睇劇唔係睇戲分嘅!(真實對白)《巨輪》鋪路嘉欣 BB攞視后,出席宣傳時表情多多,田蕊妮雖然做阿二,不過宣傳時依然四萬咁口笑晒。梗係啦!話晒《巨輪》同𠵱家拍緊《忠奸人》都係同一監製王心慰,點都要交足戲嘅! 

真面目

逐秒計 衝上監製房拗戲 田蕊妮唔妥鍾嘉欣

為鍾嘉欣鋪路做視后嘅台慶劇《巨輪》本週首播。做女二嘅田蕊妮雖然戲分唔少,但搶鏡度始終唔及嘉欣 BB。無端端要做鍾嘉欣陪襯已經唔妥,而且電視台姐仔最計較出鏡率,明知冇得爭,戲分都唔可以輸太遠。
據知在《巨輪》拍攝期間,田蕊妮發現其中一集劇本冇自己戲分,嬲到即刻搵監製王心慰理論。結果監製答應她於新劇《忠奸人》中獨霸女一,阿田條氣先順番。上週三( 18日),阿田講起《巨輪》坐歪做鍾嘉欣陪襯,仍然不忿:「睇劇唔係睇戲分嘅!」

 

35歲田蕊妮 08年由亞視跳槽到無綫,兩年前開始轉為無綫親生女(經理人合約),喺無綫算係劇接劇。不過孭重戲做女一又搶鏡,只得 10年同林保怡合作嘅《讀心神探》。

錫身輕吻

鍾嘉欣喺《巨輪》同陳展鵬冇激吻戲,呢場原來抄《旺角卡門》嘅電話亭激吻戲,最後都係輕吻一啖咋。

 

蕭正楠角色基本上係講澳門鉅記發迹史。田蕊妮就係同佢一齊打江山,兩個角色孭住咁大個廣告商牌頭,劇情當然好穩陣,重口味場面如殺人、強姦、忘年戀通通都冇。

發爛渣成功

喺亞視做一姐,電影亦吃得開,但阿田喺無綫就成日要就班姐仔冇得坐正,去年拍攝《巨輪》已知做阿二,雖然劇中同蕭正楠由車仔檔做到全澳門最出名嘅手信鋪頭,但埋位發現搶鏡度原來唔及有力憑此劇爭視后的鍾嘉欣。
忽然要變做鍾嘉欣陪襯已經唔高興,據知拍攝期間,劇本出到中段時,其中一集阿田竟然一場戲都冇,嬲到即刻搵監製王心慰理論。知情者透露:「監製同佢講劇本寫少咗一集啫,但剪出嚟你集集有出場,唔使驚。仲話下套一定畀佢做女一,阿田出嚟即刻開心晒啦!」
監製派定心丸,不過阿田仍相當擔心,事關之前拍攝《舌尖上的公堂》時,原先設定做女一,但最後戲分竟然不及黃翠如。最近《忠奸人》開拍,田蕊妮終於確定有女主角做,阿田先成個 happy晒。上週三( 18日)出席《巨輪》宣傳活動時被問到戲分少過嘉欣 BB,田蕊妮表示:「套劇出嚟好睇,做多做少唔係一個問題,睇劇唔係睇戲分嘅。」而嘉欣 BB亦話:「其實阿田戲分都唔少。好多戲㗎!」係唔少,但唔夠你多啫!


田蕊妮近年多拍王心慰監製(紅圈)作品,由 11年《真相》開始做配角,之後《衝呀!瘦薪兵團》到最新拍嘅《忠奸人》亦做女一,是王的御用班底。 

《衝呀!瘦薪兵團》 

田蕊妮 10年首次拍無綫劇《讀心神探》做女一,不過就被林保怡飾演嘅姚 sir搶晒戲。

阿二坐唔正

田蕊妮由 08年開始過檔無綫,近年角色發揮雖多,但始終坐唔正,除曾在《誰家灶頭無煙火》及《讀心神探》孭飛外,其他劇多數做當紮花旦陪襯。《巨輪》要輸畀嘉欣 BB;而年中拍攝《舌尖上的公堂》原本做女一拍住郭晉安,但因黃翠如有余詠珊照,結果阿田都變阿二,老公杜汶澤即時喺網上撐老婆,鬧爆無綫。不過最新拍緊嘅《忠奸人》就冇人同佢爭喇!斷估唔會輸畀商天娥啩?


做多做少唔係一個問題。(真實對白)問到田蕊妮戲分少過鍾嘉欣,她說:「睇劇唔係睇戲分!套劇好睇先最重要。」幾大方。 

黃翠如有余詠珊照,連拍劇都套套做女一,年中拍《舌尖上的公堂》原本由女二,最後戲分加到變女一,搶埋田蕊妮戲分。 

田蕊妮在新劇《忠奸人》做吳卓羲女友,又同郭晉安有唔少對手戲,成套劇得商天娥、李亞男稍為出名女角,應該冇人贏佢。

商天娥 

李亞男 

張繼聰係 final boss

《巨輪》一半講鉅記發迹史;另一半講蕭正楠、陳展鵬兄弟情。除咗陳展鵬由忠變奸再變番忠, 30集入面亦有唔少搶鏡配角,例如做 final boss嘅張繼聰;重口味做壞女人嘅有首拍劇嘅名模貝安琪,至於在劇中專恰蕭正楠嘅趙永洪(《畢打自己人》 Macro)亦好搶鏡。


張繼聰喺《巨輪》入面做大奸角,陳展鵬變奸,全靠佢一手造成。 

下週一( 30日)貝安琪先出現,除咗做鍾嘉欣上司、亦𥄫中嘉欣男友陳展鵬,更同佢有激吻床戲。 

趙永洪劇中做 80年代飛仔,專恰蕭正楠,更同佢爭鋪。第五集更會被田蕊妮兜巴星。

陳展鵬老笠鍾嘉欣

《巨輪》為鉅記餅家贊助,雖然劇中冇寫明鉅記,以羅信記代替,但頭五集已講蕭正楠發迹成為澳門最大手信鋪,更有唔少場景喺鉅記拍攝,簡直最強直接廣告。而劇情則用倒敍方式講,由蕭正楠、鍾嘉欣被陳展鵬綁架開始, 4位主角由 20歲做到 50歲,不過造型都係換件衫、轉個髮型就當老咗。


採訪、撰文:娛樂組

arrow
arrow
    全站熱搜

    tvb4life 發表在 痞客邦 留言(0) 人氣()