廖碧兒（Bernice）跟陳豪○四年拍劇撻着後，雖然被外界譽為金童玉女，但女方心態一直騎牛搵馬想釣金龜，更不時四圍偷食。八月初，決心向上爬的廖碧兒又再瞞住陳豪識朋友，跟林孝賢一班富二代深夜出海玩通宵，事後懵佬陳豪繼續死撐女友去玩屬正常社交。
當陳豪老襯，三個月前，廖碧兒終於成功黐掂小小超李澤楷表弟、擁有過億身家的林忠豪（Alastair），已攞到對方淺水灣道獨立屋鎖匙的她，見機不可失，閃電跟富貴男友住埋。

有男友屋企鎖匙
連日來記者發現廖碧兒每逢假期或拍完劇收工，就會把握時間，跟林忠豪食飯消夜，為要箍實大金龜，近月來廖碧兒大部分時間都在男友位於淺水灣道獨立屋豪宅過夜。
上週六（十二月十一日）晚上八時，跟男友拖住手離開屋苑，擁有多部跑車的林忠豪，當晚揸保時捷載廖碧兒外出食飯見朋友，玩到凌晨三時半，二人又換了另一部掛上林忠豪英文名簡寫的「AL」七人車返屋企。
廖碧兒甫落車便一支箭走向12號獨立屋門前，墮後的林忠豪原來忘記帶門匙，於是問女友有冇帶鎖匙出街，廖碧兒講完「今日冇攞喎」，即快步走回男友身邊，打開Hermes手袋後發現原來有帶，林忠豪隨即笑說：「都話你有攞啦。」不過當發現記者影相，本來在門口跟男友打情駡俏的廖碧兒即時黑面，更耷低頭避鏡頭，在旁的林忠豪亦急召屋苑護衞趕記者離開。

呃埋新歡
據了解，廖碧兒跟林忠豪數年前認識，三個月前在飯局重遇撻着，廖碧兒對這個李嘉誠甥兒早有印象，事關林忠豪每次識新女仔，都會用同一款開場白：「佢先問人知唔知佢係邊個，如果人哋話唔知，佢就會大聲講自己係李嘉誠老婆（莊月明）細妺（莊月華）個仔，之後會講埋自己做咩生意，鍾意揸林寶堅尼同保時捷，講到好巴閉。

李嘉誠外父族譜圖

兩豪一會
廖碧兒曾公開表示有結婚打算，仲以為對象一定係傳足六年緋聞的陳豪。當家小生雖然係TVB吸金王，但講到身家豐厚，始終未及同香港首富李家誠有親戚關係，坐擁家族中渝置地控股及南北行過億生意的林忠豪。始終一日未結婚，廖碧兒都仲有得揀。

 
「佢好吹得，富豪二代背後叫佢『吹水怪』，佢成日同人講跟林孝賢好熟，其實班富二代都驚咗佢，佢之前同房祖名合作做薄荷糖生意，最後因為錢銀問題不歡而散，兩個人反咗面。佢又話同諸葛梓岐，Ana.R拍過拖，其實只係追過人。」知情者說。
不過一心要搵富貴上岸的廖碧兒既然有大金龜游埋身邊，於是講大話表示跟陳豪已經分手：「廖碧兒同Alastair講佢同陳豪分開咗，Alastair都話唔覺佢哋仲有嘢，事關廖碧兒晚晚幾乎同佢一齊，就算開工拍劇，放食晏一個鐘，都會call定Alastair入將軍澳接佢一齊食飯，然後再返公司開工，不過Alastair最初都呻頂唔順，因為廖碧兒箍到佢好緊。」知情者續說。

搭上有婦之夫
事實上，廖碧兒跟陳豪根本無分手，一直撐女友冇偷食的陳豪，原來每次都被嗲功一流的廖碧兒氹掂，甘心做老襯。
「Bernice唔撇Moses，只係想keep住個搵食拍檔，好似九月出街嘅護膚品廣告，其實Bernice兩年前已經開始sell個大老闆，不過人哋冇用佢，直至sell條橋話同Moses一齊拍，對方終於答應，但Bernice有本事响陳豪面前講，話係自己功勞，幫到佢事業，個男人梗係信晒，有女朋友幫佢接生意喎。其實响幾年前，Bernice搭上過有婦之夫，個男人好有錢，成日帶佢周圍旅行，搞到人哋老婆好嬲，之後仲踩上TVB同珍姐（曾勵珍）投訴，好多TVB人都知，仲戥Moses唔抵。」知情者說。

口不對心
雖然講慣大話，在富貴男友屋企過夜斷正，但平日口齒伶俐的廖碧兒亦方寸大亂，只認二人屬朋友關係，一時話同對方喺外國讀書識，一時又話喺香港識，問到跟陳豪關係時，又突然交波俾記者：「不嬲都係你哋寫，我哋係同公司，但都可以有其他朋友……」
週二早上（十二月十四日）在成豐片場拍《心戰》的陳豪，雖然向外表示「碧兒開心我就開心」，顯然口不對心，全程表現冇心機，問到介唔介意一直被指做老襯，他苦笑說：「唔介意。」

六年情玩完
01年出道的廖碧兒，曾與劉愷威拍拖三年，其後與林文龍、陳鍵鋒傳過緋聞，直至04年跟同在外國留學，滿口英文的陳豪，因拍劇撻着。兩人經常以情侶檔拍住搵真銀，但過去六年，女方經常背住男方夜會猛男，愛玩愛蒲本色難改。

一撻即着
04年陳豪和廖碧兒一齊到澳洲拍特輯，由於同聲同氣講英文，兩人甚投緣，直至合作拍《心花放》，日對夜對而傳出緋聞，同年八月廖碧兒被拍到在陳豪寓所出現。

戀情浮面
即使兩人否認戀情，但這段地下情頗受觀眾和廣告商受落，經常以情侶檔拍住搵真銀。06年有指女方父母嫌棄陳豪「冇水」，一度棒打鴛鴦，之後男方積極搵銀買車買樓，向女方家長派定心丸。07年7月兩人高調往澳門睇英超球隊曼聯賽事，大方任影。

出現暗湧
與陳豪拍拖期間，廖碧兒多次被拍到偷會型男，08年被發現與外籍猛男撐枱腳，之後又同空中少爺同車夜遊，戀情告急，兩人同場時顯得尷尬，分手之說甚囂塵上。其後有指女方出招冧掂陳豪，留住搵錢拍檔，後來廖碧兒捱病發高燒，已原諒女友的陳豪管接管送，事後女方解釋在香港朋友不多，有事一定會找好朋友陳豪幫忙。

各行各路
多次傳出離離合合的陳豪和廖碧兒，年初有指佘詩曼介入戀情，陳豪即向女方大派定心丸，失戀阿佘成大輸家。到今年8月，廖碧兒被拍到與ABC新歡出海夜遊，事隔兩個月，兩人再以情侶檔拍廣告，證明廖碧兒再獲男方原諒。

力爭上游
華姐出身的廖碧兒，深明在娛樂圈的生存之道，對自己有利的事業貴人，便會加倍獻殷勤和賣口乖。
識冧客
入行以來，廖碧兒每次出席活動，會親自收集廣告商名片，每到過時過節，向客戶送上果籃花籃打好關係，十分識做。
佔風頭
不少女藝人經常出席大小活動，都要靠服裝贊助，07年廖碧兒有份角逐獎項，為爭取最靚最搶鏡的晚裝，竟主動認識連卡佛高層，使橫手留住靚衫優先揀。
扮一姐
拍劇開工經常扮大牌遲到不特止，更將其他二、三線演員，不放在眼內，明知對方名字，但永遠稱呼對方「阿邊個！」十分無禮。
見低踩
一度是「迷雲黨」成員的廖碧兒，見陳志雲被廉署調查後，即跟陳總劃清界線，並轉投樂易玲旗下，事隔大半年，陳志雲獲公司復職，怕被秋後算賬的她回應「轉會」事件時即時口窒。


我目標係住獨立屋！（真實對白）


係你嘅始終係你！（設計對白）


拖實


摷鎖匙
週六晚，廖碧兒跟林忠豪拖住手外出，凌晨三點半返屋企，未發現記者前，男方叫廖碧兒摷鎖匙開門，廖碧兒即聽話去做。


週二，唔知廖碧兒已轉投林忠豪的陳豪死撐開工，一個人等埋位時神情落寞，不過當見到其他演員時，即變臉扮冇事。



連日來，記者發現林忠豪不時派司機接送廖碧兒出外吃飯，除將AL七人van泊在停車場等女友外，二人又鍾意玩換車，似偷情多過拍拖的廖碧兒，有時會特登叫屋企人開車載她到中環，肯定冇人跟，即火速跳上AL七人van。




廖碧兒到林忠豪屋企過夜斷正後，翌日在電視城接受訪問的她，對答時九唔搭八，更轉口風表示跟陳豪只是同事關係。


林忠豪曾經在朋友前透露跟名模Ana. R以及諸葛梓岐拍過拖，不過二人都極力否認。


林忠豪曾經跟房祖名合作搞薄荷糖生意，據知二人最後因錢銀問題不歡而散。



廖碧兒冧功了得，sell掂老闆跟陳豪一起拍廣告後，又力谷宣傳，在拍攝現場擺明冧男友。


廖碧兒日前出席內衣活動，特登攞住品牌所送的胸圍影相，十分識做。


上週六晚，廖碧兒到林忠豪屋企過夜，懵佬陳豪則在《歡樂滿東華》表演揼雞蛋籌得30萬，當晚更表示樂意跟女友一起合作籌款。


識得氹老闆的廖碧兒，07年出席寵物店協辦的慈善活動，在台上跟其中一個老闆贊助商合照。





（《FACE》圖片）


佔風頭


見低踩

arrow
arrow
    全站熱搜
    創作者介紹
    創作者 stacy4life 的頭像
    stacy4life

    娛樂八掛大分享☆

    stacy4life 發表在 痞客邦 留言(0) 人氣()

    E-mail轉寄