 Jessica C的鬼妹師妹。（《蘋果日報》圖片）
 
慘變「雙失」的陳豪，一臉憔悴開工拍《心戰》，被同劇的邵美琪（左）和陳茵媺讚「好仔」，仍難掩落寞心情。

得個殼
「所以大除夕晚 Alastair都係一個人去君悅個 Ball，佢喺入面周圍話俾人聽自己係單身，見到 Jessica C.嗰師妹，仲即刻自我介紹，猛問人哋攞電話，其實 Alastair一向都鍾意追鬼妹 model，事關啲鬼妹易追到手，又唔需要點使錢，佢哋通常留喺香港幾個月，之後就會去第二個地方做嘢，貨如輪轉，咁佢就唔怕俾人篤爆，事關佢真係乜都充，有時經過李嘉誠旗下嘅酒店同超級市場，就同啲鬼妹講自己有份。就連啲員工都話佢得把口，好多時月頭出糧就變月中，大家都笑廖碧兒以為釣到金龜，其實釣到隻龜殼，入面無餡嘅，佢哋散係遲早嘅事。」知情者說。
對於兒子跟廖碧兒有過結婚打算，記者向跟他同住的林忠豪母親莊月華求證，她斬釘截鐵說：「唔會結婚，唔好意思。」隨即掛線。而有指一直不滿兒子恃住跟李嘉誠有親戚關係，周圍吹噓的父親林孝文，對兒子跟廖碧兒分手一事亦不願多談：「佢私人事，都係叫佢自己答番。」


跟汪阿姐合作的《居家兵團》收視差，廖碧兒被指形象負面累街坊，但獲汪阿姐出頭平反。
 
眼見愛女跟林忠豪拍拖後，被外界指為貪錢。廖碧兒父母即挺身撐愛女唔係拜金，可惜父母力撐都起唔到反彈作用。
 
昔日外界對廖碧兒與陳豪這對情侶非常受落，故二人經常擺明以情侶檔接 job，攞正牌拍拖兼有錢落袋。但飛起陳豪揀失匙金龜後，廖恍如失去福將一樣，形象直插。


 
本月六日廖碧兒正日生日，但當天壽星女下午出席完宣傳活動便返電視城繼續開工，男友全程無影。

大隻講
講就天下無敵的林忠豪，對上月中曾答應契家姐戴蘊慧，贊助三百萬支持她為父親戴思聰舉行悼念慈善演唱會的承諾，照樣縮沙無下文。據了解，戴蘊慧於上星期與對方商量有關籌備演唱會事宜，提到要俾錢落訂租場地，林忠豪由最初推說要得公司 CEO批准，到後期扮忙甚至索性唔覆電話。終於知道對方大隻講，戴蘊慧即時更改計劃。
「當初同佢講幫爹哋搞悼念演唱會，係佢自告奮勇要幫我出錢，我都同佢講我唔係冇資金，但佢堅持要俾晒錢，到見咗報好多人都知佢會出錢，佢就一味耍我，最後連電話都唔接，失去聯絡。我覺得佢唔做唔緊要，但唔應該利用先人（戴思聰）嚟宣傳，抬高自己，咁樣係好唔尊重，好過分嘅事。」戴蘊慧激動說。


早前林忠豪陪戴家兩姊妹到東亞娛樂開會，洽談年底舉行悼念戴思聰的慈善演唱會「桃李戴春風」，事後還向本刊聲言會捐出三百萬做製作費支持。怎知扮大慈善家攞咗彩，轉頭就縮沙。
 
去年戴思聰病逝，當時林忠豪以契細佬身份陪伴戴蘊慧打點喪禮，以為藉此引起傳媒注意，可惜當時外界不知他是李澤楷的表弟，令他白做一場。
 
身為李嘉誠姨仔莊月華，鮮有出席 ball場， 01年，她出席旗下公司中南鐘錶慈善活動。
 
父親林孝文是著名外科醫生，一直不滿兒子到處自吹自擂，當記者問他有關林忠豪分手一事，他亦一副愛理不理態度。

死撐有聯絡
連日來，記者發現林忠豪不是留在淺水灣屋企，就是返灣仔公司，就連午飯都叫司機買外賣。致電他求證跟廖碧兒分手一事，他回應：「私事唔講，（廖碧兒本來計劃好結婚？）都話私事唔講。」
至於臨時縮沙贊助演唱會，他哦一輪才回答：「俾番主辦單位戴蘊慧宣布，我哋傾緊好多嘢。（你俾咗三百萬未？）呢件事唔回應。」
得不償失
去年尾，廖碧兒被踢爆瞞住拍拖六年的陳豪，搭上李澤楷表弟林忠豪，戀情曝光後一個月，形勢大逆轉。被指「貪錢女人」的廖碧兒，形象插水，至於一度「雙失」的陳豪，反而成為城中「鑽石王老五」，得與失，一線之差。

陳豪
感情：四十歲的陳豪，自從被廖碧兒當「老襯」後，即被視為「筍盤」，被全台女藝員「吼實」，正跟他合作的陳茵媺公開讚他有風度，還說好男仔自然多人吼。
人氣：被廖碧兒降為「人哋」的陳豪，獲各方同情，他仍一度維護女方，但對女方大話連篇指互有聯絡，陳豪終忍不住踢爆謊言。
事業：失視帝再失戀後，陳豪早前獲演藝人協會頒發「演藝人 2010電視傑出男演員」獎，總算有交代。憑住「好男人」形象，獲各大小品牌和活動支持，繼續密密搵。

廖碧兒
感情：瞞住陳豪釣金龜，點知光棍遇着無皮柴，過去的除夕夜，二人各有各出席倒數活動，男方宣布自己單身，剛剛三十二歲生日的廖碧兒，即變「剩女」。
人氣：一度暗屈是陳豪放料公告新戀情，賊喊捉賊的廖碧兒，被各界大肆批評，有網友更揚言罷睇廖碧兒。
事業：形象插水，拖累兩部正播映的新劇《居家兵團》和《依家有喜》，收視見新低，《居》劇更低見 22點。更不似以往跟陳豪情侶檔搵銀，自斷財路。 
陳豪
 
廖碧兒

散餐王
富二代林忠豪同廖碧兒爆出緋聞，戀情四個月極速玩完。據知男方原來係散餐王，口味仲好一致，專攻鬼妹仔。但礙於出手低，就算追到手，都係得幾個月貨仔。


Ana R
二人經朋友介紹認識，男方本來發力狂追，但聽到身邊人話鬼妹 Model信唔過，即快速轉移目標。
 
盧恬兒
同樣係富貴人家出身的盧恬兒，一度是林忠豪力追對象。不過曾是家族資產過百億的霍啟剛前女友，盧恬兒一早睇出對方無料到，不為所動。
 
韓君婷
「鬼聲鬼氣」的韓君婷是林忠豪蒲腳之一，不過一個孤寒，一個飄忽，最後無疾而終。

打回原形
女藝人恨嫁有錢人，上岸做少奶奶雖大有人在，但唔係個個幸福，遇人不淑，分分鐘人財兩失。


陳法蓉
陳法蓉從陸詩韻手中撬走據稱身家有十億的「油王」朱明，一心嫁入豪門，點知中空寶。男友被踢爆原名叫陳駿，十年前欠債後玩失蹤兼改名， 08年再遇上金融風暴欠債，陳法蓉被指誤墮「桃色騙局」，人財兩空。
 
楊采妮
玉女楊采妮，歌影視發展搵唔少， 97年高峰期宣布退出，與馬來西亞籍富商男友邱韶智，在大馬合資開形象顧問公司，怎料對方是空心大少， 03年公司執笠欠下不少債務，兩人分手， Charlie要復出搵錢還債。
 
黃奕
第二代「小燕子」黃奕， 09年跟相識唔夠個半月的金融才俊姜凱閃電結婚，婚後三個月爆出兩人原已閃電離婚，有指男方投資失利陷入財困，黃奕闊太夢碎。

廖碧兒逼婚失敗 自行了斷與李澤楷表弟戀情

廖碧兒得不償失
廖碧兒背著拍拖六年的陳豪，搭上李澤楷表弟林忠豪(Alastair)，一心想嫁人做豪門媳婦。打鐵趁熱，一早向公司請好假，准備完成電視劇《依家有喜》後讓林忠豪帶她到美國結婚。豈料林忠豪習慣講一套做一套，就連答應買樓給她做爲結婚禮物的承諾也推的一幹二淨。拜金廖碧兒見聲勢不對，加上男方大話史越揭越多，于是快速斬斷，自行了斷四個月的戀情。

不送樓，氣走廖碧兒，林忠豪連早前公開答應贊助幹姐姐戴思聰女兒戴蘊慧的三百萬，替戴思聰開悼念演唱會一樣不認賬。戴蘊慧女兒激動回應：“他不應該用別人來擡高自己。”

arrow
arrow
    全站熱搜

    stacy4life 發表在 痞客邦 留言(0) 人氣()

    E-mail轉寄