甩于文鳳　周星馳轉嗒 o靚妹壹週刊 1079期－娛樂八掛大分享☆

"啱我口味！（設計對白）"
各有各玩
甩于文鳳　周星馳轉嗒 o靚妹
2010年11月11日
周星馳自從跟拍拖十年的于文鳳分開後，追女口味出現突變，居然同毒男品味一致，對年輕貌美 o靚模產生濃厚興趣。
據了解，年近半百，現年 49歲的周星馳，甩拖後火速搭上 21歲 o靚模 Kama（羅凱珊），撻着唔夠三個月，又跟望落同樣廿歲出頭的 o靚妹著情侶裝跑步健身。前度有新女， 39歲于文鳳同樣有着落，跟家族擁有百億資產的創興銀行後人廖駿倫（廖堯城）行埋，各自各精彩。
舊愛心死
做咗周星馳隱形女友十年，善於理財投資的于文鳳，一直在背後發功，幫男友錢滾錢，令周星馳的身家一度跳升至五十億。雖然有功有勞，但于文鳳始終逼唔到男友結婚，做唔成周太，兩人終在今年二月分手，其後于文鳳跟創興銀行後人廖駿倫展開新一段戀情。
上週二（十一月二日）晚十時，于文鳳跟廖駿倫在中環撐完枱腳，司機先送家住馬己仙峽道港景別墅的廖駿倫返家，然後再過海送于文鳳返回九龍塘獨立屋。
雖然啱啱開始拍拖，但事業型的于文鳳，唔似一般港女咁黐身，放工後多數留在家中休息。至於廖駿倫，同樣以工作為重，上週四晚（十一月四日），便相約政務司司長唐英年、東亞銀行主席李國寶及林建岳等人，在中環傾生意飲紅酒，一餐晚飯食足三個鐘，各人分批離開，飲到面紅紅的唐司長，更笑住跟記者打招呼。
我後生好多。（設計對白）

過去十年，周星馳唯一承認的女朋友只有于文鳳，二人不時被拍得在尚興食貴價潮州菜。

o靚妹陪跑
前度投入新戀情，周星馳亦不寂寞。以往鍾意戴住口罩，在中環橫街窄巷穿梭踩單車的他，運動與追女口味同時出現變化。早前本刊發現周星馳唔玩單車，晚上七時到數碼港附近跑步練氣，身邊更有一位 o靚妹擔任陪跑專員，二人穿上情侶運動裝跑步，出完一身汗，兩個便由司機揸車接載離開。
「佢同于文鳳分開冇幾耐，就同咗 Kama一齊，聽講佢哋喺夜場認識，之後星爺主動出擊成日約 Kama出嚟玩， Kama班朋友都知佢同星爺一齊。」知情人說。
改變口味的周星馳，早前被拍得跟 o靚妹在數碼港跑步，不過為避嫌前後腳上車。

周星馳近年鍾意戴口罩在中環踩單車，不過近日就轉口味，搵 o靚妹陪跑。

撻着 Kama
今年五月，成功入主帝通國際的周星馳，由影帝變成上市公司執行董事，仲將公司名改為比高集團（ 0220），賬面身家一夜間進賬八千多萬。
新任男友後台夠猛， Kama羅凱珊釣中金龜，當然咬住唔放，寧願推 job專心拍拖。
「 Kama一心一意跟實星爺，做嘢都無以前咁搏，佢諗住男朋友開戲，一定預埋佢一份，有 job送上門都推，點知拍得幾個月拖，就俾星爺飛咗，無咗條大水喉，娛樂圈又咁多 o靚模同佢爭飯食， Kama寧願飛去英國讀 Law，當自我增值，將來都有個保障。」知情人說。
飛甩 Kama，周星馳又有 o靚妹陪跑，早已滿頭白髮的他，最近突然注意健康，跟身邊朋友表示要戒酒戒煙，保持心境健康兼青春，同後生女拍拖自然更得心應手。

拍拖唔需要日日見，上週四，廖駿倫相約了李國寶、唐英年以及林建岳等人，在歷山大廈內一間餐廳飲紅酒傾生意。
今個月初，于文鳳跟廖駿倫撐完枱腳，由司機送廖駿倫返半山屋企，再送于文鳳返九龍塘獨立屋寓所。
功成身退

現年 39歲，「香港建設」掌舵人于鏡波的女兒于文鳳，家族生意逾 27億，身家估計至少有 4億。 10年來一直做周星馳背後女人，更是男友生意上的軍師。于文鳳畢業後曾在兄長于樹權開設的金融、證券投資公司任職，因眼光獨到，尤其精於房地產投資，早年提議周星馳買賣先達廣場及加連威老道旺鋪，大賺 1億 1300萬，而最轟動的一次，是 04年以 3.2億元購入普樂道 10號發展豪宅，估計整個項目可帶來近 20億進賬。幫男友錢滾錢，于文鳳雖然有功，但周星馳緋聞無停過，加上唔肯結婚，于文鳳唔想無名無份於是提出分手，但公還公，私還私的她，今年五月仍盡力協助周星馳完成借殼上市夢，做唔成情侶，仍然是生意上的好拍檔。