爽!(設計對白)

前組合Cookies成員區文詩(Angela),在剛過去的二十九歲生日,除了跟好姊妹鄧麗欣(Stephy)、吳雨霏(Kary)以及楊愛瑾(Miki)等在酒店狂歡慶祝,她亦趕在踏入三字頭前,為自己影裸照留紀念。一直有意剝清影相的Angela,屢遭身邊人反對,為堅持呢份未了的心願,今次索性先斬後奏,終於成功一脫,「都係趁青春留倩影啫。」Angela說。

屋企人反對
區文詩為即將推出的新專輯《Angela 區文詩》拍攝裸照封面前,其實她一早已有全裸的衝動和構思,不過每次都被阻撓而未能成事。「呢幾年都心思思想影裸照,之前有個好出名影裸照嘅攝影師答應幫我操刀,加上我同對方好好朋友,覺得可以完全信任,不過後來俾媽咪知道咗極力反對,唯有臨時放棄。第二次係有個專畫裸體素描嘅意大利畫家,應承幫我畫幅畫,但要事先影一張裸照寄去意大利俾佢,因為張相有機會落响其他人手上,我又有啲擔心,加上身邊朋友都唔贊成,最後都冇做到。」Angela一臉可惜。

三十前紀念
今次影裸照封套,Angela決定不再思前想後,也沒有詢問任何人意見,想做就去做。「我上一張碟有好多唔同造型嘅封套,今次唔想太複雜,一切還原基本步,冇乜化妝,吹直頭髮,唔著衫,以真我做主題。不過講到尾,都係想趁青春留倩影,因為今年廿九歲,好想喺三十歲之前做一啲嘢留為紀念。」拍照當日,老外男友無現身,反而攝影師女友蒲頭「監場」,Angela笑言反而有助拍攝進度,事關攝影師女友是專業模特兒,當日更身兼「動作指導」,教她擺甫士,結果五輯相在五小時內完工。「啱啱埋位開始影嗰陣,身邊同事仲緊張過我,每次要補妝或者攝影師換鏡頭,班同事即刻飛撲埋嚟用衫遮住我,其實我身形向來一枝竹,冇乜好睇,我仲冇遮冇擋喺studio周圍行,可以話愈影愈放。

餅女出路
女子組合Cookies由最初九位一體,到分拆變四餅再演變成獨立發展,四位「生還」餅女在圈中已超過十年,並各自發力搵出路。

鄧麗欣 北上發展
隊長Stephy一度是餅女中最快跑出的一個。出寫真,做電影女主角,後來伯樂黃栢高離場金牌大風,Stephy唔再係「一姐」,人氣、工作量大倒退。Stephy去年由男友方力申鋪橋搭路返內地發展,早前與金牌約滿後,即以千萬身價過檔新碼頭北京海潤,北上掘金。

吳雨霏 環球一姐
雖然是「餅女」中最唱得,卻未被力捧,直到去年舉行處女個唱,離開金牌大風加盟環球唱片,即升格為一姐受公司重用,並在最近的音樂頒獎禮上獲得多個獎項。

傅穎 出雪櫃
染金毛扮日本妹,Theresa事業成績一度超越Stephy,後來轉投星皓,卻寄情拍拖,更大爆男友羅仲謙背叛偷食兼虐打,自揭醜事,一度觸怒老闆王海峰將她掟入雪櫃。冇工開的她終痛定思痛,公開道歉成功挽救垂死的演藝事業。

楊愛瑾 等入豪門
四餅女中發展一直大落後的Miki,索性將心機放在釣金龜上。09年暗交當時未離婚的永安百貨太子爺郭永淳,從此在娛圈打風流工,工作量少卻有能力一身名牌,近年還跟男友入住豪宅貝沙灣,等嫁入豪門做郭氏新抱。 ####

 
咪睇Angela影相當日好似好輕鬆,其實佢早兩個月前開始搵教練健身,操到有線條先影相,絕對有準備。


唱片入面有另一輯相,但就由頭包到腳,兩個唔同造型。

 
唱片冇主題名,就如她所說,還原基本步叫《Angela區文詩》。


Cookies解散後,跟Kary同Stephy依然有來往,今年更搵埋好姊妹慶祝29歲生日。


在港台做DJ後,出席的都是比較健康的活動,早前跟陳敏之、黃德斌現身飲酒勿揸車的宣傳記者會。


唔係走偶像路線,Angela次次拍拖都公開,前度是日籍模特兒型男鈴木仁。


去年跟老外男友Peter拍拖,又被拍到二人到海洋公園玩。







arrow
arrow

    stacylife 發表在 痞客邦 留言(0) 人氣()