盂蘭勝會--七月十四之律政驅魔人
別以為《捉鬼家族》僅屬戲劇情節，在我們身邊隱藏着不少世外高人，默默秉承呂祖先師訓示，宏揚道家精神。 24歲的 Philip，日間在律師樓工作，晚上則變身驅魔達人，率領家人執行另類法學。「不是要它們煙消雲散，盡可能談判，再導以正途。」現實與電影，始終有不同之處。 撰文：馮國康
其他娛樂名人影片
鬼？梗係驚啦，我都係普通人——出自捉鬼大師之口，確實有點意外。是偶然的機緣吧， 24歲的 Philip（黃騰威）這天向律師樓請了半天假，準備應付法律文憑考試，也讓小記可一睹少年捉鬼師的廬山真貌。然而從他的談吐舉止，混雜着幾分書卷氣與年少氣傲的眼神，卻絲毫感覺不到其異於常人的天賦。還有，捉鬼的原來不一定是陰沉寡言的。
小學發現異能 放大圖片 
Philip（右起）跟父母雞爸和雞媽，會一齊出動上門替人做法事驅鬼。
「由細到大都睇到呢啲嘢，已經習慣咗，惟有盡量做番普通人。」 Philip娓娓道出鮮為人知的過去：「記得嗰陣三、四年級，因為感冒冇返學。喺屋企我由房行出廳之際，突然見到有個人箍住阿媽條頸，用刀係咁拮，啲血直情好活生生咁飛到面前！之後嗰個人發現我見到佢，成把刀飛過嚟。我好驚，即刻衝返入房打 999。後嚟差人嚟到，我先至知面前見到嘅居然係幻覺。」讀者或會質疑，是吃了感冒藥產生幻覺吧？但一次又一次的體驗，令 Philip堅信他擁有異於常人的能力：「有朝起身望出窗外，居然係郊外場景，仲見到兩個日本武士揸住把刀決鬥，我就知又嚟？咁我即刻行出房，一路行一路發現個地板係草地嚟，直至出咗門口，所有嘢先回復原狀。」 Philip遂向篤信道教的雙親傾訴，當他被帶到道壇皈依做弟子，方知之前的是幻覺，實乃呂祖先師（呂洞賓）給予的試煉：「因為具備法眼嘅人，驅魔時要處變不驚，所以要喺壓力下長大。」自此 Philip潛修道法，與家人在筲箕灣開設以慈善機構註冊的道壇，替人驅鬼做法事，亦會將捉鬼經歷放在 blog中與人分享。年紀輕輕的 Philip，山精、水妖、餓鬼、熊靈統統對付過，惟獨提到第一次驅鬼經驗，依然猶有餘悸。 Philip說：「好記得嗰日突然有朋友打電話嚟，話佢姪女唔多妥，我哋去到個女仔瞓喺凳上面，有 5、 6個男人㩒住佢，但都㩒唔到。」Philip續說：「我用法眼見佢頭頂有隻角（註：據說角是靈界的等級認證，頭頂越多角，象徵修行越高），唔係普通陰靈咁簡單，個樣係好猙獰嗰隻。之後佢突然變咗男人聲，一手將 5、 6個男人推開。我阿爸見勢色唔對，即刻㩒住佢，用隻手過道符落佢個頭度，心中持咒，再開符水畀個女仔飲，個女仔先冇事。」
旨在化解仇恨 放大圖片 
80年代由劉丹和歐陽佩珊主演的劇集《捉鬼家族》，講述識捉鬼的夫婦大鬥法。 劇照
最後， Philip三番四次替他們的對頭人講好說話：「凡事有因果，佢搞得你一定有因。我哋嘅角色可以話係談判專家，盡可能都會同佢哋坐低傾，等雙方解開業力。冇必要我哋唔會用武力，更加唔會令佢哋煙消雲散，因為佢哋本質唔係壞。」說着說着，才猛然醒覺，鬼神怎會可怕得過身邊的小人？攝影：黃文偉、黃偉雄場地：筲箕灣妙觀園慈善基金會道場 
Philip 捉鬼年資： 10年 專長：法眼
24歲的 Philip日間在律師樓工作，晚間變身驅魔達人，又將捉鬼的經歷放上網誌跟人分享。
盂蘭勝會--話你知：一門三傑六步驅鬼
其他娛樂名人影片
鬼片就睇得多，睇人驅鬼完全是另一回事， Philip解釋說：「其實邊使咁多花臣呀，法係喺心度，只要用法就可以同靈界溝通。做法事更加冇可能一招了，解決問題都有好多步驟啦！」 Philip一家三口通曉驅鬼，且看他詳述的六個步驟。
放大圖片 
【第一步．扶乩】Philip會先用法眼觀測事主，及試探是否陰靈纏身，確定後雞媽便會透過扶乩向呂祖先師請示，而雞爸除了負責記錄乩文外，亦會監督事主一舉一動。
放大圖片 
【第二步．法器】在處理案件時，他們會先請示呂祖先師，以透過扶乩方式選定作法日子及所需的法器，法器的用途臨場才有啟示。據說冬瓜、繩子、釘子都試過用上。
放大圖片 
【第三步．入門】他們按呂祖先師選定的日子、時間及人數，絲毫不差地前往事主的家宅辦事。而到達事主屋外時，一般會排出三男三女的陰陽陣才入屋，以擋煞氣。
放大圖片 
【第四步．睇場】Philip以法眼視察環境，若發現屋內有不尋常的氣場便會稟報雞爸，擬定下一步計劃。假若事主被陰靈附體，雞媽會使出陰陽掌，逼靈體現身談判。
放大圖片 
【第五步．談判】有別電影情節， Philip驅魔以道為先，先了解為何陰靈苦纏事主，亦希望透過對話以化解雙方的積怨。若不肯就範，雞爸才會施以符咒。
放大圖片 
【第六步．封妖】若遇上難纏的妖或精，再三談判亦無果，雞爸才會透過道法將陰靈暫且收進法器之中，然後才返回道壇放在呂祖先師殿前，讓呂祖先師發落。
留言列表
