「少年食神」林澄光（Michael），早前為無綫主持飲食節目《為食一條街》，憑住肥頭耷耳識食格成功入屋，但隨即被傳媒撕開真面目，指他充有錢佬呃老友錢，更指他速食拍檔高海寧，賤男本色表露無遺。
不過，識食肥仔又何止高海寧一個。本刊收到消息，早年已在娛圈打滾的Michael，多年來憑出色口技獵女無數，人數水蛇春咁長，最新鮮熱辣名單包括曾搭上富豪老細的陸詩韻、車震女朱慧敏、風騷呂慧儀和拍過三級片的梁敏儀。俾Michael金榜題名的女星身材個個惹火，食神確係好識食。


現年36歲，外號「少年食神」的Michael，被無綫欽點做《為食一條街》而火速升仙，鏡頭前自認識飲識食的他，嗒女招數亦同樣出神入化。「佢自細就鍾意認屎認屁，仲有鋪溝女星癮，不過佢做車行經紀，邊識咁多女星！通常都係借完車俾傳媒影相，同啲記者混熟咗之後，就佢哋介紹啲女星俾佢識，又話要約人出嚟食飯。同啲女星交換咗電話之後，就飛起個記者，自己再call啲女星出嚟單獨再食過。原本佢哋有冇下文唔會有人知，不過佢鍾意嗒完班女就同啲friend晒命，仲話覺得自己好威㖭！」知情人透露。

吹自己有錢有面
女星做得娛圈，十個有九個挑通眼眉，不過吹水天下無敵的Michael，經常在飯局中，吹噓自己在元朗有幾十架古董靚車兼家住半山，加上口才了得，不少一心想釣金龜等上岸的女星，都錯以為他是身家億萬的富二代。「Michael溝得女星，門面功夫做到足，每次飯局都會着到身光頸靚戴十幾廿萬嘅鑽錶，又會揸架法拉利出嚟。食飯嗰陣有意無意滲自己屋企家底有幾勁，除咗開火鍋店，建築生意喺國內嘅廠有過千工人。佢仲話自己喺澳門賭場識唔少話事人，總之吹得就吹。不過熟佢嘅人就知好多都係流，啲車好多都係問人借，間火鍋店係掛名嘅。好多女開頭都中招，不過當知道佢充闊佬嗰陣就會掉頭走。」

少年吹神
「少年食神」林澄光在節目中，集集騷靚車兼吹噓自己識飲識食，呃到一班電視台無知姐仔落搭。不過這位吹神唔止專食靚女，呃錢手法亦層出不窮。

罪狀一　扮大股東呃錢
多得森美提攜，36歲的中佬Michael可以憑住「少年食神」牌頭入電台開咪。不過林不但冇知思圖報，更唔熟唔食，向森美自稱是名人飯堂東來居火鍋店的大老闆之一，並慫恿森美注資十萬入股。事後森美得悉林原來只佔5%股份，於是二人當面對質。

罪狀二　入貨從中食價
Michael經常吹噓自己和街市肉檔東主相熟，可以買到肉質較佳的牛肉，於是成功得不少火鍋店股東委任為買手。不過就有指Michael被澳門火鍋店「囍館」的股東踢爆，當時仍持有火鍋店股份的Michael，入貨買牛肉竟然從中食差價。身為老闆都呃埋自己公司錢，招數真高。

罪狀三　借橋當秘笈
Michael在節目中經常介紹隱世美食，更吹噓自己和不少位處偏僻的食肆老闆熟絡，自稱由細食到大。EO2成員Eddie（右）睇唔過眼，踢爆林的覓食之路並非他親身經歷，Eddie說：「佢係高級古惑仔，把口呃得吓人。睇見佢做節目就火滾，話自己由細食到大，查實係我哋班friend幾年前帶佢去食之嘛！佢仲唱過食過唔少女星啦，不過就唔方便講係邊個。」

攞正牌互溝
《為食一條街》最後一集，Michael專登再請呂慧儀任嘉賓，不過記者發現二人在節目中的態度相當曖昧，唔似拍檔咁簡單，擺明攞正牌互冧。

李思蓓：佢集郵本簿厚過黃頁
Michael每次「集郵」都有一條方程式，便是專揀在劇中經常做人情婦、二奶，現實中個底同樣花到七彩的二、三線女藝人，當中包括曾搭上監躉富豪曾文能和油王朱明的陸詩韻、車震女朱慧敏、次次大騷都超級暴露的呂慧儀和拍過三級片的梁敏儀。Michael吼準一眾女星釣金龜心態，只需一味充闊佬，眾女便會輕易落搭。
早前透過經理人文狄認識Michael的李思蓓，更大爆他唔熟唔食，「我同佢識咗幾年啦，食親飯佢都鍾意噏一大渣女星出嚟，邊個就唔好講啦，總之佢集郵本簿厚過黃頁啦。佢其實同啲豬肉最熟，唔熟唔食吖嘛，我啲朋友都叫我小心啲佢！」
女星慘成食神口中的美食，陸詩韻在電話中反應極大：「吓，我同佢食飯應該冇人知喎，佢連我都數埋？哈哈！咁多謝佢睇得起我囉，我知佢個人好吹得，至叻吹水啦！」
朱慧敏在回應本刊時則說：「我私底下係有同佢食過幾次飯，喺我印象中佢都係一個君仔嚟嘅。不過無論如何，我依家都有固定男友，我同男友感情仲好好添！」至於梁敏儀，則坦言以為對方大把錢。「同佢食飯，佢成日講自己有幾多身家，開頭我仲以為啲車係佢㖭。不過邊啲做得朋友，邊啲做得男友我會分得到囉！」

呂慧儀以為執到寶
食神變吹神，更食完通街唱，女星人人自危，上述女星為求自保更紛紛與Michael劃清界線。據知，現時仍懵上心口的，就只淨番呂慧儀一個。一直以為少年食神家底厚的她，為求實筍盤，早前在《為》節目中，公然和對方打情罵俏，更大膽露骨向Michael說：「我知道你鍾意我！」，叫Michael送花，而Michael亦禮尚往來，在節目有意無意搭對方膊頭，肉麻當有趣。本刊致電呂慧儀，但致截稿前仍未回覆。

呃神騙鬼擺TVB上枱
吹功了得的Michael，除了向女星吹噓自己身家外，對傳媒亦左瞞右騙。兩周前，本刊記者曾約他做訪問，為他的古董車拍照，當時Michael在電話中說：「吓，我架架都係百幾萬古董車，唔可以話揸就揸出嚟喎，到時揩花咗，實割咗我忽肉呀。（咁可唔可以去你車房影？）……唔得，佢哋擺晒喺元朗車房，我好錫佢哋o架，依家我請咗三個人嚟服侍我啲車o架。我屋企又住半山，來來回回要幾個鐘，我未必有時間喎。（你之前唔係同傳媒話你住紅山半島咩？）哦，嗰度係第二間屋。（其實影相只係需要一小時左右啫？）「真係唔得，因為我喺TVB有個新節目。（咩節目？）……哦，係飲食節目嚟嘅，呢幾日我都俾TVB hold起晒啲期，嚟近禮拜二至四都09至27，真係冇時間。星期五我要上大陸賽車，星期六又要做《歡樂滿東華》。你知啦，我要遷就啲總理，一係咁，我問吓秘書，睇吓TVB要咗邊個時間再覆你。」事隔十分鐘，Michael致電記者：「哎吔！我問過秘書啦，話禮拜六全日都俾晒TVB啦，真係冇時間同你做任何嘢，唔好意思！」隨即匆匆收線。
Michael說到實牙實齒，不過周三（22日）記者致電TVB時，外事部發言人蘇先生表示：「以我所知，除咗之前嘅《為食一條街》之外，TVB嚟緊都冇任何節目俾Michael做。（佢話有份做《歡樂滿東華》㖭喎？）我可以答你，佢肯定冇份做！」本刊事後致電Michael，但其電話一直駁去留言信箱。
一百個大話冚一千個大話，講到自己都信以為真，其實TVB最應幫Michael開套《大話西遊》，肯定入型入格。

網友圍插
其貌不揚的林澄光，被指食完女周圍唱，網友均一致裁定他罪大惡極，部分網友亦同情女星的「慘痛」遭遇，更有網友狂鬧林食咗佢女神高海寧，總之報道出街後，少年食神形象即插水。

身家成謎
「少年食神」林澄光其實並不少年，今年36歲，並懷着240磅身軀。這位「食家」是屋邨仔出身，童年時居於慈雲山慈正邨，到1980年就搬往何文田俊民苑。林就讀陳瑞琪喇沙書院，自稱91年畢業後接手父親建築工程公司生意。
有報道指其建築公司位於元朗崇山新村，周二（21日），記者曾到該處探訪。現場所見，兩層高的公司相當簡陋。正門分別掛有「CMTTC（建造業機械技術訓練中心）」、「新成機械工程有限公司」及「恒昌重機有公司」。記者向接待人員蔡小姐查詢，正當記者提及「少年食神」時，蔡就隨即搭嘴說：「你係咪講緊林澄光呀！佢間建築公司喺二樓，同我哋唔關事。」不過之後又有一名老年男士踢爆上下層的公司都屬林，他說：「大家都係同一個老細，使乜另外掛招牌啫！做建築工程公司唔一定打開門做生意。」最離奇是本刊事後翻查三間公司資料，均發現林澄光並非該三間公司股東。

借車充闊佬
Michael愛車如命，嗜好晒車，曾經一口氣向傳媒展示數部古董車，在節目中亦集集換車。不過記者亦翻查過自稱是他擁有的古董Benz（左）登記資料，發現登記車主原來另有其人，是一名叫Eric So的男子，再次呃神騙鬼。



食完唱
陸詩韻坦言十年前已識Michael，當時已經覺得佢好吹得。「我同佢拍《極速傳說》嗰時識嘅，跟住佢就約我食過幾次飯，佢把口真係好犀利，至叻吹水。」
佢至叻吹水！（真實對白）


玩完
有指Michael早前曾送幸運車牌給梁敏儀，但兩個月後無故攞番，對此她表示：「佢之前係話俾我，不過轉頭話俾朋友用，我咪俾番佢囉！佢成日喺我面前晒有幾多身家，我仲以為啲車係佢，後來先知唔係。」
佢經常晒有幾多身家。（真實對白）


啃親
和Michael食過幾次飯的李思蓓，狂數對方說話冇句真，更指他的集郵女星名單厚過黃頁，估唔到Michael食女無數，被女反咬一啖。
佢集郵本簿厚過黃頁。（真實對白）


互嗒糖
據知，現時只有呂慧儀仍當Michael係筍盤，互冧之餘，呂慧儀在《為食》的節目中，和Michael打情罵俏，公然話知道Michael鍾意自己。
我知佢鍾意我。（真實對白）


嗒唔到
朱慧敏向記者表示Michael在食飯過程中，是君子一名。之後朱慧敏就向記者狂晒她現時男朋友有幾好，自己有幾咁幸福。
我食過下幾次飯！（真實對白）


被指遭Michael速食唱通街的高海寧，強調對方只是拍檔，自己並非波大無腦。






Michael帶住呂慧儀街頭搵食，但突然就出手搭住女方膊頭，難得呂亦相當受落，半分驚訝都冇。


跟手二人齊齊殺入花墟揀花，Michael主動揀花送俾呂慧儀，呂照單全收之餘，更笑住向Michael撤嬌說：「我知道你鍾意我。」


最後呂慧儀和高海寧夾手夾腳做愛心蛋糕送俾Michael，不過呂明顯發自內心high到七情上面，把聲嗌到蓋過全部人。


早於8月，呂慧儀和Michael齊齊應邀任《超級遊戲掌門人》而認識，二人更一拍即合。


陸詩韻今年九月，將她和Michael食飯的照片放上微博，Michael更搭住陸的膊頭，態度親暱。


Michael在電話中，再三強調會在兩周前的《歡樂滿東華》，與其他總理表演煮嘢食環節，但綜觀整個節目，就只有薛家燕等人整三文治，而TVB發言人亦證實當晚Michael並無獲邀出席。


自從少年食神速食高海寧後，不少網友即態度180度轉變，諷刺他識食。







有報道指林澄光現居舊山頂道曉峰閣，但本刊連日在此等候，依然未見影蹤。


建築公司冇股份



Michael口中的建築工程生意，公司設於元朗崇山新村一個兩層高的鐵皮屋，辦公室位於上層，旁邊有一條樓梯連接地面。公司外面則有近萬呎的空地擺放鏟車。


記者翻查三間公司的註冊資料，發現主要股東為朱松明及林煒丹，而並無林澄光的名字。


員工蔡小姐否認Michael為建築公司老闆。




arrow
arrow
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄