姐姐拖實我！（設計對白）
乖乖咪掂我！（設計對白）
身高只得 5呎 3吋的王祖藍，近年事業扶搖直上，估不到愛情同樣有攀登高峰的決心。當預告搵到真命天女的王祖藍，原來隱形女友，正正就是○七年傳過緋聞、高他一個頭、身高 5呎 9吋的華姐冠軍李亞男。
據知，二人在去年中秘密翻撻，縱然女高過男，但祖藍追女有心有力，令高妹甘願拋開歧視目光包袱，全程投入矮仔祖藍懷抱，李亞男更大讚男友：「佢好夠薑！」
正式展開長短腳之戀，但由於兩人同屬基督徒，為嚴守婚前禁慾戒條，拍拖要出動教友監場，撲滅慾火，擔心情難自控，偷食禁果。
無人即拖手
今年中，王祖藍自爆跟圈外教友拍拖，其實只為製造煙幕，掩飾與高妹李亞男拍拖年半的秘密。上週六（十一月六日），祖藍返無綫為《荃家福祿壽》演唱會開會，下午收工後即把握時間，與女友見面。
他駕車到馬鞍山會合與教友鄺文珣夫婦一起的李亞男，祖藍一見女友即四萬咁口，但礙於要保密地下情，他倆在大街大巷刻意前後腳保持距離。直至兩啤人由馬鞍山驅車到沙田一間神學院飯堂買外賣，見四野無人，買完外賣的祖藍於是放鬆戒心，拖住女友手仔返回車內。
當五呎三吋高的祖藍，拖實五呎九吋的李亞男，馬上「高下立見」，相差六吋的高度，著住平底鞋的李亞男，依然高男友成個頭，恍如大姐姐拖住細路仔出街，祖藍望住女友，更加要抬高頭，長短腳拍拖場面，比祖藍扮 Handlela baby更為惹笑。不過這對「長短腳戀人」，卻未有因高度差距影響拍拖心情，兩人經常深情對望， sweet到爆。之後兩啤人再到元朗友人家中，直至凌晨才離開。駕車送李亞男返將軍澳寓所的祖藍，竟然過門不入，無乘機在女友家中宿一宵。
教友監場禁慾
循規蹈矩，只因兩人同屬虔誠基督徒，拍拖要面對禁慾大考驗。有指二人拍拖，為嚴守信仰戒條，決定實施教友監場管制，謝絕孤男寡女共處一室時的禁果誘惑。據一位教友透露：「佢哋要匿埋拍拖，約會地點多數喺教友屋企，搵其他人做監督員。好多教友屋企，已經變成佢兩個幽會勝地。雖然要成日打搞班教友唔好意思，但大家見佢哋咁歇力守戒，都好樂意借地方俾佢哋兼做電燈膽。」
謝絕探訪
兩人同屬基督徒，為嚴守婚前禁慾，當晚拍拖拍到三更半夜，送女友返獨居的將軍澳寓所，祖藍都把持得住，無乘機要上女友家度春宵。換轉其他男女藝人，上咗啦！
王祖藍
年齡： 30歲
身高： 5呎 3
學歷：演藝學院戲劇學院一級榮譽藝術學士
宗教：基督教
獎項： 08年 TVB飛躍進步男藝員
工作：電視藝員、配音員、主持、 DJ、歌手、作曲、作詞
演出： 06年調到戲劇組，為劇集《東方之珠》幕後代唱，引起注意。其後演出《同事三分親》，成為《鐵甲無敵獎門人》獎老，簽約英皇做歌手， 09年擔正電影《矮仔多情》做男主角，近期在《荃加福祿壽》扮嘢扮到去紅館開騷。
李亞男
年齡： 25歲
身高： 5呎 9
學歷：英屬哥倫比亞大學一級榮譽藝術學士
宗教：基督教
獎項： 04年溫哥華華裔小姐冠軍
05年國際華裔小姐冠軍
工作：電視藝員
演出：華姐卸任後，加入 TVB做演員，先後參演過多部劇集《情人眼裡高一 D》、《談情說案》等，主力在 TVB8台做節目主持，最近在節目《荃加福祿壽》聯同陳爽，扮韓國女子組合 Wonder Girl獻唱《 Nobody》。
追女明刀明槍
早於○六年中，仍是兒童節目二打六主持的王祖藍，在藝人之家認識李亞男，在教友慫恿下，主動追求高妹，加上一副大鼻子情聖本色，浪漫招數層出不窮，即使其貌不揚，個樣又似王光亮，仍奇蹟地擊敗幾位高大威猛對手，贏得李亞男歸。「起初祖藍覺得高攀唔起呢位華姐冠軍，所以諗都唔敢諗。直至阿男搵祖藍教佢學廣東話，就係咁日久生情。祖藍發夢都無諗過華姐冠軍對自己有啲意思，於是唔理三七廿一，把握機會向佢直接表白。之後問番阿男點解揀祖藍，佢話鍾意對方夠直接，同埋比其他男仔細心好多。」
可惜當時「長短腳之戀」只維持短短三個月。據知分手原因，是女方正獲公司力捧，加上○七年做完台慶約埋食宵夜俾記者發現傳過緋聞，唔想拍拖分心影響事業，李亞男有意提出分手。面對人生交叉點，兩人於是搵牧師一齊祈禱決定。「祈禱後，佢哋覺得唔應該繼續，所以祖藍同阿男將段情斬攬。阿男其實放得低，反而祖藍好唔捨得，傷心咗一段時間。」知情者說。
布道會翻撻
分手之後，事業彈起的竟是王祖藍，由「樓華」一角冒出頭，到《荃家福祿壽》人氣有升無跌。去年初，他在一次見證中便自爆：「曾經忍痛斬斷一段關係，之後我嘅事業就嚟！」原來所指的，是與李亞男的短暫情緣。
二人分手三年，祖藍對李亞男一直依戀。「祖藍無再追女仔，反而阿男有同異性約會，不過心底裡始終覺得祖藍好，一直無拍拖。」知情者說。
直至去年中，二人隨藝人之家到加拿大參與布道會，再次近水樓台，未死心的祖藍決定啲起心肝，追番李亞男，回港後成功復合，直至上週六拖手斷正，這段翻撻的「長短腳之戀」正式曝光。
本周一（十一月八日），祖藍為《荃家福祿壽》演唱會彩排，記者追問與李亞男戀情，他起初支吾以對，及後得知拖手相斷正，才大方承認戀情。他說：「我等咗佢三年，所以希望大家祝福我哋呢段感情。（當日對佢一見鍾情？）唔係，佢係華姐冠軍，點敢妄想。直至有次教佢廣東話，發現佢手袋裡面唔係袋住化妝品，而係『路加福音』，嗰刻佢好吸引我，佢喺我心目中簡直係跌落凡間嘅天使。」至於高矮問題，祖藍即扯高聲調：「佢都唔介意我點解要介意！」
問他是否如外傳般為禁慾，拍拖要有教友監場，祖藍又 Handlela baby上身：「婚前性行為我哋接受唔到囉！唔想諗多咗，所以拍拖唔會兩個共處一室，一定要有教友或家人監場。（有無諗過快啲結婚，攞正牌洞房？）言之尚早，大家都想事業為重。」
至於李亞男，知道男友大方承認後，亦唔介意透露感受。「起初係有啲接受唔到（高矮問題），不過再諗深一層，外表係其次，心靈溝通先至重要，所以無再介意。祖藍係我咁多追求者中最夠薑嘅一個，佢係向我直接表白，見佢咁夠薑，咪決定俾機會佢囉。佢份人好浪漫，舊年佢寫咗首歌《跌落凡間的天使》俾我，呢首歌打動我同佢復合。」矮仔原來唔只多情，仲特別多冧女計仔！
長短腳之戀
男人唔一定要高大威猛先俾到另一半有安全感，身高輸蝕，一樣可以靠其他優點贏取芳心。唔少圈中戀人都能夠排除身高阻礙，果然係情人眼裡高一啲。
呂方鄭裕玲
5呎 4的呂方與 5呎 6的嘟嘟身高對比強烈，難得呂方表現大方，曾在公開場合表示：「如果搵女友計較高度，咁我一世都做和尚，邊個會同我拍拖，好難搵對象，所以咁多年憶蓮都唔睬我。」相戀 16載，有傳二人感情受金錢、第三者等因素影響，最終在 08年 10月宣布和平分手。
郭富城熊黛林
身高 178cm，經常著高踭鞋示人的熊黛林，與身高 171cm的天王郭富城緋聞傳足 4年。曾被 Amanda S.批評城城唔夠高，熊黛林力撐男友到底：「唔一定睇身高，佢事業同人品好，作為朋友好高分！」
甄子丹汪詩詩
名模汪詩詩身高約 180cm，比老公甄子丹高 5cm。二人身高差距經常成為傳媒焦點，但宇宙最好打的丹爺不以為然。出名愛妻號的他，唔怕肉麻，公開大談夫妻之道，指結婚 10年至今仍然覺得老婆好靚，願為老婆由「葉問」變「月問」，不介意幫愛妻買女性用品。
奇異恩典
圈中基督徒大有人在，返教會除咗尋找神嘅大愛，仲搵到自己嘅真愛，有共同信仰彼此扶持，信主得愛。
蔡少芬張晉
蔡少芬曾說過非基督徒不嫁，堅持張晉信主後才肯拍拖，並遵守不作婚前性行為規定。至 08年初，二人終於共諧連理，於西貢香港神學院大禮堂成婚，請帖上亦印有聖經經文作愛的宣言。婚後張生張太如膠似漆，幸福滿瀉，經常孖實煙韌返教會。早前更夫妻檔拍劇，攞正牌晒恩愛，羨煞旁人。
孫耀威陳美詩
基督徒唔可以講大話，所以一向愛得低調的孫耀威，今年 4月被踢爆與教友陳美詩去台灣旅行拖手斷正後，唯有焗住承認相戀一年。孫耀威更揚言明年會娶女友並坦言禁慾唔容易，但會嚴守十誡，與女友拍拖多數留在屋企煮飯仔、睇 DVD及查經。
周永恒 趙梓淇
周永恒四年前成為基督徒，與趙梓淇（前名趙頌茹）同居多時，因有婚前性行為違反十誡，今年 2月決定結束 6年愛情長跑，於葵芳一間教堂註冊結婚，攞正牌洞房。趙梓淇更於中秋節誕下女兒信希。
留言列表
