莫文蔚講到馮德倫同舒淇拍拖出埠，佢話最緊要開心喎。
舒淇同馮德倫（ Stephen）最近又傳出重燃愛火，前日有讀者目擊佢兩個搭同一班飛機去東京旅行，噚日馮仁昭打畀 Stephen，問佢係咪同舒淇拍拖？佢話：「朋友就係朋友，點解要有發展嘅可能。我去日本係幫《太極之從零開始》做音樂，佢係帶媽咪去玩，咁大家係朋友，咪一齊玩，好正常啫！」
馮德倫聲稱去日本做音樂，咁做完嘢咪可以陪舒淇囉。
馮德倫前日同舒淇一齊搭飛機去日本，名副其實把臂出遊。
莫文蔚放瘀血
馮仁昭問佢係咪真係冇發展空間？佢話：「家工作太忙，唔想諗咁多。」舒淇前晚一樣係話同 Stephen識咗太多年，其實佢兩個又的確係好早已經拍過拖，04年舒淇同黎明分手，心情大受打擊，後來得到 Stephen嘅關懷同安慰，兩人終擦出愛火花，但當時僅發展半年又回復朋友狀態，直至去年初男方同徐若瑄分手後，兩個人又打得火熱。
聽講今次佢兩個係認真去發展，唔係玩玩吓，畢竟兩個人喺感情路上跌跌碰碰，經歷咗唔少事情，兩個人都有啲攰，想停落嚟搵歸宿啦！
對於 Stephen同舒淇甜蜜出埠，舊愛莫文蔚（ Karen）噚日喺尖沙嘴出席活動，佢話唔知佢哋係咪拍拖：「佢哋不嬲好朋友，都希望身邊朋友開心。」 Karen之前拍《太極俠》喺銅鑼灣收工時不幸遇上車禍，佢噚日已經冇乜大礙， Karen猶有餘悸話：「做咗個手術放咗200cc瘀血，已經冇事。」
全站熱搜
留言列表
