呢幾個星期港股之大起大落，確實令散戶無所適從，一個星期可以升千八點，轉眼幾天又可以跌番千五點；呢頭先話資金湧入港股爆升，人人亢奮，嗰邊就即刻傳話國內加息，股民熱情又即時冷卻下來。

喺咁嘅市場，唔係人人可以玩得掂，所以啲大行交易員先咁值錢，事關要喺波譎雲詭嘅股市贏錢，少啲功力都唔得；難怪股市有句話，叫做「狀元年年有，炒手最難求」，就連索羅斯都要搵個一流炒手去幫自己個基金操盤。

索羅斯剛啱搵嗰位炒手蔡篤昀，原本喺美林坐盤交易部做董事總經理，係台灣人，一般人好少識呢位仁兄，因為佢經常匿喺美林入面幫公司炒賣。據曾經跟蔡先生共事的交易員講，蔡生炒股後未輸過大錢，佢致勝之道全在三個字，就係「肯認輸」。

聽起上嚟好似好簡單，查實要做到並唔係咁容易，皆因人性係好難屈服認輸，好多時輸咗後就死揸唔肯止蝕，甚至愈係要追貨，結果由輸少少變成無可挽救。一言認為，炒股票心理質素最重要，甚至乎超過分析能力或者係超高智慧，所謂高IQ都唔及高EQ緊要。

求才若渴嘅索羅斯，也大歎千金難請好炒手。

索羅斯喺國金二期間公司叫做SFM HK Management。

吳士元鋪橋修路

前恒隆地產（0101）執董吳士元幾個月前辭職後，生活不知幾優閒，除咗周游列國外，仲好積極咁做義工，早前佢跟「無止橋」慈善基金上大陸做善事。無止橋係由新世界發展（0017）執行董事鄭志剛搞嘅，專門幫內地啲窮鄉僻壤鋪橋修路，改善地區基建。

過去吳士元為工作拼搏，冇時間做善事，今時今日生活無憂，於是想到要回饋社會，捐錢之餘，更身體力行做義工。佢認為單單捐錢唔足夠，要真係落手落腳去幫人先有意義。

不過，原來吳士元最開心一件事，就係可以經常陪佢亞媽飲茶食飯。吳老太已經八九十歲，過去多年，因為吳士元太忙，又要周圍飛，冇乜時間陪老太食飯，一直都好內疚，依家可以停低落嚟，自然陪番亞媽夠本喇。

吳士元生活優閒，近期頻頻做義工。

美聯幫政府拍賣要蝕錢

上個禮拜美聯（1200）為政府產業署拍賣物業，最後成功賣出七項，為庫房進帳一億五千萬，按道理收取買家賣家各百分之一佣金，應該可以收到三百萬；之但係最後美記只係收得四萬六千銀，若扣除租酒店做場地，以及基本廣告開支，美記非但白做，隨時仲要蝕錢。

點解會咁？原來地產經紀想做政府生意，於是喺競投時將佣金定到好低，希望做到政府嘢而省吓招牌。過去一年多，經紀為求爭取拍賣權，出現割喉式競爭，一年多前港府首次推出豪宅拍賣，當時投得嘅經紀行唔收政府佣，買家只要畀樓價百分之零點三八佣金。其後中原先後兩次獲得產業署拍賣權，佣金更低至百分之零點一。

美記為搶番生意，據聞今次就將佣金壓到新低，只係得百分之零點零三。即係話一個二千萬元嘅物業，佣金收入只係六千銀，比做一單嘉湖山莊租務仲要低，唔怪得好多拍賣行都話搶爛市。

美聯幫政府拍賣樓佣金只得四萬銀。

新浪微博用戶五千萬

微博近年熱爆中港台，各地藝人好似那英、小S、趙微、黃曉明等都有開戶。依家新浪微博嘅用戶達到五千萬，直追Twitter嘅一億，而新浪自己信心十足，相信多一點時間就可以超過呢個數目。

事實上，新浪微博人氣確係好勁，好似曾經將分類網址網265.com賣畀google嘅蔡文勝，佢今年中創立咗4399遊戲網，為咗增加自己知名度，於是喺微博開咗個戶口；適逢係世界杯，蔡文勝喺戶口舉辦四強競猜遊戲，送出ipad、iphone。重賞利誘下，結果條微博喺四天內被轉發合共三萬幾次，開戶幾個月後，粉絲（fans）數目已經一百二十萬。

新浪網見微博咁受歡迎，於是決定大搞，將微博獨立發展成weibo.com ，又採用蘋果Apps Store模式，透過增值服務對微博用戶收費，分紅比例方面就更吸引，開發者七成，微博平台佔三成，大大減少商戶的成本，有效開拓市場。

新浪總裁兼首席執行官曹國偉話唔使幾耐，新浪微博用戶可以超過twitter。