5/11孭袋走人
剛出席完:CHOCOOLATE活動就上 Sheldon屋企，逗留 13分鐘，阿 Mag攞住同一品牌嘅紙袋走人，當日羅孝勇身在天津做華姐表演嘉賓，咁袋衫佢究竟幾時放上去呢？
巨肺林欣彤（ Mag）喺《超級巨聲》音速爆紅後，難得有新女唱得兼純情，絕種純殼搞到班宅男狂流口水。
貴為 TVB力捧新人， Mag近排接 job多過瞓覺，但據知絕種 Mag已經和巨聲 2幫富貴仔、有翻版陳冠希之稱的羅孝勇（ Sheldon）暗撻，但話晒係熱戀期，後生仔女梗想密密見， Mag上週五更踩上緋聞男友家，不過只逗留 13分鐘就離開，純過蒸餾水嘅巨聲戀正式升溫。
巨肺林欣彤和翻版陳冠希羅孝勇屢傳拍拖，兩人死口唔認，不過據知兩人確實撻着近 4個月，超忙 Mag經常到緋聞男友家爭取時間見面。
細心照顧
醒目睇中純情 Mag嘅混血富貴仔羅孝勇出身不俗，擁有 4分 1愛爾蘭血統喺澳洲長大，大學畢業回港後，寄居兄長於港島西半山堅道慧源閣，據知鬼仔追 Mag過程絕不少爺仔。
知情人士說：「比賽中段， Sheldon已經同阿 Mag好好傾，雖然成班巨聲都成日上佢屋企 hea，但 Sheldon對 Mag特別照顧，佢知阿 Mag飲凍嘢氣管唔舒服，就留番包飲品唔擺落雪櫃，做完嘢又成日送阿 Mag返大埔，自己再搭車返西半山，來回要兩、三個鐘， Mag唔想 Sheldon咁辛苦，咪有時同巨聲幫朋友上佢屋企囉！ Sheldon仲話女友諗嘢好深沉，想用開朗嘅性格感染佢喎！」
上樓快閃
Sheldon對 Mag愛護有加， Sheldon上週為中華小姐決賽上天津工作，上週五 Mag出席完 I.T:CHOCOOLATE活動後，便行色怱怱趕到 Sheldon家，出入時大廈保安員仲主動同阿 Mag打招呼。 Mag喺 Sheldon屋企逗留約 13分鐘，落樓仲攞住兩袋衫走人。
《巨聲》戀蒲面
10月︰食完唔走
雖然拍拖要低調，但都要醫肚，上月 24日本刊拍得鬼仔 Sheldon帶林欣彤食完漢堡包後依依不捨，企喺快餐店門口唔願走，足足傾咗成廿分鐘先肯送阿 Mag返屋企。
林欣彤愛心玩狗
有讀者報料羅孝勇經常孖住林欣彤出現喺堅島長電梯附近一間寵物店，仲成日和店內貴婦狗玩到唔捨得走。阿 Mag回應話：「咁啱啫，要等埋其他人一齊上佢屋企，冇碇去先至入去玩吓狗啫！」
做偶像劇一姐
為保豆芽戀，拍拖要低調，但講工作， TVB實想捧 Mag上天，除拍攝中電影《我愛香港》外，早前亦為保險公司廣告唱主題曲，當選後亦出席了 4個公開活動，每次出席都收 5-6萬，忙到連月中開始喺 J2播嘅《巨聲 Mini Concert》（暫名）都未知幾時有期。
據知無綫更打算食住個勢搵林欣彤做下年開拍的青春歌舞劇女主角，而男主角會在吳業坤（坤哥）或大隻隊長陳國峰（ Penny）中二選一。知情者說：「套劇會以歌舞為主，想學台灣同韓國嘅偶像劇咁，吸引後生仔又可以谷到新人，除咗 Mag、坤哥同大隻隊長外，一幫同好多後生歌星都會客串，家度緊劇本，連六嬸都覺得有得做！」
獲公司力捧，阿 Mag上週五話：「如果有得拍劇的話好開心，可以再同班巨聲朋友一齊，但我都好想快啲拍 J2個 mini concert節目，每集有成個鐘，可以多啲同大家交流音樂，歌、影、視發展當然好，但我最鍾意係唱歌！」至於跟羅孝勇拍拖一事， Mag週一電話澄清：「嗰日下晝要攞衫夜晚活動用，之後要去 set頭同化妝，趕唔切攞嘢返大埔先至問佢借個地方擺嘢，我哋唔係拍拖，其他巨聲都會上佢屋企 o架！」
2個月掘 200萬
林欣彤除早前為大新人壽以過 50萬價錢拍平面廣告外，更有傳她已接了 9個廣告排住隊拍，絕對係大金蛋。
連接 9廣告
Mag唱得兼外形討好，自從 9月奪得《巨聲》冠軍後，工作排住隊做，據知短短 2個已為無綫吸金 100萬，靚聲王曉生金蛋，無綫實行電影、電視、出騷三面谷行。
做綜藝主持
贏咗巨聲冠軍後，無綫為 keep阿 Mag（右三）人氣，除了安排她上《勁歌》外，又派她主持《金曲擂台》幫佢谷人氣，不過林欣彤由於太受歡迎，所以佢要度啱期先可以客串做幾集主持，忙過好多歌手。
奪冠彈起
林欣彤於《巨聲 2》大熱奪冠，而緋聞男友羅孝勇則得第三，而另一參賽者胡鴻鈞則奪亞軍。
密接搵錢騷
林欣彤接 job冇停手，上週五（ 5日）和林海峰齊齊做 I.T品牌:CHOCOOLATE活動嘉賓，據知搵阿 Mag做嘉賓都係林狗主意，其間連林海峰都說：「睇電視就見影像，終於見到你真人啦！」
又執 10萬
到 10月林欣彤全力出動，先出席 Nikon數碼相機活動，再去 Red Valentino的 pop-up store開幕禮，執到冇停手。
拍戲扮女僕
人氣王林欣彤處女電影作係邵氏出品的賀歲片《我愛香港》， Mag飾演吳君如和梁家輝的女兒，要扮女僕 lolita，搞笑都考佢唔到。
有價有市
林欣彤上月 23日孖住古巨基出席 Kiehl's活動，亦是她第一個收錢活動，據知穩袋 5萬。
《巨聲》好感情
其實《巨聲》兩輯以來，都先後有多個參賽者傳出緋聞，不過都正常，參賽者全部十幾廿歲又愛唱歌，日對夜對係易啲撻着 o架喇！
林欣彤受保護
二幫林欣彤威盡，巨肺上到台係男仔見到都冧，所以攞第二、三名嘅羅孝勇同胡鴻鈞（右）都好錫佢，大把男仔追啦！
林師傑拖兩件
澳洲讀書返嚟嘅林師傑先傳同滿口英文嘅何雁詩啱 key撻着，佢哋個網頁就發現二人私底下做 gym相，有相為證，但冇耐又傳出同另一位巨聲駱胤鳴拍拖，台上打情罵俏，林師傑夠魅力。
留言列表
