神劇《天與地》播完,緊接有似足《蝸居》嘅《缺宅男女》出籠,雖然《缺》劇無平衡時空,題材又無隱喻六四,但勝在講中香港人買樓心聲,網友一樣noise勁。劇中女主角鍾嘉欣為買樓,搞到要同上司謝天華上床。現實有兩層樓揸手的女神原來一樣辛苦,為拍新劇《護花危情》踩到傻,日日瞓得4個鐘,就算連感冒失聲都無請假頂硬上。女神都要捱,香港地供樓真係唔簡單!



《缺宅男女》上週首播,雖然被指抄大陸劇《蝸居》,不過講中香港人買樓苦況,師奶點會唔受。收視平均27點,高過神劇《天與地》多多聲。劇中個個為買樓幾慘都有,女神鍾嘉欣更為買樓搞到要背住男友吳卓羲,同上司謝天華上床。


月供 五萬
最近買入多一層將軍澳新都城千呎單位和父母同住的鍾嘉欣,榮升兩層樓業主,兩層樓月供4至5萬,一樣要為供樓捱,雖然唔使「瞓身」,但為供樓鍾嘉欣亦一樣唔敢停,拍完監製梅小青嘅《當旺爸爸》緊接為監製劉家豪拍《護花危情》。女神冇得唞終於捱病,上月女神先捱到濕疹上面,大病初癒,估唔到前週又被感冒突襲。據知女神大半年幾乎日日開工,每日瞓得4個鐘,加上天氣持續寒冷,上週日(8日)嘉欣到烏溪沙拍外景,其間咳聲頻頻,加上鍾嘉欣本身雞仔聲,基本上聽唔到佢講對白,只係見佢口郁郁。問到嘉欣點解唔放假,佢話:「我就好番㗎喇!今日我拍到,但係把聲真係唔得,但呢啲可以配音,我出名唔放假嘅,我返到工實返。(會唔會買多層樓呀?)嘩!我邊有錢呀,我都係打工仔咋!」27歲女有兩層樓揸手,你絕對唔「缺宅」啦!


現實兩層樓
劇中鍾嘉欣做慳妹,一家九口迫喺藍田居屋,仲要同阿媽盧宛茵瞓碌架床,不過現實中嘉欣就舒服好多,最近買了新都城千呎單位,三間房,可以同埋父母一齊住,而舊居就租出去。有層樓搵租客幫手供吓,冇咁吃力。


1年拍5劇
女鐵人鍾嘉欣出名襟捱,單喺去年就拍咗5套劇,由上年1月拍《缺宅男女》拍到11月嘅《當旺爸爸》,期間仲要出騷、錄歌,基本上全年未停過手。


當伍允龍係親人
鍾嘉欣為兩層樓捱到病都頂硬上,不過女神亦有男友滋潤,早前有報道指鍾嘉欣同男友伍允龍秘戀4年,仲有圖為證,不過女神對男友就好口密,只係話:「嗰次係佢生日,我嚟講聲生日快樂啫!但關於朋友,親人,家人嘅事,我都想keep secret喇,唔好意思呀!(伍允龍已經係親人咁close喇?)我唔識答呢個問題。(第時揀老公會唔會想佢有層樓喺手呢?)有就感覺安全啲囉!不過你唔好寫我貪慕虛榮呀,我唔係啲咁嘅人!」


摑黄智雯大快人心
《缺宅男女》講香港買樓慘況,上週平均收27點,不過跑出嘅唔係主角三哥同人妻郭羨妮,而係鵪鶉妹黃智雯,今次喺劇中做巴渣大肚婆,網友個個like佢夠潑辣,上週第8集被老公梁烈唯兜巴星,好多網友都話正。 ####



鍾嘉欣病到連把聲都沙晒,講唔到對白仍然頂硬上,好彩嗰日尾場係拍車戲,比較輕鬆,但女神已經疲態畢現。


 
唔過電鍾嘉欣有伍允龍、黃宗澤有胡杏兒,各有所屬,二人拍劇就算黐到幾埋都唔怕啦。


 
嘉欣家住喺新都城千呎單位,雖然同父母一齊住,不過日日拍劇,返屋企食飯都冇時間。


 
拍劇迫居屋劇中嘉欣一家九口迫喺藍田居屋,食飯迫喺張大圓枱,睇見都辛苦。


 
《缺宅男女》1月



《九江十二坊》1至3月



《荃加福祿壽探案》2至5月



《耀舞長安》5至8月



《當旺爸爸》8至11月



怕近影嘉欣出名捱得,當日未埋位,佢仲話:「我冇咩事喎,唔好咁近影塊面,話我個鼻甩皮呀!」輪廓咁靚,甩皮都唔驚啦!



早前有讀者向《蘋果日報》提供相片,見男友伍允龍攬實鍾嘉欣,不過嘉欣就話:「張相幾年前㗎,嗰日係佢生日,我去到講聲生日快樂啫,其他嘢我唔記得喇!」相當口密。



嘉欣同伍允龍07年拍《十分•愛》撻着,當年喺將軍澳拍拖食泰菜,仲被本刊獨家拍得。



攬記者嘉欣仲攬住本刊記者話:「佢攬住我冇咩嘢啫,我嵋家夠攬住你啦,你覺得係咩關係呀?」認真鬼馬



以前高登仔最like黃智雯戴眼鏡,今次扮八婆無咁索,網友一樣like。



鍾嘉欣為家人住好啲,結果搞到同謝天華上床,亦有激吻戲,不過佢就話:「拍劇有幾激呀?都係劇情需要啫。」



arrow
arrow

    stacylife 發表在 痞客邦 留言(0) 人氣()