最近傅穎突然與緋聞男友羅仲謙公開決裂,絕情如此,純因大胸謙乖仔得個樣,實則是集郵餓狼,半年來,瞞住北京的正印女友周圍覓食,終因食傅穎,齊人福惹禍!
北京正印忍無可忍,與傅穎在電話對質:「你係佢(羅仲謙)N咁多個嘅後備!」懵閉閉當上第三者的傅穎晴天霹靂,集郵謙即時現形。
與正印拍拖五年來,羅仲謙劈腿無間斷,除了傅穎,還有被稱翻版栢芝的英皇小花馮皓詩,及無綫三打七黃智雯。
集郵謙被拆穿真面目後,繼續兩頭瞞,向傅穎聲淚俱下,跪地求饒,但轉頭又向正印箍煲,企圖繼續左擁右抱。
大話雪球越滾越大,最後令兩女短訊互片,集郵謙乖仔包裝瓦解,真面目曝光。

慘變第三者
擁有四十吋胸肌的羅仲謙(謙仔),泊到無綫碼頭拍劇,成功以乖仔形象入屋,唔止女fans着迷,同志更加暈浪。今年初,謙仔與同屬星皓公司的傅穎(Theresa)開始傳緋聞,半年前,男方成功將女神追到手,Theresa投入甜蜜新戀情,勢估唔到,對方原來是集郵男,並早已有拍拖五年的正印女友,Theresa矇查查做了第三者都唔知。
由女友變第三者,Theresa嬲到爆。上週二(十二月十四日)同謙仔情侶檔出席《飄雪樂韻聖誕精品》活動時,氣難下的Theresa公開指責謙仔說話無句真。
原來擘面前幾日,Theresa發現從內地打來的長途電話有古怪,據知,當時謙仔辯稱對方是北京一位男性朋友,還理直氣壯叫Theresa打過去,轉過頭,對方再來電,卻是他拍拖五年的正印女友蔡小姐。

兩頭瞞
「嗰日個電話係佢(謙仔)正印女友打嚟,Theresa接,對方好似知有Theresa存在,仲同佢講:『我係佢拍拖五年嘅女朋友,你係佢第N個後備。』Theresa當堂呆咗,做咗人哋第三者都唔知。」知情者說。

 
大話穿煲,知衰的羅仲謙焗住向Theresa認錯跪地求饒,「佢叫Theresa俾次機會佢,仲聲淚俱下話同正印未斷纜,只係應酬對方,今次去北京拍戲,唔會再見正印,會同對方講分手。」
棄舊要新其實係大話,本週一(二十日),戴住口罩的羅仲謙獨自現身機場,出發飛往北京,為他有份演出的新戲《大鬧天宮》開工。仍然想享齊人福的謙仔,一方面向Theresa求情,日日SMS箍煲,但另一方面又氹住北京正印女友,從來無想過二選一。

集郵系列

一味靠胸
有「大隻謙」之稱的羅仲謙,畢業後做過救生員,19歲入行,拍過《阿嫂》、《跟蹤》等電影,其後擔正拍《愛鬥大》、《六樓後座2》。加入TVB拍《盛裝舞步愛作戰》、《尖子攻略》等青春劇。入行6年,去年終在《搜下留情》憑40寸胸肌彈出,成為男版「童顏巨乳」,當上新一代獵女殺手。

正印交鋒
同一晚,情傷的Theresa約了密友Amy食飯,其間Theresa不停㩒電話顯得好激氣,原來她正同謙仔正印蔡小姐以短訊互片,發現本月中正印曾毫不客氣同Theresa講「請認清自己嘅位置,你係第三者。」另外,兩女還互問是否已跟男方分手。
其實當晚黃昏,Theresa出席活動時,記者問Theresa是否同蔡小姐聯絡,她欲哭無淚說:「我無嘢講。」提及羅仲謙繼續以SMS求箍煲,Theresa斬釘截鐵說:「我好忙,無時間睇SMS。」
之後記者致電身在北京的蔡小姐,接聽人承認姓蔡,但當提到羅仲謙和傅穎近日感情轇轕,以及她是否跟男方拍拖多年等問題,正印蔡小姐默不作聲,之後更收了線。
羅仲謙的正印女朋友姓蔡,今年廿一歲,家境富裕,自小接受外國教育,是個滿口英語的ABC。五年前,羅仲謙尚未有人識,兩人在朋友聚會中結識,當時只有十六歲的蔡小姐仍在求學,近一年才移居到北京繼續讀書,跟謙仔兩地相隔,故男友在港頻頻偷食,正印女友知,都管唔到。

專吼拍檔
傅穎去年加入星皓,近水樓台,謙仔立即趁機展開追求。為了取得對方信任,謙仔坦白自爆過往戀情,包括曾與江若琳暗撻,及早兩年前拍電影《愛鬥大》,跟「翻版栢芝」馮皓詩拍過拖,不過,其實他當時已有了正印女友蔡小姐,馮皓詩同樣懵懵吓做了第三者,發現感情被騙,即同謙仔斬纜,甚至離開傷心地,退出娛圈。雖然她表示無咁嘅事,但問到是否傷得好深,她停了半秒說:「我轉咗行,無嘢幫到你。」
背住正印,食完一個又一個,馮皓詩後,謙仔去年跟三打七黃智雯拍無綫劇《搜下留情》時,亦落足力狂表示對黃有好感又經常約會,但兩人只維持幾個月,後來遇上Theresa即轉移目標。黃智雯曾被集郵,她只當緋聞,問她信不信男方是愛情騙子?她欲言又止說:「我覺得佢都係好男仔。」
謙仔花盡心思行伯母政策,即使Theresa媽咪最初覺得謙仔唔成熟靠唔住,但他仍不時請伯母飲茶扮孝順仔,Theresa唔舒服他會照顧,甚至親自下廚,終打動伯母。自從被踢爆集郵,主角羅仲謙電話一直打唔通。

負心男
俗語有話「男人靠得住,豬乸會上樹」,唔理靚仔唔靚仔,一樣可以無本心。唔想遇到「情場騙子」,真係要帶眼識人。

許志安
今年7月,許志安突然高調宣布與拍拖兩年的女友余德琳Michelle分手。有傳他為翻撻Sammi,出盡賤招企圖激走Michelle,因而被冠以賤男之名。正當安仔萬箭穿心之際,他前助手細佬(潘恆章)亦開腔剖白04年與安仔的一段情。原來安仔與細佬拍拖兩年,當年二人的緋聞甚囂塵上,唯安仔一直唔肯承認細佬。07年,安仔搭上Michelle,被細佬揭發一腳踏兩船後,他不顧廿年賓主情,將細佬辭退。

崔建邦
形象花心的崔建邦,與唐詩詠拍拖期間不時傳出偷食緋聞。去年12月,「中巴」鄺敏慧報案,指男方在寓所內向她動粗,才驚爆原來二人當時已秘戀4個月,另一邊廂,男方與唐詩詠的關係亦糾纏不清。又郁手又劈腿,崔建邦事業插水,今年10月,他又被傳媒拍到拖索模郭思琳返西貢新居過夜,賤男形象水洗唔清。

鄭嘉穎
早於03年與周麗淇秘密撻着,玩足5年地下情,08年轉黐當家花旦佘詩曼,不但被傳媒拍到男方「屈佘入屋」,更被翻舊賬,指他五年來背住女友周麗淇暗溝六女星。去年3月,被記者發現與阿佘同車,情急下竟要求女方落車,無風度行為令女方死心斬纜。不甘寂寞的他今年8月又搭上國產高模徐靖雯,二人在男方西貢寓所共處72小時,花心男本色盡現。


 


食消夜期間,無乜胃口的Theresa忽然將電話遞給友人,原來顯示的正是集郵謙的北京正印跟她在短訊互片,從互相質問當中,始知集郵謙被踢爆劈腿後繼續兩頭瞞,大話連篇。


20/12飛北京氹正印
Theresa同集郵謙正印女友互片當日早上,謙仔乘早機往北京拍戲。背上愛情騙子罪名的他,一到機場即戴上口罩遮樣。據知他到北京後,一邊send短訊向Theresa箍煲,但另一邊努力氹番正印。



20/12好友解愁
俾集郵謙騙情後,近日重創嘅Theresa都由傳媒好友Amy(左)陪住解愁。本週一她倆凌晨外出食消夜。


18/12 扮死狗
上週六晚,羅仲謙一副死狗模樣,面對傳媒「拷問」,無得撐的他唯有以唔回應抵擋Theresa公開的指責。


19/12谷氣到喊
男嘅扮完死狗,Theresa本週日出席活動時已經眼腫腫,到俾傳媒追問集郵謙係咪傷得佢好深,谷到爆嘅佢當場忍唔住擰轉面喊。



公開決裂前,Theresa已經忍唔住在微博踢爆大話謙真面目。




玩弄黃智雯
去年羅仲謙同黃智雯因拍劇傳緋聞,有指男方對女方食完即棄,地下情隨住該劇殺青玩完。


冧爆彭慧中
今年人氣上位的羅仲謙,獲無綫器重任港姐嘉賓,與一眾佳麗出埠拍特輯,其間被發現他睇中上圍出眾的彭慧中,二人公然互冧。


新寵梁靖琪
最近在電視圈發圍的羅仲謙,早前與Toby拍婚紗廣告,同樣出招冧對方,兩人在活動上公然打情罵俏,玩到忘形。(《蘋果日報》圖片)


傷透馮皓詩
○八年羅仲謙睇中馮皓詩(紅圈),二人交往後,女方才發現對方已有女友,即斬纜。(《蘋果日報》圖片)


力溝江若琳
○七年略有知名度的羅仲謙,跟江若琳合作電影《六樓后座2》時,一度撻着。(《蘋果日報》圖片)



本週一本刊求證Theresa,對於與正印互片,她欲言又止,一臉無奈地說:「我唔想講!」


去年Theresa在推出的散文「我會快樂的」自爆曾遇愛情騙子,弄得滿城風雨,被捲入成騙子嫌疑人物的包括她的前老細太子基。


羅仲謙的圈中兄弟,是有名「食神」的蒲精前E-Kid 成員Tommy(阮民安)。兩個臭味相投,有「集郵」嗜好。(《蘋果日報》圖片)


攞正牌拍拖
當日跟羅仲謙以情侶檔接騷,表面為工作才搞緋聞,實質二人真的於半年前撻着,寓工作於拍拖。


許志安


崔建邦


鄭嘉穎

arrow
arrow
    全站熱搜

    stacy4life 發表在 痞客邦 留言(0) 人氣()