今期最紅，應該是一舉成名的林欣彤。

成為《超級巨聲2》最後大贏家，譚詠麟在微博背書力撐，被譽為新一代小巨肺。這兩個星期，林欣彤（Mag）絕對是從現實走進夢幻，達成了多少少男少女的夢想，成功踩入娛樂圈做歌星。

忽然上位，單是youtube點擊率二百幾萬，未計終極決賽當晚的一百七十幾萬觀眾。

「這兩個星期我都不知自己做了幾多次訪問和宣傳工作，個人好攰，壓力好大，不停有記者問我這樣，問我那樣。其實我自己都滿腦子問題，最怕係你問我到底之後想點，我真係唔知！」Mag帶點疲累地說。

俗語話成名要趁早，剛滿二十歲便達成了「讀中二時就想做歌星！」的夢想，只是當她真正進入這個仙境時，其實卻似在夢遊。

「得獎之後我成日發夢，夢見畀好多好多記者追，好緊張。其實我依家只係想可以好好地讀書，完成最後一年的課程。」

愛麗絲失足跌入樹窿去了仙境，不停畀紅心皇后那班啤牌兵追捕。林欣彤個窿卻是自己掘的，最少當日是她自己去買本電視台周刊填表格，再由林媽媽親自寄出，更要過五關斬六將才有現在的「成績」。

自己跳入窿畀記者追，不是預計之內的嗎？

娛圈七大難

林欣彤在《超級巨聲2》的表現如何，有睇電視的應該明白，未睇的大可上Youtube補飛，雖然決賽當晚帶病上陣影響演出，不過仍然以輕微分數大熱勝出，隨即簽約TVB達成夢想。

自稱問題少女的Mag，在親身踩入仙境之後，才發覺真係有好多問題，自己都冇答案，以下為Mag的娛樂圈七大疑難：

一、所有事件都好難估計，工作時間、地點完全唔定，我自己都唔知自己幾時會身處甚麼地方。（訪問連攝影以極速進行，原來當日Mag上場接下場連踩四個訪問加宣傳。）

二、工作真的好疲倦，活動宣傳一個接一個，完全冇得停，到底我幾時至有得瞓？（雖然化行妝，仍然難掩倦容。）

三、好大壓力，我都唔知點解要面對咁多人，好似仲辛苦過比賽。（台上淡定自如的Mag，接受訪問時反而靦靦腆腆，聲線柔弱，乜唔係小巨肺咩？）

四、訪問時好多人問我問題，要講好多嘢，我又好驚講錯說話喎……（我問一句，佢答一句，答之前仲要眼珠勁轉諗餐死，似乎真係好大陰影。）

五、一邊工作一邊讀書好辛苦，冇時間做其他事。（做明星本來就係要一心多用、瓣瓣兼顧，返學都係小事，仲有至少八年慢慢捱喎！）

六、被記者跟，得獎後第一日返學就有記者在樓下等我，好驚！（入得娛樂圈，有人跟總好過冇人理，不過Mag話其實第二日就已經完全回復平靜。）

七、最重要疑難係，對未來完全無概念，我真係唔知會點樣！會簽甚麼唱片公司？幾時會出碟？跟住會有乜工作？就連到底接個騷你有幾多錢收？Mag都係帶點慘情地答，我真係唔知呀！

傳聞中所謂四大唱片公司爭住簽約出唱片呢回事呢？

「嚡！我都係睇報紙至知呢個傳聞，真係完全冇人話過畀我聽！」

我眼前有個無奈Mag。

Mag提供的童年相，全部都係喺遊樂場玩緊。個樣同依家真係唔多似。

夢遊仙境

Mag曾經在自己的blog留言：「比賽的結束，是另一個開始。」

只是奪冠之後，更是發夢的新開始。

「這兩個禮拜，我已經連續幾晚發同一個夢，夢中被一大班記者瘋狂地追，好驚好驚！不停咁跑，最後跑到紥醒。」

雖然我不懂解夢，但以最簡單的常識來推論，都應該估計是得獎後壓力巨大所致吧！

「又試過發夢，朝早起身準備返學，點知一打開屋企道門，就有成班記者守候，不停咁影相，想關門但道門好似鎖死咗咁唔郁，最後又係一身汗咁醒咗。」

Mag一直最驚就係被記者跟，本已有人教路，一旦發現畀人跟就要扮鎮定，保持笑容，千祈唔好自亂陣腳。

「講就容易，我初時都以為自己得，點知真係有記者跟時我不知幾驚。後來仲跟埋我上巴士，根本唔係偷影係明影，我咪扮鎮定笑住畀佢影囉！反而坐我隔籬個男仔仲鎮定，完全唔理繼續瞓。」

我相信，這兩個星期以來的追訪，已經讓Mag對記者產生極度心理恐懼，還要面對諸如三角戀、袋中得番廿蚊點夠使之類的新聞，對這位二十歲的「巨星」來說，站在台上面對幾百、幾千甚至過萬觀眾表演歌喉，應該會更樂得自在。

三角不戀

對Mag來說，成名後的另一個問題，就是不斷被追問戀愛狀況，從初戀男友曝光，到早幾個月剛剛與第四任男友分手，繼而是與同為參賽者的羅孝勇及胡鴻鈞傳出三角戀緋聞，我循例問一問，她循例否一否認，都係朋友喎！

「OK！OK！原來大家真係好有興趣知我拍過幾次拖，有冇男朋友之類，我講！拍過四次拖，中二初戀短時間就畀人飛，跟住再拍過三次拖都係我話要分手，最長拍了兩年，試過同一時間有五個人一齊追我，依家冇拍拖、冇人追，因為我極度唔得閒！」

已經答得滾瓜爛熟的答案，再說一次又何妨。

不過，雖然有些問題真的答到悶，但Mag都要澄清，就是每個星期是有「六百」大元的零用錢，絕對夠用。

「我住大埔，去青衣上堂，一個星期只係返四日學，計晒搭車食飯六百蚊一定夠。雖然我依家仍然用緊爸爸媽媽錢，不過我一搵到錢，就一定會自食其力，可以的話當然會照顧埋屋企人啦！」

OK！OK！我證明林欣彤個銀包，絕對唔止得廿蚊，更何況奪冠後做訪問出function有經理人、化妝師、髮型師至少三、四人跟出跟入，就算銀包真係斗零都冇，又使乜驚呀？

譚詠麟在微博上力撐，是林欣彤為人熟識的其中一個重要原因。

壓力獎

成名後的林欣彤，也會發這樣一個夢：

「夢見好多、好多面牆，不停從四面八方壓埋自己度，嗌救命又嗌唔出聲！」

得到冠軍，卻也得到不少反對聲音和批評。

我不是Miss Chan Chan，不懂用歌唱術語來評論Mag的歌聲。

到底她的唱功如何，是聲沙沙只懂大嗌、還是咬字不清唔知唱乜，我說不準。

只知訪問時現場親耳聽她細唱幾句，我只能用「好聽」兩個字來形容。

就算有網友認為賽果有造馬之嫌，林欣彤始終是實至名歸的冠軍。

林欣彤夢遊娛樂圈，也應該是一個甜夢。

一切總會習慣，現時最讓Mag感到難於接近的，還是記者問一些很私人的問題。

「有次訪問記者問我係唔係處女，當時又冇人喺隔籬幫我，好尷尬，都唔知點答好……」

面紅紅、怕怕醜，少女味百分百的Mag勁唔好意思地說。

我仲以為睇《超級巨聲》都係想聽歌，覺得好聽至係最緊要。

佢係唔係處女，真係有關係咩？

又唔係o靚模……