「傻老竇」近排家有喜事，理應好開心先係，點知啱啱相反，佢心情反而唔多 good。大家唔好誤會，「傻老竇」心情唔好，同家事冇半點關係，而係為咗佢有份做嘅開心劇咋。事關套劇開波嗰陣，口碑同收視雖未至於好爆，但一直都保持到似阿陀行路（中中哋），誰不知做到半途，因為女主角「大大隻」搞出啲負面嘢，累埋套劇嘅收視插水。你話「傻老竇」有乜法子唔㷫。
有二五同媽咪姐講，話「傻老竇」見人就呻，話對自己做喜劇有一百個信心，加上套劇做宣傳時，個個有份做嘅演員都好落力，扮鬼扮馬都冇所謂，可惜俾「大大隻」咁樣一搞，真係神仙都救唔番。二五話「傻老竇」仲嬲到話如果套劇唔係就快埋單，佢真係會踩上高層度，要求高層手起刀落，將「大大隻」 fade out，或者搵個近排人氣旺嘅入去沖吓喜咁話。
嘩，你話「傻老竇」真係踩上去見高層，而班高層又接納佢建議嘅話，睇怕「大大隻」真係前途似咁囉，所以話，做人嘅嘢，自己唔好算啦，千祈咪累街坊。

arrow
arrow
    全站熱搜

    stacy4life 發表在 痞客邦 留言(0) 人氣()

    E-mail轉寄