3歲

「鋼鐵大王」龐鼎元新抱郭秀雲(Sharon),出名愛動物,對冷門、野生動物情有獨鍾,多年來養過麻鷹、貓頭鷹、馬騮、蠍子及蛇等。在眾多寵物之中,跟她感情最好的,居然是野性難馴的熱帶草原貓。這隻於美國訂購的寶貝貓Zuka來頭絕不簡單,是非洲山貓與豹貓混合體,外表兇猛,體形比普通貓大兩至三倍,身價十萬。郭秀雲與巨貓同眠,初時亦掉以輕心,試過被愛貓咬頸及抓到皮開肉裂後,不過她竟然無懼惡貓,反而兇番轉頭,最終令Zuka貼貼服服,變成黐身寵物,真係唔到你唔服!


郭秀雲(Sharon)自小受父親影響,接觸各類動物,尤其愛奇珍異獸。近年她豪花六位數字,於美國訂購外表兇悍、體形龐大的熱帶草原貓。這隻寶貝貓Zuka是非洲山貓與豹貓混合體,四肢比普通貓發達,重30磅,身長3呎,原地躍起可達2米以上,性格活躍,學習能力超強。由於繁殖困難,身價動輒達十萬至百萬不等,相當矜貴。

血統矜貴
熱帶草原貓由F1(第一代,擁有50%山貓血統 )至F3(第三代,擁有12.5%山貓血統)等,都帶有野性的山貓血統。愈接近第一代,斑紋會愈明顯,價錢也較貴,高達過百萬港元。而漁農署規定第五代或打後的熱帶草原貓,才可進口香港。

攞正牌入境
美國繁殖的Zuka,是第一隻進口香港的熱帶草原貓,入境之前須向漁農署申請批核,並非有錢就有得養。Sharon說:「之前我驚唔批入境,所以我未買已經向漁農署申請。可能之前冇人申請過,佢哋比較緊張,連屋企幾大、間隔係點要影晒相俾佢哋睇。又會問屋企有幾多個工人,有冇專人打理,會點養隻貓亦要詳細交代,睇吓係咪適合養至批。」由申請到批核,加上待Zuka六個月大打齊針,足足等了大半年。「Zuka嚟到嗰陣已經8個月大,唔係BB,絕對唔易教,起初我都驚搞佢唔掂。」

咬頸示主權
野性難馴的Zuka,不但試過偷食Sharon養的蟋蟀,來港初期更試過向她宣示主權,令她受盡不少皮肉之苦。「有朝起身發覺有野箝住我喉嚨,擘大眼先知係佢咬住我,仲一路咆哮,向我示威,話我知佢係阿大,我即刻翻身壓住佢,兇番佢轉頭,佢咪知我先係阿大囉!」除了親自出招馴服,Sharon更將原本食生雞肉的Zuka,改到食白烚雞肉加貓糧。為免屋企發生血案,Sharon更將家中養了13年的一對鸚鵡,送到朋友家暫住。

黐身陪瞓覺
Zuka外表兇悍野性,亦有溫馴一面,與Sharon相處一年,變得愈來愈黐身。試過Sharon出外3星期,Zuka發脾氣玩絕食,搞到肺積水。「除咗我之外,冇人搞得掂佢,我叫佢做寃氣貓,成日都要黐到實。我喺屋企做嘢,佢就喺keyboard行嚟行去,晚晚都要黐住我瞓,最鍾意打橫咁瞓喺我枕頭度。佢將我當partner,每朝起身就好似幫我整毛咁,將我成個頭舔到濕晒。」眾多寵物之中,Zuka跟Sharon感情最好,難怪老公龐鼎元都要瞓埋一邊。「Zuka又冇話呷醋嘅,不過唔會特別跟佢,佢哋瞓覺都好清楚有條界。」

漁農署發牌才可養
在本地飼養外來進口貓狗,程序相當複雜。從外地輸入的貓狗,除了事先獲得漁農自然護理署簽發的特別許可證外,其他一律需申請才可入境。部分國家進口的貓狗,更須在漁農署轄下的動物管理中心接受至少為期4個月檢疫。為免將疾病傳染給其他檢疫中的貓狗,更規定貓狗在抵港前必須曾接受全面的防疫注射,以確保貓狗有足夠的抗體及不會散播病原體。 ####


Zuka非常黐身,郭秀雲去到邊都要跟實,影相時亦要眼定定望住主人,好鬼寃氣。


現時重30磅的Zuka非常龐大,可以遮蓋郭秀雲的上半身。為了記錄牠的成長過程,郭秀雲會定時帶牠到影樓影相。


2個月 Zuka 2個月時,體形細小,與普通貓一樣,不過現時3歲的牠長3呎,非常巨型。


放貓散步 Zuka十分活躍,郭秀雲不時帶牠落街散步。「佢好鍾意跳,好輕易可以跳上天花板。」


車仔跟身郭秀雲帶Zuka出街,除了要用貓帶,還要出動私家車仔。「帶佢出外一定要用車仔,可以拉晒簾放佢喺裏面,因為如果佢真係用力,條帶唔會拉得佢住。」


Zuka是家中阿哥,狗仔Ugly都忌佢三分。


郭秀雲與Zuka相處初期,試過被踢傷,傷口見骨。「有次帶佢出街,佢聽到巴士經過受驚,後腳一踢,抓到我見骨。」

arrow
arrow

    stacylife 發表在 痞客邦 留言(0) 人氣()