娛樂八掛大分享☆

 

 

隨黎明情願為廿年宿敵劉德華做佈景，都唔俾面去飲楊千嬅喜酒，令兩人被傳不和升級，傳聞再度炒熱，黎更被指明剃千嬅眼眉，實情卻是他 另有苦衷。

消息指，近日黎父黎新生多次到黎、樂的上水愛巢探望新抱，有人跟街坊寒暄期間一時興奮自爆：「我就做阿爺！」令樂基兒有喜兩個月的消息曝光，同時本刊亦發現樂基兒狂掃香薰安胎。

據稱，在黎父勸誡下，為防喜沖喜（喜事撞喜事），黎明夫婦唯有缺席千嬅婚宴，由於懷孕未夠三月，黎明暫不能明言，只好硬食死貓。據風水學家程仲蕎師傅解釋：「因為BB仔小氣，喜沖喜分分鐘會小產！」咁高風險，黎生點敢飲呀！

至於24日（周五）千嬅的結婚Party，由於並非正式喜宴，黎明正考慮是否出席補飛。

自千嬅落實12月擺酒後，有關其婚宴流言一直未停過，早前更爆出拒請黑名單，舊愛鄭中基、舊老細黎明都在名單之列，不過千嬅就強調有請黎生：「我梗係有請佢啦！公司高層、同事都有，仲係以伉儷形式邀請。」即係請埋樂基兒。

—臨時甩底—

為免黎明唔賞面，傳大老闆林建岳曾親自開聲，岳少同Leon講，大家同公司即係一家人，咁開心事，免得俾傳媒亂寫喇。老細出到聲，Leon亦答應去。

點知去到婚宴前不久，黎明透過助手通知千嬅，表示當日唔方便出席。至週一（20日）黎明未有現身丁楊婚宴，反而於下午五點幾到達紅館，為劉德華演唱會擔任嘉賓進行綵排，排練近一小時後，轉到都會海逸酒店醫肚，邊食邊等，有成兩粒幾鐘空檔，都唔肯去婚宴，難怪惹來小氣指責。

—黎父勸誡—

然而近日本刊卻收到消息，指黎明另有苦衷，原來樂基兒已有喜兩個月，黎父黎新生仲開心過阿仔，多次到二人的上水愛巢探望新抱，「以前佢好少去，但呢排多入去，佢份人好Nice，成日同班街坊打牙骹，有次仲漏口風話：『我就做阿爺！』大家都好戥佢開心。」有街坊透露。

故當得悉個仔同新抱可能出席婚宴時，黎父為怕喜沖喜影響孫仔，即時叫停。據風水學家程仲蕎師傅解釋：「因為BB仔小氣，未夠三個月一定唔可以出席婚宴，喜沖喜分分鐘會小產！」按民間說法亦有指，婚宴的時辰吉日利盡新人，就連大肚婆的旺氣都可能被新人吸走，對胎兒不利，即使只是男方出席，也可免則免。

其實自08年黎樂於賭城秘密註冊後，多次傳出樂基兒喜訊，但統統詐糊收場，令年屆72歲的黎父甚為失望，據知，廿多年前黎父曾患癌，98年又試過冠心病病發，現時最大心願就係抱孫，為免父親擔心，黎明寧願做「罪人」。